MIDZIDZI inango anyakulemba Bhibhlya anango abwerezera mafala mabodzi ene. Onani mathangwi matatu akuti panango acitisa anyakulemba Bhibhlya anewa kucita pyenepi:

Mu ndzidzi udalembwa iyo. Mu Izraeli, anthu azinji nee akhali na makopya a Mwambo toera kuaphatisira. Kazinji kene iwo akhabva Mwambo unoyu angagumanyikana pa tabhernakulo. (Dheu. 31:10-12) Pisaoneka kuti pikhali pyakukhonda nentsa kuna iwo kudzudzumika thangwi ya kulimira mu ndzidzi uzinji pa mwinji toera kubvesera Mwambo. (Nee. 8:2, 3, 7) Natenepa, toera mwinji ukwanise kukumbuka na kuphatisira uphungu unoyu pikhafunika kubwerezera ntsonga zakufunika. Kubwerezera mafala pikhali pyakufunika kakamwe kuna mwinji toera kukumbuka mitemo mizinji.—Lev. 18:4-22; Dheu. 5:1.

Njira idalembwa iyo. Mabukhu anango a m’Bhibhlya alembwa ninga nyimbo. Mwacitsandzo, bukhu ya Masalmo, Nyimbo ya Salomoni na Nyimbo ya Ciliro alembwa munjira ineyi. Nyimbo zinango zisabwereza-bwereza mafala pa koro toera kugomezera nsolo wa nyimbo, pontho pyenepi pisaphedza anyakubvesera toera kukumbuka mafala a nyimbo ineyi. Mwacitsandzo, onani mafala adalembwa pa Masalmo 115:9-11: “Imwe dzindza ya Izraeli, nyindirani Yahova; Iye ndi m’phedzi wanu na xango yanu. Imwe dzindza ya Aroni, nyindirani Yahova; Iye ndi m’phedzi wanu na xango yanu. Imwe munagopa Yahova, nyindirani Yahova; Iye ndi m’phedzi wanu na xango yanu.” Mwandimomwene, njira idabwerezerwa mafala pa lemba ineyi mbidaphedza anyakuimba toera kukumbuka mafala anewa na kuakoya muntima.

Thangwi yanji yalembwa tenepo? Anyakulemba Bhibhlya midzidzi inango akhabwerezera mafala akufunika. Mwacitsandzo, mu ndzidzi udapereka Yahova pitsogolero kuna Aizraeli toera akhonde kudya ciropa, iye apanga Mose toera alonge kuna iwo kazinji kene kuti thangwi yanji nee akhafunika kudya ciropa. Yahova akhafuna kugomezera kuti ciropa cisaimirira umaso. (Lev. 17:11, 14) Mukupita kwa ndzidzi, pikhali apostolo na akulu a mpingo mu Yerusalemu, iwo alemba pinthu pyakuti Akristu akhafunika kupicita na pinthu pikhafunika iwo kucalira toera kukomeresa Yahova, pontho agomezera kufunika kwa kucalira ciropa.—Mabasa 15:20, 29.

Ndimomwene kuti Bhibhlya isabwerezera mafala midzidzi inango, mbwenye pyenepi nee pisabveka kuti Yahova asafuna kuti ndzidzi onsene tibwerezere mafala anewa. Mwacitsandzo, Yezu alonga: “Pakucita phembero, leka kulonga pinthu pibodzi pyene mwakubwereza-bwereza.” (Mat. 6:7) Iye alonga pinthu pyakuti tinakwanisa kupiphataniza m’maphembero athu. (Mat. 6:9-13) Na thangwi ineyi, maseze tisacalira kubwerezera mafala m’maphembero athu, ife tinakwanisa kuphataniza pinthu pibodzi pyene m’maphembero athu.—Mat. 7:7-11.

Pana mathangwi adidi adacitisa anyakulemba Bhibhlya kubwerezera mafala. Ineyi ndi ibodzi mwa njira zizinji zinaphatisira Yahova, Mpfundzisi wathu Wankulu toera kutipfundzisa pinthu pyakufunika kuna ife.—Iza. 48:17, 18.