1-2. (a) Kodi Bhibhlya isalonga kuti Mose akhali munthu wa ntundu wanji, pontho iye acitanji? (b) Ninji cinatikulumiza toera kukhala anthu akucepeseka?

BHIBHLYA isalonga kuti Mose akhali munthu ‘wakukhurudzika, pontho nee pakhali munthu unango pantsi pano ninga iye.’ (Num. 12:3) Kodi mafala anewa asabveka kuti iye akhali wakupolola, akhagopa kucita pisankhulo peno akhagopa kutcingwa? Anango asalonga kuti ndi pyenepi pinacita munthu wakucepeseka. Mbwenye maonero anewa nee ndi andimomwene. Mose nee akhali wakupolola, pontho akhali dzololo toera kutumikira Mulungu mwacipapo. Na ciphedzo ca Yahova, iye akwanisa kulonga na ntongi wankulu wa mu Ejito, buluka penepo mbatsogolera anthu cifupi na 3.000.000 n’thando, pontho aphedza dzindza ya Izraeli toera kukunda anyamalwa awo.

² Ife nee tisathimbana na mayesero adathimbana na Mose, mbwenye ntsiku zonsene tisathimbana na makhaliro akunentsa toera kukhala akucepeseka. Natenepa tisafunika kuwangisira toera kukulisa n’khaliro unoyu thangwi Yahova apikira kuti ‘anyakupfulika peno anyakucepeseka anadzakhala pa dziko.’ (Masal. 37:10) Kodi imwe ndimwe wakucepeseka? Anango asakuonani munjira ineyi? Mbwenye mbatidzati kutawira mibvundzo ineyi, tisafunika kudziwa kuti kucepeseka kusabvekanji.

3-4. (a) Kucepeseka kwalandana nanji? (b) Toera kukhala akucepeseka tisafunika kukhala na makhaliro api, pontho thangwi yanji?

³ Kucepeseka * kwalandana kakamwe na foya yakubalika. Munjira ipi? Anthu anasasanya foya asaphatisira makore akusiyana-siyana toera ikhale yakubalika. Munjira ibodzi ene, munthu wakucepeseka asafunika kukhala na makhaliro mazinji adidi. Anango mwa iwo ndi kubvera, kukhurudzika na cipapo. Thangwi yanji tisafunika kukhala na makhaliro anewa toera kukomeresa Yahova?

⁴ Basi ene anthu akucepeseka ndi anacita pinafuna Mulungu. Mwacitsandzo, Mulungu asafuna kuti tikhale akukhurudzika. (Mat. 5:5; Agal. 5:23) Tingacita pinafuna Mulungu, Sathani asaipirwa. Ndi thangwi yace, tingakhala akucepeseka na akukhurudzika, anthu akuti asacita khundu ya dziko ya Sathani asatiida. (Juw. 15:18, 19) Natenepa, tisafunika kukhala na cipapo toera kukunda mayesero a Sathani.

5-6. (a) Thangwi yanji Sathani asaida anthu akucepeseka? (b) Ndi mibvundzo ipi inafuna ife kutawira mu nsolo uno?

⁵ Munthu wakuti nee ndi wakucepeseka ndi wakudzikuza. Iye nkhabe nentsa kuipirwa, pontho nkhabe bvera Yahova. Anewa ndi makhaliro a Sathani, ndi thangwi yace iye asaida anthu akucepeseka. Anthu akucepeseka asapangiza pakweca makhaliro akuipa a Sathani, pontho asapangiza kuti iye ndi nyauthambi. Thangwi yanji? Thangwi mwakukhonda tsalakana pinalonga na pinacita iye, Sathani nkhabe kwanisa kupingiza anthu akucepeseka kutumikira Yahova.—Yobe 2:3-5.

⁶ Mphapo, thangwi yanji m’midzidzi inango pisanentsa kukhala akucepeseka? Pontho thangwi yanji tisafunika kupitiriza kukhala akucepeseka? Toera kutawira mibvundzo ineyi, tendeni tinyerezere citsandzo ca Mose, Ahebheri atatu akhali ku ubitcu ku Bhabhilonya na ca Yezu.

7-8. Kodi Mose acitanji mu ndzidzi ukhatsalakanwa iye mwakusowa cilemedzo na abale ace?

⁷ Tingapaswa cidzo: M’midzidzi inango pisanentsa kwa anthu a cidzo kukhala akucepeseka, makamaka angaona kuti nee asabverwa peno alipo anapenula cisankhulo cidacita iwo. Kodi pyenepi pyakucitikirani kale? Ndiye tani m’bodzi wa acibale anu mbadacita pyenepi, imwe mbumudacitanji? Onani kuti Mose acitanji pikhathimbana iye na pyenepi.

⁸ Yahova asankhula Mose toera akhale ntsogoleri wa Aizraeli, pontho ampanga toera alembe miyambo yakuti iwo akhafunika kuibvera. Mwakukhonda penula, Mose akhadasankhulwa na Yahova. Ngakhale tenepo, abale ace, Miriya na Aroni akhalonga pinthu pyakuipa thangwi ya iye, pontho ansumula thangwi ya nkazi adasemba iye. Natenepa amuna anango akhali kukhundu ya Mose aipirwa mbatomambo kuabwezera pyakuipa pikhacita iwo—mbwenye Mose nee acita pyenepi, pontho iye nee acimbiza na kuipirwa. Natenepa iye aphemba Yahova toera akhonde kutcunyusa Miriya. (Num. 12:1-13) Thangwi yanji Mose acita pyenepi?

9-10. (a) Kodi Mose aphedzwa na Yahova toera kubvesesanji? (b) Misolo ya banja na akulu a mpingo asapfundzanji na citsandzo ca Mose?

⁹ Mose atawira kutsogolerwa na Yahova. Mu pyaka 40 nduli, pikhali Mose panyumba ya mambo ku Ejito iye nee akhali wakukhurudzika, pontho akhaipirwa mwakucimbiza. Ntsiku inango apha mamuna mbanfikira na tcetca, thangwi kwa iye, mamuna unoyu akhacita pinthu pyakukhonda thema. Mose akhanyerezera kuti Yahova akhakomerwa na pikhacita iye. Mbwenye Yahova amala pyaka 40 mbakaphedza Mose toera abvesese kuti pakutsogolera mbumba ya Izraeli, nee akhafunika kukhala wacipapo basi, mbwenye akhafunikambo kukhala wakukhurudzika. Pontho, toera kukhala wakukhurudzika, akhafunikambo kukhala wakucepeseka na wakubvera. Iye apfundza kupangiza makhaliro anewa mbakhala ntsogoleri wadidi.—Eks. 2:11, 12; Mabasa 7:21-30, 36.

¹⁰ Lero misolo ya mabanja na akulu a mpingo asafunika kutowezera Mose. Munthu angakutsalakanani munjira yakukhonda thema, nee musafunika kuipirwa mwakucimbiza. Mungadawa, mwakucepeseka tawirani madodo adacita imwe. (Koel. 7:9, 20) Tisafunika kubvera pitsogolero pya Yahova pinagumanika m’Bhibhlya toera timalise kukhonda kwathu kubverana na anango. Pontho ndzidzi onsene tisafunika kutawira munjira yakukhurudzika. (Mis. 15:1) Misolo ya banja na akulu a mpingo angacita pyenepi, anakomeresa Yahova, anakhala na ntendere m’banja peno mu mpingo, pontho anapereka citsandzo cadidi cakukhala akucepeseka.

11-13. Ndi citsandzo cipi cidakhazikisa Ahebheri atatu?

¹¹ Tingatcingwa: Kutomera kale mpaka lero, mautongi a dziko asatcinga atumiki a Yahova. M’midzidzi inango iwo “asatipumpha” munjira zakusiyana-siyana, mbwenye undimomwene ndi wakuti iwo asatitcinga thangwi ‘tisabvera Mulungu ninga ntongi, tayu anthu.’ (Mabasa 5:29) Ngakhale atitcinge, kutiikha nkaidi, peno kutimenya, ife nkhabe kubwezera pyakuipa, m’mbuto mwace, tisanyindira ciphedzo ca Yahova toera tikhale akukhurudzika m’mayesero onsene.

¹² Nyerezerani citsandzo cidasiya Ahebheri atatu akhali mu ubitcu—Ananiya, Mizaeli na Azariya. * Mambo wa ku Bhabhilonya aapanga toera alambire dzimunthu yakucitwa na ouro. Mwakukhurudzika, iwo apanga mambo kuti thangwi yanji iwo nkhabe kulambira dzimunthu ineyi. Natenepa mambo aathusa kuti angakhonda kubvera ntemo unoyu, iye anaaponya mu djenje ya moto. Maseze aphale anewa atatu nee akhadziwa pikhafuna kuacitikira, iwo akhonda kubvera mambo, na thangwi ineyi Yahova aapulumusa. (Dan. 3:1, 8-28) Aphale anewa atatu apangiza kuti anthu akucepeseka ndi acipapo kakamwe. Natenepa, nkhabe utongi unafuna kutitcinga, peno kuthusa mbuticitisa kusiya ‘kulambira’ Mulungu wathu m’bodzi basi, Yahova.—Eks. 20:4, 5.

¹³ Kukhulupirika kwathu kwa Mulungu kungayeserwa, tinatowezera tani aphale anewa atatu Acihebheri? Ife tisafunika kukhala akucepeseka mbatinyindira Yahova kuti anatitsalakana. (Masal. 118:6, 7) Kusiyapo pyenepi, anthu angatipumpha, tisafunika kuatawira mwakukhurudzika na mwacilemedzo. (1 Ped. 3:15) Pontho, ife nkhabe funika kucita cinthu cakuti cinafudza uxamwali wathu na Babathu waufuni.

14-15. (a) Ninji pinacitika tingakhala akutsukwala? (b) Mwakubverana na Izaiya 53:7, 10, thangwi yanji tinakwanisa kulonga kuti Yezu ndi citsandzo cadidi cakucepeseka ngakhale m’midzidzi yakunentsa?

¹⁴ Tingatsukwala: Tonsene tisatsukwala thangwi ya pinthu pyakusiyana-siyana. Panango tinatsukwala tingafuna kulemba porova kuxikola peno tingafuna kucita basa inango. Peno tisatsukwala tinganyerezera mitombwe idapaswa ife na dotoro thangwi ya utenda uli na ife. M’midzidzi ninga ineyi, pisakhala pyakunentsa kakamwe toera kukhala akucepeseka. Ife tinakwanisa kuipirwa na pinthu pyakuti kale tikhakomerwa napyo. Pyenepi pinaticitisa kulonga munjira yakukhonda thema peno mwaukali. Khala mwatoma kale kutsukwala thangwi ya pinthu pinacitika, citsandzo ca Yezu cinakwanisa kukuphedzani.

¹⁵ M’miyezi yakumalisa ya umaso wace pa dziko yapantsi, Yezu atsukwala thangwi ya pinthu pizinji. Iye akhadziwa kuti mbadaoneswa nyatwa zizinji mpaka kuphiwa. (Juw. 3:14, 15; Agal. 3:13) Mbadzati kufa, Yezu alonga kuti atsukwala kakamwe. (Luka 12:50) Ntsiku zingasi Yezu mbadzati kufa, iye alonga: “Ndiri wakunentseka kakamwe.” Mafala adalonga Yezu mu dzidzi ukhacita iye phembero asapangiza kuti iye ndi wakucepeseka, pontho asabvera Mulungu: “Baba, ndipulumuseni pa ndzidzi uno wakunentsa! Mbwenye ndzidzi unoyu usafunika kupita na pana ine, thangwi ine ndadzera pyenepi. Baba, pasani mbiri dzina yanu.” (Juw. 12:27, 28) Pidafika ndzidzi wakuti iye aphiwe, mwacipapo Yezu aperekeka kwa anyamalwa a Mulungu mbaphiwa munjira yausumankha na yakupasa manyadzo. Mwakukhonda tsalakana pinthu pyakutsukwalisa na nyatwa zidatamba iye, Yezu akhali wakucepeseka mbacita pikhafuna Mulungu kuti apicite. Natenepa, tinakwanisa kulonga na cinyindiro consene kuti Yezu ndi citsandzo cadidi cakucepeseka ngakhale m’midzidzi yakunentsa.—Lerini Izaiya 53:7, 10.

16-17. (a) Axamwali apantima a Yezu ayesera tani kucepeseka kwace? (b) Ifembo tinatowezera tani citsandzo ca Yezu?

¹⁶ Masiku akumalisa a umaso wa Yezu pa dziko yapantsi, kucepeseka kwace kwayeserwa na axamwali ace apantima. Iye akhali wakutsukwala kakamwe ntsiku ineyi namasiku. Kodi iye apitiriza kukhala wakukhulupirika mpaka kufa? Mbadakhonda kukhala wakukhulupirika, nee m’bodzi mbadakhala na cidikhiro cakukhala na umaso. (Aroma 5:18, 19) Kusiyapo pyenepi, cinthu cakufunika kakamwe ndi cakuti pikhafuna kucita iye mbipidapswipisa peno kucenesa dzina ya Babace. (Yobe 2:4) Natenepa, mu ndzidzi ukhadya iye na apostolo ace, iwo akhaketesana “kuti mbani akhali nkulu kakamwe pakati pawo.” Yezu akhadasandika kazinji kene axamwali ace thangwi ya nkhani ineyi, kuphatanizambo namasiku anewa. Ngakhale tenepo, Yezu nee aipirwa. M’mbuto mwace, iye aatawira mwakukhurudzika. Mwaufuni, Yezu apanga anyakupfundzace pikhafunika iwo kucita. Buluka penepo, iye aasimba thangwi yakupitiriza kukhala akukhulupirika kuna iye.—Luka 22:24-28; Juw. 13:1-5, 12-15.

¹⁷ Mbipidakucitikirani pinthu ninga pyenepi, kodi imwe mbumudacitanji? Ife tisafunika kutowezera citsandzo ca Yezu cakukhala akukhurudzika maseze tikuthimbana na makhaliro akunentsa. Pontho tisafunika kubvera ntemo udalonga Yahova ‘wakupitiriza kupirirana unango na ndzace.’ (Akol. 3:13) M’midzidzi inango pinanentsa kucita pyenepi, mbwenye kumbukani kuti ife tonsene tisalonga peno kucita pinthu pyakuti pisatsukwalisa anango. (Mis. 12:18; Tiya. 3:2, 5) Pontho ndzidzi onsene tisafunika kuwangisira toera kusimba anango angacita pinthu pyadidi.—Aef. 4:29.

18. Yahova asaphedza tani anthu akucepeseka toera kucita pisankhulo pyadidi, pontho iwo asafunika kucitanji?

¹⁸ Tingakhala akucepeseka tinacita pisankhulo pyadidi. Tingakhala anthu akucepeseka, Yahova anatiphedza tingafuna kucita pisankhulo pyakufunika kakamwe mu umaso. Iye apikira kuti anabvesera ‘maphembero a anthu akucepeseka.’ (Masal. 10:17) Yahova anacita pizinji kupiringana kubvesera basi ene maphembero athu. Bhibhlya isalonga: ‘Iye anatsogolera anyakucepeseka, mbaapfundzisa njira zace.’ (Masal. 25:9) Yahova asaphatisira Bhibhlya, mabukhu, * misonkhano na mavidhyu akukhunganywa na “m’bandazi wakukhulupirika na wandzeru” toera kutitsogolera. (Mat. 24:45-47) Mbwenye ife tisafunika kucita khundu yathu, tisafunika kukhala akucepeseka toera kutawira ciphedzo ca Yahova, mbatipfundza kubulukira mu pinthu pinatipasa iye na kuphatisira pyonsene pinapfundza ife.

19-21. Ndi madawo api adacita Mose ku Kadhesi, pontho citsandzo cace cisatipfundzisanji?

¹⁹ Tingakhala akucepeseka tinacalira kucita madodo. Nyerezerani pontho thangwi ya Mose. Mu pyaka pizinji iye akhali wakucepeseka mbakomeresa Yahova. Buluka penepo, kunkhomo kwa pyaka 40 n’thando, Mose asiya kukhala wakucepeseka. M’bale wace wankazi, ule adam’phedza toera apulumuke ku Ejito, akhadamala kwene kulowa mbaikhwa ku Kadhesi. Aizraeli akhadungunya pontho kuti nee akhatsalakanwa mwadidi. Mu ndzidzi unoyu iwo ‘akhaketesana na Mose’ thangwi yakusowa madzi. Maseze Yahova aphatisira Mose toera kucita pirengo pizinji, pontho Mose akhawangisira toera kutsogolera mwadidi mbumba, mbwenye iyo ikhapitiriza kudungunya, tayu basi thangwi yakusowa madzi, mbwenye thangwi ya Mose ene.—Num. 20:1-5, 9-11.

²⁰ Natenepa, Mose aipirwa kakamwe mbasiya kukhala munthu wakucepeseka. Mbuto mwakupangiza cikhulupiro mbalonga kuna mwala, ninga mudapangirwa iye na Yahova, Mose alonga mwakuipirwa kuna mbumba mbapasika mbiri thangwi ya cirengo cikhafuna kucita iye. Buluka penepo, amenya mwala kawiri mbabuluka madzi mazinji. Kuipirwa na kudzikuza pyacitisa Mose kucita madawo makulu. (Masal. 106:32, 33) Kudzikuza kwancitisa kuti akhonde kupita mu Dziko Yakupikirwa.—Num. 20:12.

²¹ Pidacitikira Mose pisatipfundzisa pinthu pizinji. Cakutoma, ndzidzi onsene tisafunika kuwangisira toera tikhale anthu akucepeseka. Tingasiya kukhala akucepeseka, tinakhala akudzikuza mbatilonga peno kucita pinthu pyakuti mangwana tinatsumbikika napyo. Caciwiri, pinthu pyakuipa pingatitsukwalisa tisafunika kuwangisira toera tipitirize kukhala akucepeseka.

22-23. (a) Thangwi yanji tisafunika kuwangisira toera kukhala akucepeseka? (b) Kodi mafala anagumanika pa Sofoniya 2:3 asapangizanji?

²² Tingakhala akucepeseka tinatsidzikizwa. Thimize pano, Yahova anadzafudza anthu onsene anacita pinthu pyakuipa pa dziko yapantsi, mbasiya basi ene anthu akukhurudzika. Buluka penepo, dziko yonsene yapantsi inadzakhala na ntendere wandimomwene. (Masal. 37:10) Kodi imwe munadzakhala m’bodzi wa anyakukhurudzika? Inde, imwe munakhala m’bodzi wa iwo mungatawira phembo ya Yahova idalemba mprofeta Sofoniya.—Lerini Sofoniya 2:3, Tradução do Novo Mundo da Bíblia Sagrada.

²³ Thangwi yanji lemba ya Sofoniya 2:3 yaphatisira mafala akuti ‘panango munadzapulumuswaʼ? Mafala anewa nee asapangiza kuti Yahova nkhabe mphambvu yakutsidzikiza ale anacita pinafuna iye, thangwi iye asaafuna. M’mbuto mwace, vesi ineyi isapangiza kuti kupulumuswa kusanyindira pire pinacita ife. Natenepa, tingafuna kupulumuswa ‘pa ntsiku yakuipirwa kwa Yahova’ mbatikhala na umaso wakwenda na kwenda ntsogolo, ndzidzi onsene tisafunika kucita pinafuna Yahova mbitikhala akucepeseka.