Kodi imwe mwaleri mwacidikhodikho misolo iyi ya Ncenjezi? Khala mwaileri, onani khala munakwanisa kutawira mibvundzo inatowera:

Lemba ya Tiyago 5:11 isapangiza tani kuti Yahova ndi “wakukoma ntima kakamwe” na “wantsisi”?

Ife tisadziwa kuti thangwi ya ntsisi zace, Yahova ali dzololo toera kulekerera madodo athu. Lemba ya Tiyago 5:11 isatipasambo cinyindiro cakuti Yahova ali dzololo toera kutiphedza. Natenepa, tendeni ticite pyonsene pinakwanisa ife toera kuntowezera.—Ncenjezi 01/21, tsa. 21.

Thangwi yanji Yahova apasa anango basa yakutsogolera?

Iye acita pyenepi thangwi ya ufuni. Basa yakutsogolera isacitisa kuti pinthu pyonsene pifambe mwantendere na munjira yadidi kuna atumiki onsene a Yahova. M’bodzi na m’bodzi pa banja wakuti asaphedzera masasanyiro akutsogolera, asadziwa kuti mbani ali na basa yakucita pisankhulo pyakumalisa, pontho mbani anatsogolera.—Ncenjezi 02/21, tsa. 3.

Thangwi yanji Akristu asafunika kucita mphole-mphole pakuphatisira maaplikativo akutumiza peno akutambira mphangwa?

Khala munthu asafuna kuphatisira maaplikativo anewa, asafunika kusankhula mwadidi anthu anacedza na iye. Mbwenye pyenepi pinakhala pyakunentsa khala mu nsoka musagumanika anthu azinji kakamwe. (1 Tim. 5:13) Kusiyapo pyenepi, pana ngozwi yakumwaza mphangwa zauthambi, pontho yakuphatisira numero za abale toera kucita malonda.—Ncenjezi 03/21, tsa. 31.

Thangwi yanji Mulungu atawirisa kuti Yezu athabuswe na kuphiwa?

Thangwi yakutoma ndi yakuti Yezu akhomerwa pa muti toera kupulumusa Ayuda akuti akhadapaswa dzedze. (Agal. 3:10, 13) Thangwi yaciwiri ndi yakuti Yahova akhakhunganya Yezu toera kutumikira ninga Nyantsembe Wankulu. Thangwi yacitatu ndi yakuti kukhulupirika kwa Yezu mpaka kufa, kwapangiza kuti anthu anakwanisa kukhala akukhulupirika ngakhale kuti athimbane na mayesero makulu. (Yobe 1:9-11)—Ncenjezi 04/21, tsa. 16-17.

Munacitanji khala ndi pyakunentsa kugumana anthu mu utumiki?

Yeserani kuasaka mu ndzidzi wakuti anthu azinji asagumanika panyumba. Pontho yeserani kumwaza mphangwa m’mbuto zakusiyana. Kusiyapo pyenepi yeserani njira zakusiyana-siyana toera kumwaza mphangwa, ninga kulemba matsamba.—Ncenjezi 05/21, tsa. 15-16.

Paulu akhafuna kulonganji pidalonga iye mafala akuti: ‘Thangwi ya mwambo, ine ndafa kuna mwambo’? (Agal. 2:19)

Mwambo wa Mose wapangiza pakweca kuti anthu ndi akusowa ungwiro, pontho watsogolera Aizraeli kuna Kristu. (Agal. 3:19, 24) Pyenepi pyacitisa Paulu kutawira Kristu. Pidacita iye pyenepi, Paulu ‘afa kuna mwambo’; natenepa iye nee akhatongwabve na mwambo.—Ncenjezi 06/21, tsa. 31.

Yahova asapangiza tani kuti ndi wakupirira kakamwe?

Yahova asapirira kupswipiswa kwa dzina yace, kuidiwa kwa utongi wace, anace anango ansandukira, uthambi unamwaza Sathani, kuthabuka kwa atumiki ace, kutsuwa axamwali ace adafa, kuthabuswa kwa anthu na kufudzwa kwa pinthu pidacita iye.—Ncenjezi 07/21, tsa. 9-12.

Tinapfundzanji na kupirira kwa Zuze?

Zuze apirira mu ndzidzi ukhatsalakanwa iye mwakuipa na abale ace. Pontho iye apambizirwa mbaikhwa nkaidi mu pyaka pizinji ku Ejitu.—Ncenjezi 08/21, tsa. 12.

Ndi citeketeke cipi cakuphiphirisa cinalongwa pa Ageu 2:6-9, 20-22?

Anthu asakhonda mphangwa za Umambo zinamwaza ife, mbwenye azinji asatawira undimomwene. Mwakukhonda dembuka madzindza anadzatekenyeswa mu ndzidzi unafuna iwo kufudzwa.—Ncenjezi 09/21, tsa. 15-19.

Thangwi yanji nee tisafunika kusiya basa yathu yakumwaza mphangwa?

Yahova asaona kuwangisira kwathu, pontho iye asakomerwa na pyenepi. Ife tingakhonda kubwerera nduli peno kuneta, tinadzatambira umaso wakukhonda mala.—Ncenjezi 10/21, tsa. 25-26.

Kodi lemba ya Levitiko kapitulu 19, inatiphedza tani toera kuphatisira uphungu wakuti: “Khalani akucena m’makhaliro anu onsene”? (1 Ped. 1:15)

Pisaoneka kuti vesi ineyi yabuluswa pa Levitiko 19:2. Kapitulu ineyi isapangiza kuti tinaphatisira tani mu umaso wathu uphungu unagumanika pa 1 Pedhru 1:15.—Ncenjezi 12/21, tsa. 3-4.