Kodi imwe mwaleri mwacidikhodikho misolo iyi ya Ncenjezi? Khala mwaileri, onani khala munakwanisa kutawira mibvundzo inatowera:

Kodi kukhala na ndzidzi wakucita phembero, kupfundza Bhibhlya na kunyerezera mwadidi pinapfundza ife kunatiphedza tani?

Ife tinakwanisa kucita pisankhulo pyadidi kakamwe, tinakhala apfundzisi adidi kakamwe, tinakhala na cikhulupiro cakuwanga, pontho tinafuna kakamwe Yahova.​—⁠Ncenjezi 01.22, tsa. 30-31.

Tinaphedzeka tani tinganyindira Yahova na anthu anaphatisira iye toera kutitsogolera?

Uno ndi ndzidzi wakupfundza kunyindira njira inacita Mulungu pinthu mbatikhonda kupenula pitsogolero pinatipasa akulu a mpingo na pisankhulo pinacita iwo. Thangwi nyatwa ikulu ingatoma, pinadzakhala pyakukhonda nentsa kuna ife toera kubvera pitsogolero pyakuti panango pinadzaoneka ninga pyakusowa basa.​—Ncenjezi 02.22, tsa. 4-6.

Kodi anju akhafuna kulonganji pidapanga iye Zakariya thangwi ya ‘nkhambala yakundendemeza nayo m’manja mwa Ntongi Zorobhabhele’? (Zak. 4:8-10)

Masomphenya anewa apasa cinyindiro mbumba ya Mulungu cakuti maseze templo ikhamanga iwo nee ikhali yakubalika ninga yakutoma, iyo mbidamaliswa kumangwa mbikhala ninga mukhafunira Yahova.​—Ncenjezi 03.22, tsa. 16-17.

Tinakhala tani ‘citsandzo cadidi pakulonga’? (1 Tim. 4:⁠12)

Ife tisafunika kulonga mwakukhurudzika na mwacilemedzo mu utumiki wathu, kuimba na ntima onsene, kutawira ndzidzi onsene pa misonkhano, kulonga undimomwene, kulonga mafala akuwangisa anango na kucalira kulonga mafala akudzidzida.​—Ncenjezi 04.22, tsa. 6-9.

Thangwi yanji maonekero a pikala pinai (mautongi) pinalongwa m’bukhu ya Dhanyeli kapitulu 7 ndi sawasawa na cikala cibodzi cinalongwa pa Apokalipse 13:1, 2?

Cikala cinalongwa pa Apokalipse kapitulu 13 nee cisaimirira basi ene utongi ubodzi, ninga Roma. Mbwenye cisaimirira mautongi onsene a anthu, akuti asatonga anthu kutomera kale.​—Ncenjezi 05.22 tsa. 9.

Tinapangiza tani kuti tisanyindira ulungamiwa Yahova?

Munthu unango angatitsukwalisa peno kutidawira, ife tisafunika kuwangisira toera tikhonde kukoya kuipirwa muntima mbatisiya pyonsene m’manja mwa Yahova. Iye anadzama­lisa nyatwa zonsene zinaoneka thangwi ya madawo.​—Ncenjezi 06.22, tsa. 10-11.

M’bale ali na mwai wakucita phembero pa misonkhano ya mpingo asafunika kukumbukanji?

Phembero nee isafunika kuphatisirwa toera kupereka uphungu kuna abale na alongo mu mpingo peno toera kucita ­pidziwiso. M’bale ali na mwai unoyu nee asafunika kulonga “mafala mazinji,” makamaka khala ndi phembero toera ­kutoma misonkhano. (Mat. 6:7)​—Ncenjezi 07.22, tsa. 24-25.

Kodi mafala akuti “ale adacita pinthu pyakuipa anadzalamuka toera kutongwa” asabvekanji? (Juwau 5:29)

Iwo nee anadzatongwa mwakubverana na pinthu pidacita iwo mbadzati kufa. Iwo anadzaoniwa makhaliro awo khala athema kupitiriza na umaso peno nkhabe pakumala kulamuswa muli akufa.​—Ncenjezi 09.22, tsa. 18.

Ndi mafala api akutsandzayisa adalonga m’bale J. F. Rutherford pa nsonkhano wa gawo udacitwa mwezi wa Setembro mu caka ca 1922?

Pa nsonkhano wa gawo udacitwa ku Cedar Point, Ohio, Estados Unidos, iye alonga: “Dziwani kuti Mambo ali kutonga, pontho imwe muli na basa yakupanga anthu thangwi ya Umambo wace. Natenepa dziwisani, dziwisani, dziwisani Mambo na Umambo wace!”​​—Ncenjezi 10.22, tsa. 3-5.

Ndi njira zipi zitatu zinalongwa pa Izaiya kapitulu 30 zakuti Mulungu asaziphatisira toera kutiphedza kupirira nyatwa?

Kapitulu ineyi isapangiza kuti Yahova (1) asabvesera na kutawira maphembero athu, (2) asatipasa pitsogolero, pontho (3) asatipasa nkhombo cincino na ntsogolo.​—Ncenjezi 11.22, tsa. 9.

Thangwi yanji tinakwanisa kulonga kuti mafala anagumanika pa Masalmo 37:10, 11, 29 akwanirisika kale, pontho anadzakwanirisika ntsogolo?

Dhavidhi alonga mafala anewa thangwi ya pinthu pikhafuna kucitika kuna Aizraeli mu ndzidzi ukhatonga Salomoni. Yezu alonga pya paraizu inafuna kuoneka ntsogolo, pontho aphatisira mafala anagumanika pa vesi 11. (Mat. 5:5; Luka 23: 43)​—Ncenjezi 12.22, tsa. 8-10, 14.