NAKUTI umaso ndi wakunentsa kakamwe ‘ntsiku zino zakumalisa,’ tisafunika kukhala akupirira kakamwe. (2 Timoti 3:1-5) Anthu azinji nee ndi akupirira. Iwo ndi aumbirimi, asakomerwa na kuketesana, pontho nee ndi akudzitonga. Natenepa tisafunika kubvundzika: ‘Ndine wakukhonda kupirira ninga anthu azinji? Kodi pisabvekanji kukhala wakupirira? Ndisafunika kucitanji toera kukhala wakupirira?’

Kodi fala yakuti ‘kupirira’ inagumanika m’Bhibhlya isabvekanji? Isabveka pizinji kupiringana kuthimbana na nyatwa. Munthu wakupirira asakhala na cidikhiro, pyenepi pisabveka kuti iye asadikhira kuti pinthu pinadzakhala mwadidi. Iye nee asanyerezera pya iye basi, mbwenye asatsakalana mabvero a anthu anango, kuphatanizambo ale akuti panango anantsukwalisa peno kuntsalakana mwakuipa. Iye asapitiriza kudikhira kuti uxamwali wace na anthu anewa unadzakhala mwadidi. Nee ndi pyakudzumatirisa pinalonga Bhibhlya kuti kupirira kusabulukira mu ufuni. * (Onani cidzindikiro capantsi.) (1 Akorinto 13:4) Kupirira kusacitambo khundu ya ‘misapo ya nzimu.’ (Agalata 5:22, 23) Mphapo tisafunika kucitanji toera tikhale akupirira?

Toera kukhala akupirira tisafunika kuphemba ciphedzo ca nzimu wakucena wa Yahova, unapereka iye kuna ale anan’nyindira. (Luka 11:13) Nzimu unoyu ndi wamphambvu kakamwe, mbwenye tisafunika kupitiriza kucita pinthu mwakubverana na maphembero athu. (Masalmo 86:10, 11) Pyenepi pisabveka kuti tisafunika kuwangisira toera kukhala akupirira ntsiku zonsene mbitidziwika na n’khaliro unoyu. Mbwenye midzidzi inango tinadodoma. Mphapo ninji cinafuna kutiphedza?

Tisafunika kupfundza na kutowezera citsandzo cadidi ca Yezu. Pidalonga mpostolo Paulu thangwi ya ‘umunthu upswa,’ wakuti usaphataniza kupirira, iye atikulumiza: ‘Ntendere wa Kristu utonge mitima yanu.’ (Akolose 3:10, 12, 15) Toera kucita pyenepi, tisafunika kutowezera citsandzo ca Yezu mbatinyindira kuti Mulungu anadzasasanyira pinthu pa ndzidzi wakuthema. Tingacita pyenepi, nee tinasiya kukhala akupirira, mwakukhonda tsalakana pinaticitikira.—Jwau 14:27; 16:33.

Tonsene tisafuna kuti dziko ipswa ibwere mwakucimbiza. Mbwenye tinakhala akupirira kakamwe tinganyerezera kupirira kudapangiza Yahova kuna ife. Bhibhlya isatipanga: ‘Yahova nee akudembuka toera kucita pidapikira iye, ninga munanyerezera anthu anango kuti iye akudembuka; mbwenye iye asapangiza kupirira kuna imwe, thangwi iye nee asafuna kuti anthu afudzwe, mbwenye asafuna kuti anthu onsene atcunyuke.’ (2 Pedro 3:9) Tinganyerezera njira inapirira Yahova, tinakhalambo akupirira anango. (Aroma 2:4) Ndi m’makhaliro api akuti tisafunika kukhala akupirira?

Ntsiku zonsene pali na makhaliro mazinji akuti tisafunika kupirira. Mwacitsandzo, pisaphemba kupirira toera kukhonda kudzudzumisa anango khala tiri na cinthu toera kulonga. (Tyago 1:19) Tisafunikambo kupirira khala munthu unango atitsukwalisa. M’mbuto mwakutawira mwaukali, mphyadidi kukumbuka njira inatsalakana Yahova na Yezu madodo athu. Iwo nee asadzudzumika kakamwe na madodo mang’ono anacita ife. M’mbuto mwace, iwo asaona makhaliro adidi ali na ife, pontho mwakupirira iwo asatipasa ndzidzi toera tiwangisire.—1 Timoti 1:16; 1 Pedro 3:12.

Tisafunikambo kupirira khala munthu unango atipanga kuti pidalonga ife peno pidacita ife ndi pyakuipa. Panango pakutoma tinaipirwa mbatiyesera kutsidzikizika. Mbwenye Bhibhlya isatipanga kuti tisafunika kucalira pyenepi. Iyo isalonga: ‘Mphyadidi kupirira, m’mbuto mwakuipirwa. Leka kucimbiza na kuipirwa, thangwi kuipirwa ndi kwa anthu akusowa ndzeru.’ (Koelete 7:8, 9) Natenepa, maseze ife tapambizirwa pinthu pyakuti nee tapicita, tisafunika kupirira mbatinyerezera mwacidikhodikho mbitidzati kucita pinthu. Ndi pyenepi pidacita Yezu mu ndzidzi udapambizirwa iye mwakuipa.—Mateo 11:19.

Makamaka anyakubala asafunika kukhala akupirira angafuna kuphedza anawo thangwi ya makhaliro awo peno pifuno pyawo pyakuipa. Onani citsandzo ca Mattias anatumikira ku Bheteli ya Escandinávia. Pikhali Mattias m’phale, ndzace wakuxikola akhansingirira thangwi ya pinthu pinakhulupira iye. Pakutoma, anyakubalace nee akhadziwa pikhacitika na mwanawo. Mbwenye iwo aona kuti mwanawo akhatoma kupenula pinthu pinakhulupira iye. Gillis, babace Mattias, alonga kuti iye na nkazace akhafunika kukhala akupirira kakamwe. Mattias akhacita mibvundzo ninga iyi: “Mulungu mbani? Ndiye tani khala Bhibhlya nee ndi Mafala a Mulungu? Tinadziwa tani pinafuna Mulungu kuna ife?” Akhabvundzambo babace: “Thangwi yanji ndisafunika kutongwa khala nee ndisakhulupira pinakhulupira imwe?”

Gillis afokotoza: “Midzidzi inango mwanathu akhacita mibvundzo mwakuipirwa, tayu thangwi ya ine peno mai wace, mbwenye thangwi ya undimomwene, pontho akhapibva kuti ukunentsa  umaso wace.” Kodi Gillis aphedza tani mwanace? “Ine na mwananga tikakhala pantsi mbaticedza ndzidzi uzinji.” Kazinji kene, Gillis akhabvesera Mattias mbacita mibvundzo toera kubvesesa mabvero na maonero ace. Midzidzi inango Gillis akhafokotoza pinthu pinango kuna mwanace toera apinyerezere mu ntsiku yamumphu peno mpaka ntsiku ikhafuna iwo kucedza pontho. Midzidzi inango, Gillis alonga kuti akhafunika kumala ntsiku zingasi toera kunyerezera pidalonga mwanace. Na makani anewa, Mattias atoma kubvesesa mabvekero a ciomboli, abvesesambo kuti Yahova asatifuna, pontho kuti athema kutitonga. Babace alonga: “Pikhaphemba ndzidzi, pontho pikhali pyakunentsa, mbwenye mwapang’ono-pang’ono, atoma kufuna Yahova. Ine na nkazanga tiri akutsandzaya kakamwe thangwi kupirira kwathu toera kuphedza mwanathu mu ndzidzi ukhakula iye kwakhala na maphindu, pontho kwakhuya ntimace.”

Mu ndzidzi ukhaphedza Gillis na nkazace mwanawo, iwo akhanyindira kuti Yahova mbadaaphedza. Gillis alonga: “Kazinji kene ndikhapanga Mattias kuti ufuni wathu kwa iye watikulumiza kucita phembero kuna Yahova toera am’phedze kubvesesa pinthu.” Anyakubala anewa ali akutsandzaya kakamwe thangwi akhali akupirira mbakhonda kubwerera nduli!

Tisafunikambo kukhala akupirira khala tikutsalakana m’bodzi wa acibale athu peno xamwali wathu wakuti akuduwala mu ndzidzi uzinji. Onani citsandzo ca Ellen * (onani cidzindikiro capantsi), anakhala ku Escandinávia.

Mu pyaka pisere, mamuna wa Ellen akhali na utenda wa derrame udaphekesa ongo wace. Na thangwi ineyi, iye nkhabe kwanisabve kutsandzaya, kutsukwala peno kubva ntsisi. Pyenepi ndi pyakunentsa kakamwe kuna Ellen. Iye alonga: “Pisaphemba kukhala wakupirira kakamwe na kucita maphembero mazinji.” Iye athimiza: “Lemba inandikomera na kundiwangisa kakamwe ndi Afilipi 4:13, inalonga: ‘Mu pinthu pyonsene, ine ndisakwanisa kukhala na mphambvu thangwi ya ule anandipasa mphambvu.’” Na ciphedzo ca Yahova, Ellen asakwanisa kuthimbana na makhaliro anewa mwakupirira.—Masalmo 62:5, 6.

Mwandimomwene, anapangiza citsandzo cadidi kakamwe cakupirira ndi Yahova. (2 Pedro 3:15) M’Bhibhlya, kazinji kene tisaleri pya kupirira kukulu kwa Yahova. (Nehemiya 9:30; Izaiya 30:18) Kodi musakumbuka kuti Yahova atawira tani pidacita Abhrahamu mibvundzo mizinji pikhafuna Iye kufudza Sodhoma? Yahova nee agwandira mafala Abhrahamu. Mwakupirira iye atawira mibvundzo yonsene ya Abhrahamu. Buluka penepo, Yahova apangiza kuti iye abvesera pidalonga Abhrahamu mbampasa cinyindiro cakuti nee anadzafudza nzinda wa Sodhoma ngakhale mugumanike anthu khumi akulungama. (Genesi 18:22-33) Ndzidzi onsene Yahova akhabvesera mwakupirira, pontho iye nee aipirwa!

Kupirira kusaphedza kakamwe toera kukhala na umunthu upswa wakuti Akristu onsene asafunika kukhala nawo. Tingacita pyonsene pinakwanisa ife mbatikhala akupirira, tisalemedza Babathu wakupirira na wacitsalakano, Yahova, pontho tinakhala pakati pa ‘ale akuti kubulukira mu cikhulupiro na kupirira, asatambira pinthu pidapikirwa.’—Ahebere 6:10-12.