1. Anango asapibva tani thangwi yakumwazira mphangwa anthu anango? (Onanimbo foto.)

 UFUNI wathu kuna Yahova ndiyo unaticitisa kumwaza mphangwa kuna anthu na kuaphedza toera andziwe. Amwazi mphangwa azinji asakomerwa na kumwaza mphangwa, mbwenye anango asanentseka kakamwe toera kucita basa ineyi. Thangwi yanji? Anango ndi amanyadzo kakamwe, pontho asanyerezera kuti nee anakwanisa kumwaza mphangwa. Anango nee asakhala akusudzuka toera kuenda panyumba pa munthu mwakukhonda kucemerwa, peno asanyerezera kuti anthu anaipirwa na iwo, pontho nee asafuna kuadzudzumisa. Maseze abale na alongo anewa asafuna kakamwe Yahova, pisakhala pyakunentsa kuna iwo kufendezera anthu akuti nee asaadziwa toera kuapanga mphangwa zadidi. Ngakhale tenepo, iwo asadziwa kuti basa yakumwaza mphangwa ndi yakufunika kakamwe, pontho asawangisira toera kuicita. Mwakukhonda penula, Yahova asatsandzaya kakamwe na kuwangisira kunacita ife!

2. Thangwi yanji nee musafunika kutsukwala khala musanentseka toera kutsandzaya m’basa yakumwaza mphangwa?

² Kodi midzidzi inango imwe musanentsekambo toera kutsandzaya m’basa yakumwaza mphangwa? Pyenepi pingacitika, lekani kutsukwala. Panango pyenepi pisapangiza kuti ndimwe wakucepeseka, nee musafuna kupasika mbiri, pontho nee musafuna kulongezana na munthu. Ndimomwene kuti nkhabepo munthu anakomerwa kutsalakanwa mwakuipa, makamaka khala ali kuyesera kucita pinthu pyadidi kuna anango. Mbwenye munakwanisa kukhala na cinyindiro cakuti Babanu wakudzulu asadziwa kuti kumwaza mphangwa ndi kwakunentsa, pontho asafuna kukuphedzani. (Iza. 41:13) Mu nsolo uno, tinaona pinthu  pixanu pyakuti pinatiphedza toera kudziwa kuti tinakunda tani mabvero anewa na kukhala akutsandzaya m’basa yakumwaza mphangwa.

WANGISWANI NA MAFALA A MULUNGU

3. Ninji cidaphedza Yeremiya toera kumwaza mphangwa?

³ Kutomera mu ndzidzi wakale, mafala a Mulungu awangisa atumiki ace pikhali iwo na basa yakunentsa toera kuicita. Onani citsandzo ca mprofeta Yeremiya. Iye akhali wakudzudzumika pidapaswa iye basa yakumwaza mphangwa na Yahova. Yeremiya alonga: “Ine nkhabe kwanisa kulonga, thangwi ndine m’phale.” (Yer. 1:6) Ninji pidaphedza Yeremiya toera akhale na cipapo cakumwaza mphangwa? Mafala adampanga Yahova amuwangisa. Iye alonga: “Mafalace adzakhala ninga moto wakugaka muntima mwanga, udafungirwa m’magogodo anga. Ine ndikhadaneta na kuupirira; nee ndikhakwanisabve kumatama.” (Yer. 20:8, 9) Maseze Yeremiya akhamwaza mphangwa mu cisa cakunentsa, mphangwa zidatambira iye toera kuzimwaza zampasa cipapo cikhafuna iye toera kucita basace.

4. Ninji pinacitika tingaleri Bhibhlya na kunyerezera mwadidi pinaleri ife? (Akolose 1:9, 10)

⁴ Lero, Akristu asawangiswambo na Mafala a Mulungu. Pidalemba mpostolo Paulu tsamba kuna Akristu a ku Kolose, iye apanga abale kuti kupitiriza kupfundza pya cifuno ca Yahova mbukudaaphedza ‘toera afambe mwakuthema ninga munafunira Yahova’ na “kubala misapo m’mabasa adidi onsene.” (Lerini Akolose 1:9, 10.) Ibodzi mwa mabasa anewa adidi ndi basa yakumwaza mphangwa. Natenepa, tingaleri Bhibhlya na kunyerezera mwadidi pinaleri ife, cikhulupiro cathu kuna Yahova cisakhala cakuwanga kakamwe, pontho tisabvesesa kuti thangwi yanji ndi pyakufunika kakamwe kumwaza mphangwa zadidi za Umambo.

5. Munaphedzeka tani mu ndzidzi unaleri imwe na kupfundza Bhibhlya?

⁵ Toera kuphedzeka mwadidi na Mafala a Mulungu, mu ndzidzi unaleri imwe, kupfundza na kunyerezera mwadidi, lekani kuthamanga. Lekani kupfundza Bhibhlya mwakuthamanga. Mungaleri vesi ya Bhibhlya mbamukhonda kuibvesesa mwadidi, lekani kuinumpha. M’mbuto mwace, phatisirani Índice das Publicações da Torre de Vigia peno Bukhu Inaphatisira Mboni za Yahova Pakufufudza toera kugumana mphangwa zinafokotoza vesi ineyi. Mungakhala na ndzidzi wakupfundza mwakupfulika, imwe munawangisa cinyindiro canu cakuti pinalonga Bhibhlya ndi pyandimomwene. (1 Ates. 5:21) Cinyindiro ceneci cingakhala cakuwanga,  munakhalambo akutsandzaya kakamwe pa kupanga anango pinapfundza imwe.

KHUNGANYIKANI MWADIDI

6. Thangwi yanji tisafunika kukhunganyika mwadidi toera kumwaza mphangwa?

⁶ Mungakhunganyika mwadidi mbamudzati kuenda kamwaza mphangwa, pinakhala pyakukhonda nentsa kucedza na anthu. Yezu akhunganya anyakupfundza ace mbadzati kuatuma toera kamwaza mphangwa. (Luka 10:1-11) Pontho iwo aphatisira pidapfundziswa iwo na Yezu. Na thangwi ineyi, iwo atsandzaya kakamwe na pyonsene pidakwanisa iwo kucita.—Luka 10:17.

7. Tinakhunganyika tani toera kumwaza mphangwa? (Onanimbo foto.)

⁷ Tinakhunganyika tani toera kumwaza mphangwa? Tisafunika kunyerezera mwadidi njira inafuna ife kufokotoza undimomwene wa Bhibhlya. Pontho tisafunika kunyerezera pinthu pinalonga anthu mucisa cathu mbatidziwa kuti tinaatawira tani. Natenepa pakucedza na munthu, ife tinakwanisa kukhala akusudzuka, kuseka na kukhala auxamwali.

8. Ndi munjira ipi Akristu ndi ninga pyombo pya dongo pidalonga mpostolo Paulu?

⁸ Mpostolo Paulu alonga: “Ife tiri na mpfuma iyi mu pyombo pya dongo.” (2 Akor. 4:7) Mphapo ndi ipi mpfuma ineyi? Ndi basa yakumwaza mphangwa za Umambo wa Mulungu zakuti zisapulumusa umaso. (2 Akor. 4:1) Pontho pyombo pya dongo ninji? Ndi atumiki a Mulungu anamwaza mphangwa zadidi kuna anango. Mu ndzidzi wa Paulu, anyakucita malonda akhaphatisira pyombo pya dongo toera kukoyera pinthu pya ntengo ukulu ninga pyakudya, vinyu na dinyero. Munjira ibodzi ene, ife ndife pyombo pya dongo, pontho Yahova asatiphatisira toera kukwata mphangwa zadidi zakufunika kakamwe. Na ciphedzo ca Yahova, tiri na mphambvu inafuna ife toera kupitiriza kumwaza mphangwa zadidi mwakukhulupirika.

CITANI PHEMBERO TOERA MUKHALE NA CIPAPO

9. Munakunda tani kugopa anthu peno kugopa kuti anthu nee anafuna kubvesera mphangwa zadidi? (Onanimbo foto.)

⁹ Midzidzi inango, panango tinagopa anthu peno tinagopa kuti anthu nee anafuna kutibvesera. Mphapo tinakunda tani cinentso ceneci? Onani pidacita apostolo mu ndzidzi udapangwa iwo toera asiye kumwaza mphangwa. Pakutoma iwo acita phembero. M’mbuto mwakukundwa na kugopa, iwo aphemba ciphedzo ca  Yahova toera ‘apitirize kulonga mafalace na cipapo consene.’ Pontho Yahova atawira mwakucimbiza phembero ineyi. (Mabasa 4:18, 29, 31) Khala kugopa anthu kusakudzudzumisani m’basa yakumwaza mphangwa, phembani ciphedzo ca Yahova. Phembani Yahova kuti athimizire ufuni wanu kuna anthu toera mukhonde kugopa kuamwazira mphangwa zadidi.

10. Yahova asatiphedza tani toera kukhala Mboni zace? (Izaiya 43:10-12)

¹⁰ Yahova atisankhula toera kukhala Mboni zace, pontho iye apikira kuti anatiphedza toera kukhala na cipapo. (Lerini Izaiya 43:10-12.) Tendeni tione njira zinai zinaphatisira iye toera kutiphedza. Yakutoma, Yezu asakhala na ife ndzidzi onsene unamwaza ife mphangwa zadidi. (Mat. 28:18-20) Yaciwiri, Yahova apasa aanju basa yakutiphedza pakumwaza mphangwa. (Apok. 14:6) Yacitatu, Yahova asatipasa nzimu wakucena toera kutiphedza kukumbuka pinthu pidapfundza ife. (Juw. 14:25, 26) Yacinai, ife tiri na ciphedzo ca abale na alongo athu pakumwaza mphangwa. Na ciphedzo ca Yahova na ca abale na alongo athu akufunika, tiri na pyonsene pinafuna ife toera kukhala acipapo mbatipitiriza kumwaza mphangwa.

MWAZANI MPHANGWA MUNJIRA ZAKUSIYANA-SIYANA, PONTHO KHALANI NA MAONERO ADIDI

11. Munakwanisa tani kugumana anthu azinji pakumwaza mphangwa? (Onanimbo foto.)

¹¹ Kodi imwe musafewa manungo mungakhonda gumana anthu panyumba? Bvundzikani: ‘Anthu a mucisa canga ali kupi mu ndzidzi uno?’ (Mabasa 16:13) ‘Kodi iwo ali kuphata basa peno aenda kagula pinthu?’ Khala ndi tenepo, kodi musaona kuti munakwanisa kugumana anthu azinji mungamwaza mphangwa m’miseu? M’bale unango anacemerwa Joshua alonga: “Ndadzindikira kuti mbuto zinaguliswa pinthu na mbuto zinakhala anthu azinji ndi zadidi kakamwe toera kumwaza mphangwa.” Iye na nkazace Bridget asagumana anthu azinji m’manyumba mwawo angaenda kamwaza mphangwa namasiku peno n’Dimingu namasikati.—Aef. 5:15, 16.

12. Tinadzindikira tani pinthu pinakhulupira munthu na pinthu pinan’dzudzumisa?

¹² Mungaona kuti munthu nee asafuna kubvesera pinthu pinalonga imwe, yeserani kudzindikira pinthu pinakhulupira iye na pinthu pinandzudzumisa. Joshua na Bridget asaphatisira mbvundzo unagumanika pa tsamba  yakutoma ya tratadho toera kutomesa makani. Mwacitsandzo, angaphatisira tratadho yakuti Kodi Bhibhlya Musaiona Tani?, iwo asalonga: “Anthu anango asanyerezera kuti Bhibhlya ndi bukhu ya Mulungu, mbwenye anango asapenula pyenepi. Ndi api maonero anu?” Kazinji kene, pyenepi pisaaphedza toera kucedza mwadidi.

13. Thangwi yanji tinakwanisa kulonga kuti basa yakumwaza mphangwa iri kufamba mwadidi maseze anthu akhonde kutibvesera? (Misangani 27:11)

¹³ Basa yathu yakumwaza mphangwa inakwanisa kufamba mwadidi maseze anthu akhonde kutibvesera. Thangwi yanji? Thangwi ife tiri kucita pinthu pinafuna Yahova na Yezu. (Mabasa 10:42) Maseze tikhonde kugumana munthu toera kucedza naye, peno anthu akhonde kubvesera mphangwa zadidi, ife tinakwanisa kukhala akutsandzaya thangwi tisadziwa kuti tiri kutsandzayisa Babathu wakudzulu.—Lerini Misangani 27:11.

14. Thangwi yanji tisatsandzaya m‘bale peno mulongo angagumana munthu anafuna kubvesera mphangwa zadidi?

¹⁴ Ife tisatsandzaya kakamwe m’bale peno mulongo angagumana munthu ali na cifuno cakubvesera m’basa yakumwaza mphangwa. Ncenjezi walandanisa basa yakumwaza mphangwa na basa yakusaka mwana adatayika. Anthu azinji asacita basa ineyi, pontho asasaka mwana m’mbuto zizinji. Buluka penepo, mwana angagumanwa, anthu onsene asatsandzaya, tayu basi ene munthu adan’gumana. Munjira ibodzi ene, tonsene tisaphedzera basa yakumwaza mphangwa mucisa ca mpingo wathu. Pontho tisatsandzaya munthu angatoma kugumanika pa misonkhano.

NYEREZERANI UFUNI WANU KUNA YAHOVA NA ANTHU

15. Kuphatisira lemba ya Mateu 22:37-39 kunatiphedza tani toera kukhala akugalamuka m’basa yakumwaza mphangwa? (Onanimbo foto.)

¹⁵ Ife tinakwanisa kukhala akugalamuka pakumwaza mphangwa tingakumbuka kuti kucita basa ineyi ndi njira yadidi yakupangiza ufuni wathu kuna Yahova na anthu. (Lerini Mateu 22:37-39.) Nyerezerani kutsandzaya kunakhala na Yahova angationa mbatimwaza mphangwa na kutsandzaya kunafuna kukhala na anthu angatoma kupfundza Bhibhlya. Nyerezeranimbo umaso unafuna kudzakhala na ale anatawira mwadidi mphangwa zathu.—Juw. 6:40; 1 Tim. 4:16.

16. Tinakwanisa tani kutsandzaya na basa yakumwaza mphangwa maseze ticimwane kubuluka panyumba? Perekani pitsandzo.

 ¹⁶ Ndiye tani khala imwe nee munakwanisa kubuluka panyumba? Pyenepi pingakucitikirani, nyerezerani pinthu pyakuti munakwanisa kupicita toera kupangiza ufuni wanu kuna Yahova na anthu. Mu ndzidzi wa utenda wa COVID-19, Samuel na nkazace Dania nee akhakwanisa kubuluka panyumba. Mu ndzidzi unoyu wakunentsa, iwo akhamwaza mphangwa na telefoni, kulemba matsamba, pontho akhacitisa mapfundziro a Bhibhlya mukuphatisira Zoom. Samuel akhakondzwa utenda wa cancro, pontho iye akhabandza mwai ndzidzi ukhali iye ku xipitari toera kumwazira mphangwa anthu. Iye alonga: “Tingathimbana na nyatwa tinakwanisa kukhala akudzudzumika na akuneta, pontho cikhulupiro cathu cinayeserwa. Na thangwi ineyi ndi pyakufunika kakamwe kukhala akutsandzaya m’basa ya Yahova.” Mu ndzidzi unoyu, Dania agwa mbacimwana kufamba miyezi mitatu. Buluka penepo, iye akhafunika kufamba na njinga ya anyakulamala miyezi mitanthatu. Iye alonga: “Ine ndayesera kucita pyonsene pikhakwanisa ine mwakubverana na makhaliro anga. Ine ndikhamwazira mphangwa enfermeira akhabwera kudzanditsalakana panyumba na ale akhabwera dzapereka pinthu. Ndikhaphatisira telefoni toera kucedza na nkazi unango akhaphata basa mu empreza inagulisa mitombwe.” Thangwi ya pinthu pikhaacitikira, Samuel na Dania nee akwanisa kucita pizinji ninga kale, mbwenye acita pidakwanisa iwo, pontho akhala akutsandzaya kakamwe.

17. Munaphedzeka tani na pinthu pidapfundza ife mu nsolo uno?

¹⁷ Yeserani kuphatisira pinthu pixanu pidalongwa mu nsolo uno. Pinthu pyenepi pyonsene ndi ninga pinthu pinaikhwa n’cakudya peno matempero. Tingaikha matempero onsene, cakudya cisakoma kakamwe. Natenepa tingaphatisira pinthu pyenepi pixanu, tinakhala akukhunganyika toera kukunda mabvero akuipa mbatikhala akutsandzaya m’basa yakumwaza mphangwa.