1-2. Kodi Zadhoke akhali ani? (1 Kronika 12:22, 26-28)

 NYEREZERANI mwinji wa amuna akupiringana 340.000. Iwo agumanyikana toera kukhazikisa Dhavidhi ninga mambo wa Izraeli. Mwinji unoyu wakhala ntsiku zitatu ku mapiri dhuzi na Ebhroni. Iwo akhatsandzaya kakamwe, akhacedza, akhaseka, pontho akhaimba nyimbo zakusimba Yahova. (1 Kro. 12:39) Pa mwinji unoyu wa anthu pakhali na m’phale akhacemerwa Zadhoke. Anthu azinji nee akhamuona, mbwenye Yahova akhamuona, pontho iye asafuna kuti ife tidziwe kuti Zadhoke akhalimbo pa mwinji unoyu. (Lerini 1 Kronika 12:22, 26-28.) Mphapo Zadhoke akhali ani?

² Zadhoke akhali nyantsembe, pontho iye akhaphata basa pabodzi na Nyantsembe Wankulu Abhiyatari. Yahova apasa Zadhoke udziwisi kakamwe na maluso akubvesesa cifuno cace. (2 Sam. 15:27) Anthu angafuna kupaswa uphungu, iwo akhaenda kuna Zadhoke. Mbwenye Zadhoke akhalimbo mamuna wacipapo. Mu nsolo uno, tinapfundza kuti Zadhoke apangiza tani cipapo.

3. (a) Thangwi yanji tisafunika kukhala acipapo? (b) Tinapfundzanji mu nsolo uno?

³ Mu ntsiku zino zakumalisa, Sathani asacita pyonsene pinakwanisa iye toera kupomokera atumiki a Yahova. (1 Ped. 5:8) Mu ndzidzi unadikhira ife kuti Yahova afudze Sathani pabodzi na dziko ino yakuipa, tisafunika kukhala acipapo. (Mas. 31:24) Natenepa tendeni tione pinthu pitatu pinafunika ife kucita toera titowezere cipapo ca Zadhoke.

PHEDZERANI UMAMBO WA MULUNGU

4. Thangwi yanji atumiki a Mulungu asafunika kukhala acipapo toera kuphedzera Umambo wace? (Onanimbo foto.)

⁴ Ninga atumiki a Yahova, ife tisaphedzera Umambo wa Mulungu  na ntima onsene. Mbwenye kazinji kene tisafunika kukhala acipapo toera kucita pyenepi. (Mat. 6:33) Mwacitsandzo, mu dziko ino yakuipa, tisafunika kukhala acipapo toera kubvera Yahova na kumwaza mphangwa zadidi za Umambo. (1 Ates. 2:2) Pontho tisafunika cipapo toera tipitirize kukhonda kucita khundu ya dziko ino yakuti ndi yakugawika kakamwe thangwi ya ndale. (Juw. 18:36) Atumiki azinji a Yahova aluza pinthu pyawo pyakumanungo, atsalakanwa mwakuipa, pontho afungirwa nkaidi thangwi yakukhonda kucita khundu mu ndale za dziko na kukhonda kukhala anyankhondo.

5. Thangwi yanji Zadhoke akhafunika kukhala wacipapo toera kuphedzera Dhavidhi?

⁵ Zadhoke nee aenda ku Ebhroni basi ene toera kadya phwando mu ndzidzi udakhazikiswa Dhavidhi ninga mambo. Iye aenda ku Ebhroni wakukhunganyika toera kumenya nkhondo. (1 Kro. 12:38) Iye akhali dzololo toera kuphedzera Dhavidhi pakutsidzikiza Aizraeli kuna anyamalwa awo. Zadhoke panango nee akhali nyankhondo wa maluso kakamwe, mbwenye akhali wacipapo.

6. Cipapo cidapangiza Dhavidhi cakhala citsandzo cadidi kuna Zadhoke? (Masalmo 138:3)

⁶ Zadhoke akwanisa tani kukhala wacipapo kakamwe? Iye akhadziwa amuna azinji amphambvu na acipapo. Mwakukhonda penula, pyenepi pyamphedza toera kukhalambo wacipapo. Mwacitsandzo, Dhavidhi akhali ntsogoleri na nyankhondo wacipapo, pontho pyenepi pyacitisa Aizraeli onsene kumphedzera toera akhale mambo. (1 Kro. 11:1, 2) Ndzidzi onsene Dhavidhi akhanyindira Yahova toera amphedze pakumenyana na anyamalwa ace. (Mas. 28:7; lerini Masalmo 138:3.) Mbwenye pakhali na anthu anango akuti Zadhoke mbadakwanisa kutowezera citsandzo cawo. Amuna ninga Yeoyadha na mwanace Bhenaya akhalimbo anyankhondo, kuphatanizambo atsogoleri 22 akuti akhaphedzera Dhavidhi. (1 Kro. 11:22-25; 12:26-28) Amuna anewa onsene  akhali dzololo toera kukhazikisa Dhavidhi ninga mambo wawo na kuntsidzikiza.

7. (a) Ndi pitsandzo pipi pya cincino pinafuna kutiphedza toera tikhale acipapo? (b) Mwapfundzanji na citsandzo ca m’bale Nsilu?

⁷ Ife tinakwanisambo kukhala na cipapo tingapfundza kubulukira mu pitsandzo pya atumiki anango a Yahova akuti akhali acipapo, pontho aphedzera mwakukhulupirika Umambo wace. Mambo wathu, Yezu Kristu akhonda kucita khundu ya ndale za dziko ino ya Sathani. (Mat. 4:8-11; Juw. 6:14, 15) Ndzidzi onsene iye akhanyindira Yahova toera akhale na cipapo na mphambvu toera kucita pinthu pyadidi. Lero, ife tiri na pitsandzo pizinji pya amuna na aphale na atsikana adakhonda kucita khundu m’basa ya unyankhondo na mabasa anango a ndale za dziko. Imwe munakwanisa kuleri pitsandzo pya aphale na atsikana anewa mu jw.org. a

PHEDZANI ABALE NA ALONGO ANU

8. Ndi ndzidzi upi wakuti panango akulu a mpingo anafunika kupangiza cipapo?

⁸ Ninga atumiki a Yahova, ife tisakomerwa na kuphedzana. (2 Akor. 8:4) Mbwenye midzidzi inango tisafunika kukhala acipapo toera kucita pyenepi. Mwacitsandzo, mu ndzidzi wa nkhondo akulu a mpingo asafunika kuwangisa abale mu mpingo, kuaphedza mwauzimu, ngakhale mu pinthu pyakumanungo. Akulu a mpingo asafuna mabira a Yahova, na thangwi ineyi iwo asathimbana na pinthu pyakugopswa toera kuphedza abale na alongo. (Juw. 15:12, 13) Akulu a mpingo angacita pyenepi, ife tinakwanisa kulonga kuti iwo ali kutowezera cipapo ca Zadhoke.

9. Mwakubverana na 2 Samweli 15:27-29, Dhavidhi apanga Zadhoke toera acitenji? (Onanimbo foto.)

⁹ Umaso wa Dhavidhi ukhali pangozwi thangwi Abhisaloni akhafuna kumupha toera akhale mambo. (2 Sam. 15:12, 13) Dhavidhi akhafunika kuthawa mu Yerusalemu mwakucimbiza. Iye apanga atumiki ace: “Lamukani,  pontho tendeni tithawe, thangwi nkhabe anafuna kupulumuka m’manja mwa Abhisaloni.” (2 Sam. 15:14) Mu ndzidzi ukhathawa iwo, Dhavidhi adzindikira kuti akhafunika kusala munthu unango mu Yerusalemu toera andziwise pikhafuna kucita Abhisaloni. Na thangwi ineyi, Dhavidhi apanga Zadhoke na anyantsembe anango toera abwerere mu nzinda wa Yerusalemu. (Lerini 2 Samweli 15:27-29.) Mbwenye iwo akhafunika kucita mphole--mphole, thangwi pidaaphemba Dhavidhi toera acite pikhali pyakugopswa kakamwe. Abhisaloni akhali munthu wakuti akhacita pikhafuna iye basi, pontho akhadasandukira pai wace. Nyerezerani pinthu pikhafuna kucita Abhisaloni kuna Zadhoke na anyantsembe anango mbadadziwa kuti iwo asala mu nzinda unoyu toera kudziwisa Dhavidhi pikhafuna kucita iye.

10. Kodi Zadhoke na anango atsidzikiza tani Dhavidhi?

¹⁰ Dhavidhi aphemba Zadhoke na xamwali wace unango wakukhulupirika Uzai toera amphedze masasanyiro akhacita iye. (2 Sam. 15:32-37) Uzai akhafunika kucita pinthu mwaciphamaso toera kupangiza ninga akhaphedzera Abhisaloni mbampasa uphungu wakuti anakwanisa tani kupha Dhavidhi. Mbwenye pyenepi mbapidapasa ndzidzi Dhavidhi toera kukhunganyika. Pidabvera Abhisaloni maonero a Uzai, Uzai apanga Zadhoke na Abhiyatari pinthu pidacitika. (2 Sam. 17:8-16) Natenepa, iwo atumiza mphangwa kuna Dhavidhi mbampanga pyonsene pikhafuna kucita Abhisaloni. (2 Sam. 17:17) Na ciphedzo ca Yahova, Zadhoke na anyantsembe anango akwanisa kutsidzikiza Dhavidhi.—2 Sam. 17:21, 22.

11. Tinatowezera tani citsandzo ca Zadhoke pakuphedza abale na alongo athu?

¹¹ Khala abale na alongo mu mpingo agwerwa na nyatwa, pontho asafuna ciphedzo, tinatowezera tani citsandzo ca Zadhoke mbatikhala acipapo? (1) Bverani pitsogolero. Midzidzi ya nyatwa ndi pyakufunika kakamwe kukhala akuphatana, pontho ndi pyakufunika  kubvera pitsogolero pinabuluka ku Bheteli. (Aheb. 13:17) Akulu a mpingo asafunika kukumbuka ndzidzi onsene pitsogolero pinapaswa iwo na gulu yathu pinalonga thangwi yakufunika kwa kukhala akukhunganyika pidengwa pyacibaliro mbapidzati kucitika. (1 Akor. 14:33, 40) (2) Khalani acipapo, mbwenye citani mphole-mphole. (Mis. 22:3) Nyerezerani mwadidi mbamudzati kucita cinthu. Lekani kuikha umaso wanu pangozwi khala nee ndi pyakufunika. (3) Nyindirani Yahova. Kumbukani kuti Yahova asafuna kakamwe udidi wanu pabodzi na abale na alongo anu. Yahova anakwanisa kukuphedzani toera mukwanisembo kuphedza abale na alongo mwakutsidzikizika.

12-13. Mwapfundzanji na citsandzo ca Viktor na Vitalii? (Onanimbo foto.)

¹² Onani citsandzo ca Viktor na Vitalii, abale awiri akhaphedzera kugawira cakudya na madzi kuna abale na alongo ku Ukraniya. Viktor alonga: “Ife tikhasaka cakudya m’mbuto zizinji, pontho kazinji kene pakubwerera tikhabva kulira kwa mpfuti. M’bale m’bodzi wakuti akhali na loja yakugulisa pyakudya, apereka pyakudya toera kuphedza abale na alongo azinji mu ndzidzi ungasi. Mu ndzidzi ukhakwiza ife nkaru pyakudya pidapaswa ife na m’bale unoyu, bhomba yagwa dhuzi na ife nsindzo wa mametru 20. Ntsiku ineyi, ine ndadembetera Yahova toera andipase cipapo kuti ndipitirize kuphedza abale na alongo.”

¹³ Vitalii alonga: “Ife tikhafunika kukhala acipapo kakamwe. Ulendo wanga wakutoma ndafamba nsindzo wa maora 12. Ine ndikhacita phembero kuna Yahova ndzidzi onsene.” Vitalii apangiza cipapo, mbwenye akhacitambo mphole-mphole. Iye alonga: “Ine ndaphemba Yahova toera andipase udziwisi na kukhala wakucepeseka. Ine basi ene ndikhafamba na miseu ikhatawiriswa na atongi a dziko. Cikhulupiro canga cakhala cakuwanga kakamwe pikhaona ine njira ikhaphata basa abale pabodzi. Iwo akhatiphedza kubulusa pinthu m’miseu, kubweresa nguwo na pyakudya, pontho akhatiphedza kupikwiza nkaru yathu. Pontho iwo akhatipasa pyakudya na pakugona mu ndzidzi ukhacita ife ulendo.”

PITIRIZANI KUKHALA WAKUKHULUPIRIKA KUNA YAHOVA

14. Tisapibva tani munthu anafuna ife angasiya kutumikira Yahova?

¹⁴ Mayesero anango akunentsa kakamwe toera kuapirira ndi wacibale wathu peno xamwali wathu wapantima angasiya kutumikira Yahova. (Mas. 78:40; Mis. 24:10) Khala munthu unoyu tisanfuna kakamwe, pisakhalambo pyakunentsa kakamwe toera kupirira pyenepi pingacitika. Khala imwe muli kucitikirwa na pyenepi, citsandzo ca Zadhoke cinakuwangisani kakamwe.

15. Thangwi yanji Zadhoke akhafunika kukhala na cipapo toera apitirize kukhala wakukhulupirika kuna Yahova? (1 Amambo 1:5-8)

¹⁵ Zadhoke apitiriza kukhala wakukhulupirika mu ndzidzi udasiya Abhiyatari kukhala wakukhulupirika. Pyenepi pyacitika dhuzi na kunkhomo kwa utongi wa Dhavidhi. Pikhali Dhavidhi dhuzi na kufa, mwanace, Adhoniya ayesera kukhala mambo m’mbuto mwace, maseze Yahova akhadapikira kuti Salomoni mbadakhala mambo. (1 Kro. 22:9, 10) Abhiyatari aphedzera Adhoniya. (Lerini 1 Amambo 1:5-8.) Natenepa, Abhiyatari akhala wakukhonda kukhulupirika kuna Dhavidhi na kuna Yahova. Zadhoke atsukwala kakamwe na pyenepi. Mu pyaka pyakupiringana 40, iye na Abhiyatari aphata basa pabodzi ninga anyantsembe. (2 Sam. 8:17) Iwo athukula pabodzi “bokosi ya Mulungu wandimomwene.” (2 Sam. 15:29) Uwiri wawo aphedzera Dhavidhi ninga mambo wawo, pontho acita pinthu pizinji m’basa ya Yahova.—2 Sam. 19:11-14.

16. Ndi pinthu pipi pyakuti panango pyaphedza Zadhoke toera apitirize kukhala wakukhulupirika?

 ¹⁶ Zadhoke apitiriza kukhala wakukhulupirika kuna Yahova maseze Abhiyatari akhadasiya kukhala wakukhulupirika kuna Yahova mbasandukira mambo Dhavidhi. Ndzidzi onsene Dhavidhi akhadziwa kuti mbadakwanisa kunyindira Zadhoke. Dhavidhi pidadziwa iye kuti asandukirwa na Adhoniya, iye asankhula Zadhoke, Natani na Bhenaya toera adzodze Salomoni ninga mambo. (1 Ama. 1:32-34) Mwakukhonda penula, Zadhoke awangiswa kakamwe na citsandzo ca Natani na atumiki anango a Yahova adakhala akukhulupirika mbaphedzera mambo Dhavidhi. (1 Ama. 1:38, 39) Pidakhala Salomoni mambo, iye “akhazikisa nyantsembe Zadhoke pa mbuto ya Abhiyatari.”—1 Ama. 2:35.

17. Munatowezera tani citsandzo ca Zadhoke munthu anafuna imwe angasiya kutumikira Yahova?

¹⁷ Munatowezera tani citsandzo ca Zadhoke munthu anafuna imwe angasiya kutumikira Yahova? Pangizani kuna Yahova kuti imwe mwasankhula kukhala wakukhulupirika kuna iye. (Yos. 24:15) Yahova anakupasani cipapo toera kucita pinthu pyadidi. Citani phembero kuna iye, pontho pitirizani kucita uxamwali na anthu akukhulupirika kuna Mulungu. Yahova asakomerwa kakamwe na kukhulupirika kwanu, pontho anakupasani nkhombo thangwi ya pyenepi.—2 Sam. 22:26.

18. Mwapfundzanji na pinthu pidacitikira m’bale Marco na mulongo Sidse?

¹⁸ Onani pidacitikira m’bale Marco na nkazace Sidse. Anawo awiri asiya undimomwene. Marco alonga: “Kutomera ntsiku idabalwa ananu, imwe musaafuna kakamwe. Imwe munacita pyonsene pinakwanisa imwe toera kuatsidzikiza. Na thangwi ineyi, iwo angasiya kutumikira Yahova pisatsukwalisa kakamwe. Mbwenye Yahova ndzidzi onsene asatiphedza kupirira. Ine ndingatsukwala, nkazanga asandibalangaza, pontho iye angatsukwala, ine ndisacitambo pibodzi pyene.” Sidse alonga: “Yahova mbadakhonda kutipasa mphambvu, ife nee mbatidakwanisa kupirira pinentso pyenepi. Ine ndatsukwala kakamwe, pontho ndikhanyerezera kuti anathu asiya undimomwene thangwi ya ine, natenepa ndalonga pyenepi kuna Yahova m’phembero. Mukupita kwa ndzidzi, mulongo m’bodzi wakuti nee ndikhamuona mu pyaka pizinji abwera kacedza na ine, andiphata pa phewa, andiyang’ana mbandipanga: ‘Sidse, kumbuka kuti pidacitika nee ndi thangwi yako.’ Na ciphedzo ca Yahova, ndisapitiriza kukhala wakutsandzaya m’basa yace.”

19. Muli dzololo toera kucitanji?

¹⁹ Yahova asafuna kuti alambiri ace onsene akhale acipapo ninga Zadhoke. (2 Tim. 1:7) Mbwenye Yahova nee asafuna kuti tinyindire mphambvu zathu. Iye asafuna kuti tinyindire mphambvu zinatipasa iye. Natenepa mungathimbana na pinentso pyakuti musafunika kukhala na cipapo, phembani ciphedzo ca Yahova. Khalani na cinyindiro cakuti iye anakupasani cipapo ninga pidacita iye na Zadhoke.—1 Ped. 5:10.