Iwo asaphiphirisa anyankhondo akudzulu adacita khundu pakufudzwa kwa Yerusalemu, pontho iwo anadzacitambo khundu pakufudzwa kwa dziko ya Sathani pa Armagedhoni. Anewa ndi mabvekero mapswa. Thangwi yanji akhali akufunika?

Mbacidzati kufika caka 607 M.N.W., Yahova aonesa Ezekyele masomphenya a pinthu pikhafuna kucitika Yerusalemu mbadzati kufudzwa. M’masomphenya anewa, Ezekyele aona pinthu pizinji pyakuipa pikhacitika mu nzinda. Iye aona amuna atanthatu akuti akhali na pida. Buluka penepo iye aonambo mamuna wakuti akhadabvala ‘nguwo yakusonwa’ wakuti akhali na ‘cakulemba naco ca mulembi.’ (Ezek. 8:6-12; 9:2, 3) Mamuna unoyu apangwa toera ‘kupakasa nzinda mbalemba cidzindikiro pa nkhope za anthu anatsukwala thangwi ya pinthu pyakuipa pikhacitika mwenemo.’ Buluka penepo, amuna atanthatu akuti akhali na pida apangwa toera kupha anthu onsene adasowa cidzindikiro mu nzinda. (Ezek. 9:4-7) Kodi masomphenya anewa asatipfundzisanji, pontho mbani mamuna akhali na cakulemba naco ca mulembi?

Ezekyele aona masomphenya anewa mu caka 612 M.N.W. Masomphenya anewa ikhali profesiya yakuti pakutoma mbidakwanirisika pyaka pixanu ntsogolo pa ndzidzi wakuti Yahova mbadaphatisira Abhabhilonya toera kufudza Yerusalemu. Munjira ineyi, Yahova aphatisira anyankhondo a ku Bhabhilonya toera kutcinyusa anthu akukhonda kubvera. (Yer. 25:9, 15-18) Mbwenye ndiye tani pya Ayuda akulungama akuti nee akhakomerwa na pinthu pyakuipa pikhacitika mu nzinda? Anthu adidi nee mbadafudzwa pabodzi na anthu akuipa. Yahova acita masasanyiro toera kuapulumusa.

M’masomphenya anewa, Ezekyele nee aikha anthu cidzindikiro, pontho nee acita khundu pakufudzwa kwa nzinda. M’mbuto mwace, ndi aanju adatsogolera basa yakufudzwa kwa Yerusalemu. Natenepa, profesiya ineyi isatiphedza toera kuona pinacitika kudzulu. Yahova apanga aanju ace toera kufudza anthu akuipa, mbwenye acita masasanyiro toera kupulumusa anthu akulungama. *

Kalene ife tikhafokotoza kuti masomphenya anewa asakwanirisika mu ntsiku zathu, pontho kuti mamuna ali na cakulemba naco ca mulembi akhaphiphirisa anyakudzodzwa akusalikira. Tikhalongambo kuti anthu asaikhwa cidzindikiro cakupulumuka angabvesera mbatawira mphangwa zadidi zinamwaza ife. Mbwenye cincino taona kuti tisafunika kucinja kubvesesa kwathu profesiya ineyi. Mwakubverana na Mateo 25:31-33, Yezu ndiye anafuna kudzapambula anthu mbaatonga. Iye anadzacita pyenepi nkati mwa nyatwa ikulu. Mu ndzidzi unoyu, ale anafuna kuoniwa ninga mabira anadzapulumuswa, mbwenye ale anaoniwa ninga mbuzi anadzafudzwa.

Mphapo, tisapfundzanji kubulukira m’masomphenya a Ezekyele? Tisapfundza ntsonga zixanu:

1.  Yerusalemu mbadzati kufudzwa, Ezekyele, Yeremiya na Izaiya acenjeza anthu thangwi ya pinthu pikhafuna kucitika. Lero, Yahova asaphatisira nsoka ung’ono wa atumiki ace akudzodzwa toera kudyesa mbumba yace na kucenjeza anango nyatwa ikulu mbidzati kufika. Natenepa, atumiki onsene a Yahova akuti ndi anyabasa apanyumba ya Kristu, asacita khundu m’basa ineyi yakucenjeza.​—Mat. 24:45-47.

2.    Ninga Ezekyele, lero atumiki a Yahova nee asaikha cidzindikiro anthu anafuna kupulumuswa. Kubulukira m’basa yakumwaza mphangwa yakuti isatsogolerwa na aanju, atumiki a Yahova asadziwisa anthu pinafuna kucitika ntsogolo.​—Apok. 14:6.

3.  Ninga mu ntsiku za Ezekyele, ale anafuna kudzapulumuswa ntsogolo nee anadzakhalambo na cidzindikiro candimomwene pa nkhope pawo. Kodi anthu asafunika kucitanji toera kupulumuka pa nyatwa ikulu? Iwo asafunika kubvera cenjezo, kutowezera Yezu, kuperekeka kuna Mulungu na kuphedzera abale a Kristu mukumwaza mphangwa zadidi. (Mat. 25:35-40) Ale anacita pyenepi anadzatambira cidzindikiro cakuphiphirisa toera kupulumuka nkati mwa nyatwa ikulu.

4.  Mamuna wakuti ali na cakulemba naco asaimirira Yezu. Nkati mwa nyatwa ikulu, Yezu anadzaikha cidzindikiro mwinji ukulu wa anthu angadzaatonga ninga mabira. Buluka penepo, iwo anadzakhala na mwai wakutambira umaso wa kwenda na kwenda pa dziko yapantsi.​—Mat. 25:34, 46. *

5.  Amuna atanthatu akuti akhali na pida, asaimirira anyankhondo akudzulu pabodzi na Yezu ninga ntsogoleri wawo. Mwakukhonda dembuka iwo anadzafudza anthu akuipa mbaamalisa uipi onsene.​—Ezek. 9:2, 6, 7; Apok. 19:11-21.

Kubvesesa ntsonga zenezi zakufunika kusawangisa cinyindiro cathu cakuti Yahova nkhabe kudzafudza anthu akuipa pabodzi na adidi. (2 Ped. 2:9; 3:9) Ntsonga zidapfundza ife zisatikumbusa kuti basa yakumwaza mphangwa inacitwa lero ndi yakufunika kakamwe. Anthu onsene asafunika kubva cenjezo kumala mbakudzati kufika!​—Mat. 24:14.