Mu nsolo wakutoma wa revista ino taona kuti Creso anyengezwa na nyantsembe wa ku Delfos, mbakundwa na mambo wa ku Persya. Mbwenye Bhibhlya isalonga pya profesiya yakudzumatirisa inalonga thangwi ya mambo unoyu wa ku Persiya yakuti yakwanirisika ninga mudalongerwa ipyo.

Pakhadasala pyaka 200 Siro mbadzati kubalwa, mprofeta Izaiya alonga kuti Siro ndiye akhafuna kukunda nzinda wa Bhabhilonya, pontho kuti mbadacitanji toera kukunda nzinda unoyu wamphambvu.

Izaiya 44:24, 27, 28: “Ipi ndi pidalonga Yahova, . . . ‘Ule anapanga madzi akuzika kuti: “Uma, pontho ndinadzaumisa mikulo yako yonsene”; ule analonga pya Siro: “Iye ndi nkumbizi wanga, pontho iye anadzacita pyonsene pinafuna ine”; ule analonga pya nzinda wa Yerusalemu: “Iwo unadzamangwa pontho,” pontho ule analonga pya templo kuti: “Unadzatoma kumangwa.”’”

Mwakubverana na nyakulemba pidacitika Wacigerego Heródoto, anyankhondo a Siro apeusa madzi a Nkulo wa Eufrate wakuti ukhazungulira nzinda wa Bhabhilonya. Pyenepi pyacitisa kuti anyankhondo anewa apite mu nzinda mwakukhonda nentsa. Pidamala iwo kukunda nzinda, Siro asudzula Ayuda akuti akhali mu ubitcu ku Bhabhilonya, mbaatawirisa toera abwerere ku Yerusalemu kuti akamange pontho nzinda wakuti ukhadafudzwa mu pyaka 70 nduli.

Izaiya 45:1: “Ipi ndi pidalonga Yahova kuna nyakudzodzwa wace Siro, ule adaphata ine djanja yace yamadyo toera ndikunde madzindza a anthu pamaso pace, toera ndimalise mphambvu za amambo, toera kufungula pamaso pace misuwo miwiri yakuphatanizwa, natenepa misuwo mikulu nee inadzafungwa.”

Anyankhondo a Persya apita mu nzinda wa Bhabhilonya na pa misuwo mikulu ya nzinda yakuti ikhadasiiwa bwandzu. Abhabhilonya mbadadziwa masasanyiro a Siro, iwo mbadafunga misuwo yonsene yakuti ikhali n’khundu mwa nkulo. Mbwenye iwo nee acita pyenepi, ndi thangwi yanji nzinda nee ukhali wakutsidzikizika.

Ineyi ndi ibodzi mwa maprofesiya a m’Bhibhlya akuti akwanirisika mu unyomonyomo onsene. a Anthu azinji anayesera kulonga pya ntsogolo, asacita pyenepi na ciphedzo ca alungu awo akuti ndi alungu authambi. Mbwenye Bhibhlya ndi yakusiyana, thangwi maprofesiya ace asabuluka kuna Ule analonga kuti: “Pinthu mbapidzati kucitika, ine ndisalonga mwanyapantsi kuti pinacitika tani, pontho kutomera kale kakamwe, ndisalonga pinthu pyakuti pidzati kucitika.”—Izaiya 46:10.

 Basi ene Mulungu wandimomwene, Yahova, ndiye anakwanisa kucita pyenepi. Dzina yakuti Yahova isabveka: “Iye Asacitisa Pinthu Kukhalapo.” Pyenepi pisabveka kuti iye ali na mphambvu yakudziwa pya ntsogolo na kucitisa kuti pinthu picitike mwakubverana na cifuniro cace. Pyenepi pisatipasa cinyindiro cakuti iye anakwanisa kukwanirisa pyonsene pidapikira iye.

Musafuna kudziwa pinalonga maprofesiya a m’Bhibhlya thangwi ya ntsiku zathu? Cifupi na pyaka 2.000 nduli, Bhibhlya ikhadalongeratu “kuti mu ntsiku zakumalisa, inadzaoneka midzidzi yakugopswa na yakunentsa kupirira.” Zenezi nee ndi ntsiku zakumalisa za dziko yapantsi peno za anthu, mbwenye ndi kumala kwa nkhondo, kupondererwa na nyatwa zakuti zisathabusa anthu mu pyaka pizinji. Tendeni tione maprofesiya mangasi anapangiza kuti tiri kukhala “mu ntsiku zakumalisa.”

2 Timoti 3:1-5: “Mu ntsiku zakumalisa. . . , anthu anadzafunika okhene basi, anadzafuna kakamwe kobiri, anadzakhala anyakugaya, akudzikuza, anyakuxola, akukhonda kubvera anyakubala, akukhonda kupereka takhuta, akukhonda kukhulupirika, akusowa ufuni, akukhonda funa kucita cibverano na anango, anadzakhala anyamapsweda, akukhonda kuphata ntima, ausumankha, akukhonda kufuna pinthu pyadidi, anyakusandukira andzawo, akukhonda kubva pinalonga andzawo, akudzala na kudzikuza, anadzafuna pinakomerwa na iwo basi, mbakhonda kufuna Mulungu, anadzaoneka ninga anthu adaperekeka kuna Mulungu, mbwenye umaso wawo nee unadzapangiza pyenepi.”

Nee musatawira kuti anthu azinji akupangiza makhaliro anewa lero? Kodi musakwanisa kuona anthu lero akuti ndi akudzikuza, akufunika okhene na akufuna kakamwe kobiri? Kodi musaona anthu akuti asacita pinakomerwa na iwo basi, pontho asatowezera manyerezero awo basi? Mwandimomwene, tisaona anapiana azinji mbakakhonda kubvera anyakubala awo, pontho anthu azinji asakomerwa kakamwe na masendzekero, m’mbuto mwakutumikira Mulungu. Ntsiku zonsene pinthu piri kutekera kakamwe.

Mateu 24:6, 7: “Imwe munadzabva pya nkhondo na mabvabva a nkhondo. . . . Mbumba inadzamenyana na mbumba indzace, umambo unadzamenyana na umambo undzace.”

Anyakufufudza anango alonga kuti numero ya anthu adafa na nkhondo kutomera 1914 yapiringana mamiliyau 100, numero ineyi ndi ikulu kakamwe kupiringana anthu anakhala m’madziko mazinji. Nyerezerani pya nyatwa, kutsukwala na misozi thangwi yakufa kwa anthu anewa azinji kakamwe. Kodi madziko apfundza thangwi ya pyenepi toera kumalisa nkhondo?

Mateu 24:7: “Kunadzaoneka njala.”

Programa Alimentar Mundial yalonga tenepa: “Dziko isabulusa cakudya cizinji cakuti cinakwana kuna anthu onsene, mbwenye pa anthu akukwana mamiliyau 815, pyenepi pisabveka kuti munthu m’bodzi mwa anthu 9 asagona na njala. Kusiyapo pyenepi, munthu m’bodzi mwa anthu atatu asathabuka thangwi yakukhonda kudya cakudya cadidi. Anyakufufudza asalonga kuti ana cifupi na mamiliyau 3 asafa pyaka pyonsene thangwi ya njala.

Luka 21:11: “Kunadzaoneka piteketeke pikulu.”

Pyaka pyonsene pa dziko yonsene yapantsi pasacitika piteketeke pyakukwana 50.000. Piteketeke 100 mwa piteketeke pyenepi pisakhala pyamphambvu kakamwe kwakuti pisakwanisa kugomola nyumba. Pontho kabodzi pa caka pasacitika citeketeke camphambvu kakamwe. Mwakubverana na kufufudzwa kudacitwa, kutomera caka 1975 mpaka 2000, piteketeke pyapha anthu akukwana 471.000.

Mateu 24:14: “Mphangwa zadidi za Umambo zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala kunadzafika.”

Mboni za Yahova zakupiringana mamiliyau 8 zisamwaza mphangwa zadidi za Umambo wa Mulungu pa dziko yonsene yapantsi m’madziko cifupi na 240. Iwo asamwaza mphangwa m’mizinda, mupisa pyakutali, mbuto zakunentsa toera kuendako na m’mapiri. Profesiya ineyi isalonga kuti Mulungu angaona kuti basa ineyi yafika kunkhomo “kumala kunadzafika.” Pyenepi pisabvekanji? Pisabveka kuti mautongi a anthu anadzamala mbapitirwa mbuto na Umambo wa Mulungu. Ndi mapikiro api akuti anadzakwanirisika Umambo wa Mulungu ungatonga? Pitirizani kuleri revista ino toera muadziwe.