Pidamala anthu a ku Nazareti kuyesera kupha Yezu, iye aenda ku nzinda wa Kafarnau, dhuzi na Bara ya Galileya yakuti isacemerwambo ‘nyandza ya Jenezareti.’ (Luka 5:1) Pyenepi pyakwanirisa profesiya ya bukhu ya Izaiya yakuti anthu a ku Galileya mbadaona ceza cikulu.—Izaiya 9:1, 2.

Natenepa, ku Galileya Yezu apitiriza kudziwisa kuti ‘Umambo wakudzulu uli cifupi.’ (Mateu 4:17) Yezu agumana anyakupfundzace anai. Iwo akhadacita kale ulendo na Yezu nduli, mbwenye pidabwerera iwo na Yezu buluka ku Yudeya, aenda pontho kacita basa yawo yakumedza. (Juwau 1:35-42) Mbwenye ukhadafika ndzidzi wakutowerera Yezu ndzidzi onsene toera aapfundzise basa yakumwaza mphangwa yakuti mbadapitiriza kuicita angasala okha.

Pikhafamba iye n’khundu mwa bara, Yezu aona Simau Pedhru, m’bale wace Andreya na andzawo angasi mbakasasanyira makokota awo. Yezu aafendedzera mbakwira m’bote ya Pedhru mbamphemba toera aigwinyire m’bara. Pikhali iwo kutali pang’ono na kuntunda, Yezu akhala pantsi mbatoma kupfundzisa undimomwene wa Umambo kuna mwinji ukhali n’khundu mwa bara.

Buluka penepo, Yezu apanga Pedhru: ‘Tende kudazika, mbamugwisira makokota anu m’madzi.’ Pedhru atawira: ‘Mpfundzisi, ife taphuphudza masiku onsene nee kuphata cinthu. Mbwenye nakuti alonga ndimwe, ndinagwisira makokota.’—Luka 5:4, 5.

Iwo agwisa makokota mbaphata nyama zizinji za m’madzi mpaka kokota kutoma kupanduka. Mwakucimbiza, iwo aphemba andzawo akhali m’mwadiya unango cifupi toera abwere kaaphedza. Mwakukhonda dembuka, miyadiya yonsene miwiri yadzala na nyama za m’madzi, mbatoma kulirima. Na kuona pyenepi Pedhru agodama patsogolo pa Yezu mbalonga: ‘Mbuya, bulukani pana ine, thangwi ndine nyakudawa.’ Yezu antawira: ‘Leka kugopa. Kutomera lero iwe unadzakhala nyakusodza anthu.’—Luka 5:8, 10.

Yezu apanga Pedhru na Andreya: ‘Nditowereni, ine ndinadzakucitisani kukhala anyakusodza anthu.’ (Mateu 4:19) Yezu acemerambo anyakumedza anango awiri, Tiyago na Juwau, akuti ndi ana a Zebhedheu. Iwo atawirambo ncemerero mwakucimbiza. Natenepa amuna anewa anai asiya malonda awo a nyama za m’madzi mbakhala anyakupfundza a Yezu akutoma.