Amuna anango abwera bulukira Kumabulukiro a dzuwa. Iwo akhali anyakupfundza makhaliro a nyenyezi, pontho akhakhulupira kuti izo zinakwanisa kuapanga pya umaso wa anthu. (Izaiya 47:13) Ntsiku inango pikhali iwo ku dziko yawo Kumabulukiro a dzuwa, iwo aona “nyenyezi” mbaitowerera mu nsindzo ukulu, mbwenye iyo yaatsogolera toera kuenda ku Yerusalemu, tayu ku Bhetelehemu.

Pidafika iwo ku Yerusalemu, anyakupfundza nyenyezi abvundza: ‘Mambo wa Ayuda adabalwa cincino ali kupi? Thangwi ife taona nyenyezi yace Kumabulukiro a dzuwa, natenepa tabwera kudzamulambira.’—Mateu 2:1, 2.

Mambo Herodhi wa ku Yerusalemu pidabva iye pyenepi aipirwa kakamwe. Natenepa acemera akulu a anyantsembe na atsogoleri auphemberi anango Aciyuda mbaabvundza kuti Kristu anabalwa kupi. Mwakubverana na Malemba, iwo atawira: ‘Ku Bhetelehemu.’ (Mateu 2:5; Mikeya 5:2) Pa ndzidzi unoyu Herodhi acemeresa anyakupfundza nyenyezi mwacibisobiso mbaapanga: ‘Ndokoni, nsakeni mwadidi mwana unoyu. Mungan’gumana bwerani mudzandidziwise toera ndiendembo kamulambira.’ (Mateu 2:8) Mwandimomwene, Herodhi akhafuna kudziwa kuna mwana toera amuphe!

Pidabuluka anyakupfundza nyenyezi, pacitika cinthu cakudzumatirisa. “Nyenyezi” idaona iwo Kumabulukiro a dzuwa yaoneka pontho mbipitiriza kuatsogolera. Pyenepi pikhapangiza kuti nyenyezi ineyi ikhali yakusiyana na zinango, thangwi ikhadatumwa toera kuatsogolera. Anyakupfundza nyenyezi aitowerera mpaka pidalimira iyo panyumba ikhali Zuze na Mariya pabodzi na mwanawo.

Pidapita iwo n’nyumba, anyakupfundza nyenyezi agumana Mariya na khombwani wace—Yezu. Iwo agodama mbampasa miyoni ya ouro, libhano na mira. Buluka penepo, pikhafuna iwo kubwerera kuna Herodhi, Mulungu aapanga mu ndoto kuti akhonde kuenda na kweneku. Natenepa iwo abwerera ku dziko yawo na njira inango.

Kodi mbani adatuma “nyenyezi” ineyi toera kutsogolera anyakupfundza nyenyezi? Kumbukani kuti iyo nee yaatsogolera mbienda kukhali Yezu ku Bhetelehemu. M’mbuto mwace, yaatsogolera ku Yerusalemu, kudaonana iwo na Mambo Herodhi wakuti akhafuna kupha Yezu. Mulungu mbadakhonda kupanga anyakupfundza nyenyezi kuti apite na njira inango, Herodhi mbadaphadi Yezu. Mwandimomwene adatuma “nyenyezi” ineyi akhali nyamalwa wa Mulungu, Sathani, wakuti akhafuna kupha Yezu toera akwanirisembo pikhafuna iye.