1, 2. Ndi anthu angasi akuti akhali axamwali a Yahova?

MBAMUDASANKHULA munthu wa ntundu wanji toera akhale xamwali wanu? Mbamudasankhula munthu anakomerwa na imwe. Munthu wakuti musakhala pabodzi naye. Munthu wakuti ali na n’khaliro unakukomeresani.

² Yahova asankhula anthu angasi toera akhale axamwali ace. Mwacitsandzo, Abhrahamu akhali m’bodzi mwa axamwali a Yahova. (Izaiya 41:8; Tyago 2:23) Yahova akomerwambo na Dhavidhi. Iye alonga kuti Dhavidhi akhali ‘munthu wakukomeresa ntima wace.’ (Machitiro 13:22) Pontho mprofeta Dhanyeli akhali ‘wakufunika kakamwe’ kuna Yahova.​—Danyele 9:23.

3. Thangwi yanji Abhrahamu, Dhavidhi na Dhanyeli akhali axamwali a Yahova?

³ Kodi Abhrahamu, Dhavidhi, na Dhanyeli adzakhala tani axamwali a Yahova? Yahova apanga Abhrahamu: “Watawira fala yanga.” (Genesi 22:18) Yahova asakhala xamwali wa ale akuti mwakucepeseka asambvera. Ngakhale madzindza anakwanisa kukhala axamwali ace. Yahova apanga dzindza ya Israele: “Bverani fala yanga, ine ndinadzakhala Mulungu wanu, imwembo munadzakhala mbumba yanga.” (Yeremiya 7:23, Tradução do Novo Mundo) Natenepa mungafuna kukhala xamwali wa Yahova musafunika kumbvera.

4, 5. Kodi Yahova asatsidzikiza tani axamwali ace?

⁴ Bhibhlya isalonga kuti Yahova asasaka njira “toera kupangiza mphambvu yace kwa ale akuti mitima yawo ndi yakukhulupirika kwa iye.” (2 Pya dziko ya Israele 16:9, NM) Pa Masalmo 32:8, Yahova asapikira kuna  axamwali ace: ‘Ine ndinakupangiza njira inatongwa iwe kutoweza; ndinakupfundzisa mbandikuonera.’

⁵ Nyamalwa wamphambvu asafuna kuticitisa tikhonde kukhala axamwali a Mulungu. Mbwenye Yahova asafuna kutitsidzikiza. (Lerini Masalmo 55:22.) Ninga axamwali a Mulungu, tisantumikira na ntima onsene. Ife ndife akukhulupirika kuna iye ngakhale m’makhaliro akunentsa. Tiri na cinyindiro cibodzi cene ninga cikhali na nyamasalmo. Iye alemba thangwi ya Yahova: ‘Kwenda na kwenda ndisabva kuti ndiri dhuzi na Yahova; sinadzudzumika tayu.’ (Masalmo 16:8; 63:8) Kodi Sathani asayesera kucitanji toera tikhonde kukhala axamwali a Mulungu?

6. Kodi Sathani alonganji thangwi ya anthu?

⁶ Mu Nsolo 11 tapfundza kuti Sathani apomokera Yahova, pontho ampambizira kuti ndi wauthambi na wakuipa thangwi yakukhonda kutawirisa Adhamu na Eva kusankhula okhene pinthu pyadidi na pyakuipa. Bukhu ya Yobe isatipfundzisa kuti Sathani asapambizirambo anthu ale anafuna kukhala axamwali a Mulungu. Sathani aapambizira kuti iwo akhatumikira Mulungu thangwi ya pinthu piri na iwo, tayu thangwi ya ufuni kuna Iye. Sathani afikira pa kulonga kuti anakwanisa kucitisa munthu kusiya kutumikira Mulungu. Tendeni tione kuti tinapfundzanji thangwi ya Yobe, pontho kuti Yahova antsidzikiza tani.

7, 8. (a) Ndi api mabvero akhali na Yahova thangwi ya Yobe? (b) Kodi Sathani alonganji thangwi ya Yobe?

⁷ Yobe akhali ani? Iye akhali munthu wadidi wakuti akhala maso m’pyaka cifupi 3.600 nduli. Yahova alonga kuti pa ndzidzi unoyu nee pakhali munthu unango wakulandana na iye pa dziko yapantsi. Yobe akhalemedza kakamwe Mulungu, pontho akhaida pinthu pyakuipa.  (Yobe 1:8) Inde, Yobe akhali xamwali wandimomwene wa Yahova.

⁸ Sathani alonga kuti Yobe akhatumikira Mulungu na pifuno pyakuipa. Sathani alonga kuna Yahova: “Iwe udaikha tayu mpanda kwa iye, kwa nyumba yace na kwa pyonsene piri na iye? Wapasa nkhombo mabasa a manja ace na pifuyo pyace pikumwazika n’dziko yapantsi. Mbwenye, mbuto mwa pyenepi, ndisakuphemba kuti ufuthule djanja yako mbugwentsa pyonsene piri na iye, pontho ona khala iye nkhabe kudzakutikana pamaso pako pene.”​—Yobe 1:10, 11, NM.

9. Kodi Yahova atawirisa Sathani kucitanji?

⁹ Sathani apambizira Yobe kuti akhatumikira Yahova basi ene thangwi ya pinthu pidapaswa Iye. Sathani alongambo kuti anakwanisa kucitisa Yobe kusiya kutumikira Yahova. Natenepa, Yahova nee atawira pikhalonga Sathani, mbwenye atawirisa Sathani kuyesera Yobe khala akhali xamwali wa Yahova thangwi iye Akhanfuna.

10. Kodi Sathani athabusa tani Yobe, mphapo Yobe acitanji?

¹⁰ Pakutoma, Sathani aba peno afudza pinyama pyonsene pya Yobe. Buluka penepo Sathani apha anyabasa azinji a Yobe. Yobe aluza pinthu pyonsene. Pakumalisa, Sathani athabusa Yobe mu kum’phera anace 10 na condzi. Mbwenye Yobe apitiriza kukhala wakukhulupirika kuna Yahova. ‘Mwa pyonsene, Yobe nee adawa, pontho nee apambizira Mulungu kuti amuonesa nyatwa.’​—Yobe 1:12-19, 22.

11. (a) Kodi Sathani acitanji pontho kuna Yobe? (b) Mphapo Yobe acitanji?

¹¹ Sathani nee amuleka. Iye apomokera Mulungu mukulonga: ‘Gwentsa gogodo yace, pontho ona khala nkhabe kudzakutikana pamaso pako.’ Natenepa Sathani athabusa Yobe na utenda wakupha kakamwe. (Yobe  2:5, 7) Ngakhale tenepo, Yobe akhali wakukhulupirika kuna Yahova. Iye alonga: “Mpaka ine kufa nkhabe kudzasiya umumphu wanga!”​—Yobe 27:5, NM.

12. Kodi Yobe apangiza tani kuti Sathani akhali wauthambi?

¹² Yobe nee akhadziwa pinthu thangwi ya upambiziri wa Sathani, peno kuti thangwi yanji iye akhathabuka kakamwe. Iye akhanyerezera kuti ndi Yahova akhanthabusa. (Yobe 6:4; 16:11-14) Ngakhale tenepo, Yobe akhali wakukhulupirika kuna Yahova. Natenepa nkhabebve njira toera kupenula. Yobe nee akhali waumbirimi. Iye akhali xamwali wa Mulungu thangwi Akhanfuna. Upambiziri onsene wa Sathani ukhali uthambi!

13. Ndi maphindu api adakhala na Yobe thangwi yakukhulupirika kwace?

¹³ Maseze Yobe nee akhadziwa pikhacitika kudzulu, iye akhali wakukhulupirika kuna Mulungu mbapangiza kuti Sathani ndi wakuipa. Yahova apasa nkhombo Yobe thangwi ya kukhulupirika kwace.​—Yobe 42:12-17.

14, 15. Ndi kupambizira kupi kunacita Sathani kuna amuna na akazi onsene?

¹⁴ Munakwanisa kubulusa pfundziro yadidi kubulukira mu pidacitikirwa na Yobe. Lero, Sathani asatipambizira kuti tisatumikira Yahova thangwi ya pinthu pidapaswa ife na Iye. Pa Yobe 2:4, Sathani alonga: ‘Munthu anadzapereka pyonsene piri na iye thangwi ya umaso wace.’ Natenepa Sathani asapambizira amuna na akazi onsene kuti ndi aumbirimi, tayu basi Yobe. Pakupita pyaka pizinji pidamala kufa Yobe, Sathani akupitiriza kutikana Yahova na kupambizira atumiki ace. Mwacitsandzo, pa Misangani 27:11 tisaleri: ‘Mwananga khala wandzeru, mbukomeresa ntima wanga, ine ndinadzakwanisa kutawira ule anandixola.’

¹⁵ Imwe munakwanisa kusankhula kubvera Yahova na  kukhala xamwali Wace wakukhulupirika, toera kupangiza kuti Sathani ndi wauthambi. Ngakhale kuti musafunika kucita macinjo makulu mu umaso wanu toera mukhale xamwali wa Mulungu, ceneci ndi cisankhulo cadidi cakuti munakwanisa kucicita! Cisankhulo ceneci ndi cakufunika kakamwe. Sathani asalonga kuti imwe nee munadzakhala wakukhulupirika kuna Mulungu mungathimbana na nyatwa. Iye asayesera kutinyengeza toera tikhale akukhonda khulupirika kuna Mulungu. Munjira ipi?

16. (a) Ndi njira zipi zinaphatisira Sathani toera kuticitisa kusiya kutumikira Yahova? (b) Kodi Dyabo asakuyeserani tani toera musiye kutumikira Yahova?

¹⁶ Sathani asaphatisira njira zakusiyana-siyana toera kuticitisa kusiya kukhala xamwali wa Mulungu. Iye asapomokera ninga ‘nkhalamu yakulira, mbisaka munthu toera kumudya.’ (1 Pedro 5:8) Lekani dzudzumika khala xamwali wanu, wacibale wanu peno anango angayesera kukucitisani kusiya kupfundza Bhibhlya na kucita pinthu pyadidi. Panango munaona ninga mukutowererwa. * (Jwau 15:19, 20) Sathani asabisalambo ninga ‘anju waceza.’ Natenepa iye asayesera toera tikhonde bvera Yahova. (2 Akorinto 11:14) Njira inango inaphatisira Sathani toera tikhonde kutumikira Yahova ndi kuticitisa kunyerezera kuti nee tathema kutumikira Mulungu.​—Misangani 24:10.

17. Thangwi yanji tisabvera Yahova?

¹⁷ Mu ndzidzi unabvera ife Yahova, tisapangiza kuti  Sathani ndi wauthambi. Ninji pinafuna kutiphedza toera kukhala akubvera? Bhibhlya isalonga: ‘Funani Yahova Mulungu wanu, na ntima wanu onsene, na moyo wanu onsene, na mphambvu zanu zonsene.’ (Deuteronomyo 6:5) Tisabvera Yahova thangwi tisanfuna. Ufuni wathu kuna Yahova ungathimizirika, tinadzafuna kucita pyonsene pinaphemba iye toera ticite. Mpostolo Jwau alemba: ‘Kufuna Mulungu pisabveka kukoya matongero ace; thangwi matongero ace si akulemera tayu.’​—1 Jwau 5:3.

18, 19. (a) Ndi pinthu pipi pinango pyakuti Yahova asatipanga kuti mphyakuipa? (b) Tisadziwa tani kuti Yahova nee asatiphemba toera kucita pinthu pyakuti nee tinapikwanisa?

¹⁸ Mphapo ndi pinthu pipi pinango pyakuti Yahova asatipanga kuti mphyakuipa? Onani pitsandzo pingasi m’bokosi “ Idani Pinaida Yahova.” Pakutoma, panango munanyerezera kuti pinango mwa pinthu pyenepi si pyakuipa tayu. Mbwenye mungaleri mavesi a Bhibhlya  na kuanyerezera mwacidikhodikho, munadzabvesesa udziwisi wakubvera mwambo wa Yahova. Munaonambo kuti musafunika kucita macinjo mu umaso wanu. Maseze pinakhala pyakunentsa mu ndzidzi wakucepa, mungacita macinjo anewa, munadzakhala na ntendere na kutsandzaya kunabwera thangwi yakukhala xamwali wakukhulupirika wa Mulungu. (Izaiya 48:17, 18) Tisadziwa tani kuti mphyakukwanisika kucita macinjo anewa?

¹⁹ Yahova cipo asatiphemba kucita pinthu pyakuti ife nkhabe kwanisa kupicita. (Deuteronomyo 30:11-14) Ninga Xamwali wandimomwene, iye asatidziwa mwadidi kupiringana ife ene. Iye asadziwa pinakwanisa ife na pinacimwana ife. (Masalmo 103:14) Mpostolo Paulu asatiwangisa: ‘Mulungu ngwakukhulupirika, iye nkhabe kudzatawira kuti muyeserwe na manyengerero anapiringana mphambvu zanu. Manyengerero angabwera, Mulungu anakupasanimbo ndzeru zakuakunda.’ (1 Akorinto 10:13) Tinakwanisa kukhala na cinyindiro cakuti Yahova ndzidzi onsene anadzatipasa mphambvu toera  kucita pinthu pyadidi. Iye anadzatipasa ‘mphambvu zikulu kakamwe’ toera kupirira pinentso. (2 Akorinto 4:7) Pakumala kuona ciphedzo ca Yahova m’midzidzi ninga ineyi, Paulu alonga: “Ine ndinakwanisa pyonsene mwa uyu anandipasa mphambvu.”​—Afilipi 4:13.

20. Ndi makhaliro api akuti musafunika kuatowezera, thangwi yanji?

²⁰ Khala tisafuna kukhala xamwali wa Yahova, tisafunika kusiya kucita pinthu pinalonga Yahova kuti mphyakuipa, mbwenye tisafunikambo kucita pizinji kupiringana pyenepi. (Aroma 12:9) Axamwali a Mulungu asafuna pinthu pinafuna Mulungu. Iwo asafokotozwa pa Masalmo 15:1-5 (Lerini.) Axamwali a Yahova asatowezera makhaliro ace na kupangiza ‘ufuni, kusekera, ntendere, kupirira, kukoma ntima, udidi, kukhulupirika, kupfulika na kudzitonga.’​—Agalata 5:22, 23.

21. Munapfundza tani kupangiza makhaliro anakomeresa Mulungu?

²¹ Munacitanji toera kukhala na makhaliro anewa adidi? Musafunika kupfundza kufuna pinafuna Yahova mukuleri na kupfundza Bhibhlya mwakukhonda phonya. (Izaiya 30:20, 21) Mukucita pyenepi, ufuni wanu kuna Yahova unathimizirika, pontho mu ndzidzi unakula ufuni wanu, munadzafuna kumbvera.

22. Tinakhala na maphindu api tingabvera Yahova?

²² Macinjo akuti musafunika kuacita mu umaso wanu anakwanisa kulandaniswa na kucinja nguwo zakale na kubvala nguwo zipswa. Bhibhlya isalonga kuti imwe musafunika ‘kudula umunthu wakale’ mbamubvala “umunthu upswa.” (Akolose 3:9, 10) Ngakhale kuti mphyakunentsa, tingacita macinjo anewa na kubvera Yahova, iye asapikira kuti anatipasa ‘muoni ukulu.’ (Masalmo 19:11) Inde, sankhulani kubvera Yahova, pontho pangizani kuti Sathani ndi wauthambi. Tumikirani Yahova, tayu thangwi ya nkhombo za ntsogolo, mbwenye thangwi yaufuni wandimomwene. Natenepa munadzakhala xamwali wandimomwene wa Mulungu!