Ku dziko ya Sirya, kukhali na ntsikana wang’ono wa ku Izraeli wakuti akhali kutali kakamwe na acibale ace. Iye akwatwa na anyankhondo Asirya mbaendeswa kutali na banja yace. Kweneko iye adzakhala nyabasa panyumba ya Namani, nkulu wa anyankhondo wa Asirya. Ntsikana unoyu akhalambira Yahova, maseze anthu a kweneko nee akhacita pyenepi.

Namani akhali na utenda wa matanya, pontho ndzidzi onsene akhabva kupha kakamwe. Ntsikana unoyu wang’ono wa ku Izraeli akhafuna kakamwe kuphedza Namani. Natenepa, iye apanga nkazi wa Namani: ‘Ndisadziwa munthu wakuti anakwanisa kuwangisa utenda wa mamunanu. Mu Izraeli muli na mprofeta wa Yahova anacemerwa Elizeu. Iye anakwanisa kuwangisa mamunanu.’

Nkazi wa Namani apanga mamunace pidalonga ntsikana unoyu. Namani akhafuna kakamwe kuti awange, natenepa iye aenda kunyumba ya Elizeu ku Izraeli. Pidafika iye kweneku, Namani akhadikhira kuti Elizeu mbadantambira ninga munthu wakupambulika. Mbwenye pidacitika pikhali pyakusiyana. Elizeu atuma ntumiki wace toera aende kalonge na  Namani mbampanga mphangwa izi: ‘Ndokoni kabvikike kanomwe mu Nkulo wa Yordani, buluka penepo munawanga.’

Namani aipirwa kakamwe na pyenepi mbalonga: ‘Ine ndikhanyerezera kuti mprofeta unoyu mbadaphembera kuna Mulungu wace mbandisandzikira manja ace toera ndiwange. Mbwenye akundipanga toera ndiende ku nkulo wa kuno ku Izraeli. Ife tiri na mikulo yadidi kakamwe ku Sirya. Thangwi yanji ine nkhabe kuenda pyanga kweneku?’ Namani aipirwa kakamwe mbabuluka panyumba ya Elizeu.

Atumiki a Namani amphedza toera anyerezere mwadidi. Iwo alonga: ‘Kodi nee ndimwe adalonga kuti munacita pyonsene pinakwanisa imwe toera muwange? Pidakupangani mprofeta uyu ndi pinthu pyakukhonda nentsa. Thangwi yanji musakhonda kupicita?’ Namani abvera atumiki ace mbaenda kabvikika kanomwe ku Nkulo wa Yordani. Pidabuluka iye m’madzi paulendo wacinomwe, iye aona kuti akhadawanga. Iye atsandzaya kakamwe mbabwerera kuna Elizeu toera kupereka takhuta. Namani alonga: ‘Cincino ndisadziwa kuti Yahova ndi Mulungu wandimomwene.’ Mwakukhonda penula ntsikana unoyu wa ku Izraeli atsandzaya kakamwe pidaona iye kuti Namani awangiswa utenda wace.