Ku dziko ya Sirya, kukhakhala mwana ntsikana Waciisraeli wakuti akhali kutali kakamwe na acibale ace. Iye akwatwa na anyankhondo Asirya mbaenda naye kutali na banja yace. Kweneko ntsikana unoyu adzakhala nyabasa pa nyumba ya Naamani, nkulu wa anyankhondo wa Asirya. Nee m’bodzi akhalambira Yahova mu dziko ineyi kusiyapo iye basi.

Naamani akhali na utenda wa matanya. Ndzidzi onsene akhabva kupha kakamwe. Ntsikana Waciisraeli akhafuna kakamwe kuphedza Naamani. Natenepa, iye alonga na nkazi wa Naamani: ‘Ndisadziwa munthu m’bodzi wakuti anakwanisa kukondza utenda wa mamunanu. Mu Israeli muli na mprofeta wa Yahova anacemerwa Elizeu. Iye anakwanisa kukondza utenda wa mamunanu.’

Nkazi wa Naamani apanga mamunace pidalonga ntsikana Waciisraeli. Naamani akhafuna kuyesera pyonsene toera kuwanga. Natenepa iye aenda ku nyumba ya Elizeu ku Israeli. Naamani akhadikhira kuti Elizeu mbadantambira ninga munthu wakupambulika. Mbwenye, m’mbuto mwakulonga na Naamani, Elizeu atuma ntumiki wace toera kalonga na  Naamani mbampanga mphangwa izi: ‘Ndoko kabvikike kanomwe mu Nkulo wa Yordane. Buluka penepo unawanga.’

Naamani nee akomerwa na pyenepi. Iye alonga: ‘Ndikhanyerezera kuti mprofeta unoyu mbadaphembera kuna Mulungu wace mbandisandzikira manja ace toera ndiwange. M’mbuto mwace, akundipanga toera ndiende ku nkulo wa kuno ku Israeli. Tiri na mikulo yadidi kakamwe ku Sirya. Mbidasamba pyanga kwathu nee mbandidawanga?’ Naamani aipirwa kakamwe mbabuluka pa nyumba ya Elizeu.

Atumiki a Naamani amphedza toera anyerezere mwadidi. Iwo alonga: ‘Imwe nee mwalonga kuti munayesera pyonsene toera kuwanga? Pidakupangani mprofeta uyu ndi pinthu pyakukhonda nentsa. Thangwi yanji musakhonda kupicita?’ Naamani abvera atumiki ace. Iye aenda ku Nkulo wa Yordane mbabvikika kanomwe. Pidamala iye kubvikika kacinomwe, iye abuluka m’madzi mbawanga. Iye atsandzaya kakamwe mbabwerera kuna Elizeu toera kupereka takhuta. Naamani alonga: ‘Cincino ndadziwa kuti Yahova ndi Mulungu wandimomwene.’ Ntsikana Waciisraeli atsandzaya kakamwe mudaona iye kuti Naamani awanga mbabwerera panyumba.