Pidapita miyezi miwiri mbadabuluka kale ku Ejitu, Aizraeli afika Paphiri ya Sinai, mbamanga misasa yawo dhuzi na phiri ineyi. Yahova apanga Mose toera akwire paphiri. Penepo ampanga: ‘Ndapulumusa Aizraeli. Iwo angandibvera mbakoya mitemo yanga, anadzakhala mbumba yanga yakupambulika.’ Mose abwerera kuna Aizraeli, mbaapanga pidalonga Yahova. Kodi iwo atawira tani? Iwo atawira: “Tiri dzololo toera kucita pyonsene pidalonga Yahova.”

Mose akwira pontho paphiri. Penepo Yahova alonga: ‘Pangapita ntsiku zitatu ndinadzalonga na imwe. Cenjeza mbumba toera ikhonde kukwira Paphiri ya Sinai.’ Natenepa Mose atcita paphiri, aenda kuna mbumba mbaapanga kuti akhunganyike toera abvesere pinafuna longa Yahova.

Pidapita ntsiku zitatu, Aizraeli aona kucetuma kwa njazi na khole yakupswipa yakuti ikhadaphimbira phiri. Iwo abva dzumbi peno baruya ikulu ya kudhima na kulira kwa nyanga. Buluka penepo, Yahova atcita paphiri ninga malirimi a moto. Aizraeli agopa kakamwe mbatetemera. Phiri yonsene ikhatekenyeka kakamwe, pontho ikhadaphimbirwa na nkhungu. Kulira kwa nyanga kukhathimizirika. Buluka penepo, Mulungu alonga: ‘Ine ndine Yahova. Lekani kulambira alungu anango.’

Mose akwira pontho paphiri, penepo Yahova ampasa mitemo toera mbumba idziwe kuti inamulambira tani, pontho isafunika kucitanji. Mose alemba mitemo ineyi, pontho aileri kuna Aizraeli. Buluka penepo mbumba yapikira: “Ife tiri dzololo toera kucita pyonsene pidalonga Yahova.” Aizraeli apikira kuti mbadabvera Mulungu. Kodi iwo akwanirisa pikiro ineyi?