Mose apanga Farau kuti cipo anaenda pontho kuna iye. Mbwenye mbadzati kubuluka apanga Farau: ‘Pa tcititciti, ana onsene autombo a dziko ya Ejitu, kutomera mwana wautombo wa Farau mpaka ana autombo a anyabasa, anadzafa.’

Yahova apanga Aizraeli toera adye cakudya cakupambulika. Iye alonga: ‘Phani mwanabira peno mwanambuzi wamamuna wa caka cibodzi, mbamukhwaza ciropa cace n’khundu mwa misuwo yanu. Otcani nyama pa moto mbamuidya na mikate yakusowa pyakutupisa. Khalani dzololo toera kuenda, mbamubvala ntsapato zanu. Masiku ano ndinakusudzulani.’ Mwandimomwene Aizraeli atsandzaya kakamwe pidabva iwo pyenepi.

Namasiku anewa, anju wa Yahova aenda m’manyumba onsene a mu Ejitu. N’nyumba zakuti nee zikhali na ciropa pa aro ya nsuwo, ana autombo akhafa. Mbwenye anju unoyu nee apita n’nyumba zidakhwazwa ciropa. Mabanja onsene Aejitu, akupfuma na akutcerenga, aferwa na ana. Mbwenye nee mwana m’bodzi wa Aizraeli afa.

Ngakhale mwana wa Farau afambo. Farau nee akwanisa kupirira. Mwakucimbiza, iye apanga Mose na Aroni: ‘Lamukani, bulukani n’dziko mwanga! Kalambireni Mulungu wanu. Kwatani pifuyo pyanu muende.’

 Mu ndzidzi wakuti mwezi ukhali wakudzala, mabanja na madzindza a Aizraeli abuluka mu Ejitu. Amuna Aizraeli akhali akukwana 600.000 pabodzi na akazi azinji na anapiana. Anthu anango azinji aendambo pabodzi na iwo toera akwanisembo kulambira Yahova. Mu ndzidzi unoyu, Aizraeli akhadasudzulwa mu ubitcu.

Toera kukumbuka kuti Yahova aapulumusa tani, Aizraeli akhadya cakudya cakupambulika kabodzi pa caka. Cakudya ceneci cikhacemerwa Paskwa.