Pidathamangiswa Adhamu na Eva m’munda wa Edheni, iwo adzakhala na ana azinji. Mwana wawo wakutoma akhali Kaini, waciwiri akhali Abheli. Kaini akhali nyakulima, mbwenye Abheli akhali nkumbizi.

Ntsiku inango, Kaini na Abheli apereka ntsembe kuna Yahova. Iwe usadziwa kuti ntsembe ninji? Ndi muoni wakupambulika. Yahova akomerwa kakamwe na ntsembe ya Abheli, mbwenye nee akomerwa na ntsembe ya Kaini. Kaini aipirwa kakamwe thangwi ya pyenepi. Yahova acenjeza Kaini kuti kuipirwa kwace mbukudantsogolera toera kucita cinthu cakuipa. Mbwenye Kaini nee abvera.

Natenepa, Kaini apanga Abheli: “Tende kumunda.” Pikhali iwo okhene ku munda, Kaini amenya m’bale wace  mbamupha. Ninji pidacita Yahova? Toera kutcunyusa Kaini, Yahova an’thamangisa mbaenda kakhala kutali na banja yace, pontho nee antawirisa kubwerera kunyumba kwawo.

Tisapfundzanji na pyenepi? Midzidzi inango, panango tinaipirwa pinthu pingakhonda kucitika ninga munapifunira ife. Tingadzindikira kuti tiri kutoma kuipirwa, peno anango angaticenjeza thangwi ya pyenepi, tisafunika kusiya kuipirwa kwathu mwakucimbiza toera tikhonde kucita pinthu pyakuipa.

Abheli akhafuna Yahova, pontho akhacita pinthu pyadidi. Na thangwi ineyi, Yahova cipo anan’duwala. Mulungu anadzalamusa Abheli muli akufa mbakhala pontho m’maso m’paraizu pa dziko yapantsi.