Mamuna m’bodzi wakuti nee akhakwanisa kufamba, akakhala pansuwo wa templo ntsiku zonsene mbaphemba pinthu. Ntsiku inango, pidaona iye Pedhru na Juwau mbakapita mu templo, aaphemba toera ampase pinthu. Pedhru alonga: ‘Ine nkhabe kobiri toera kukupasa, mbwenye ndinakupasa cinthu kupiringana kobiri. Mu dzina ya Yezu, lamuka ufambe!’ Buluka penepo, Pedhru amphedza toera kulamuka, natenepa mamuna unoyu atoma kufamba! Anthu onsene akhali penepo adzumatirwa na pyenepi, pontho anthu azinji atoma kukhulupira.

Mbwenye anyantsembe na Asadhuki aipirwa kakamwe. Iwo aphata apostolo mbaenda nawo ku thando yakutonga miseru, mbaabvundza: ‘Mbani akupasani mphambvu toera kuwangisa mamuna unoyu?’ Pedhru atawira: ‘Ife tatambira mphambvu kubulukira kuna Yezu Kristu, ule adapha imwe.’ Atsogoleri a mauphemberi akhuwa: ‘Lekani kulonga pontho pya Yezu!’ Mbwenye apostolo aatawira: ‘Ife tisafunika kulonga pya iye. Ife cipo tinasiya kulonga thangwi ya Yezu.’

Mwakukhonda dembuka, Pedhru na Juwau asudzulwa. Buluka penepo, iwo aenda kuna anyakupfundza anango mbaapanga pidacitika. Pontho iwo acita phembero pabodzi kuna Yahova: ‘Taphata miyendo, tiphedzeni toera tikwanise kucita basa yanu mwacipapo.’ Natenepa, Yahova aapasa nzimu wakucena, pontho iwo apitiriza kumwaza mphangwa na kuwangisa atenda. Anthu azinji kakamwe atoma kukhulupira, mbwenye Asadhuki akhali na bibvu. Iwo amanga apostolo mbaaendesa nkaidi. Mbwenye namasiku, Yahova atuma anju wakuti afungula misuwo ya kaidi, mbapanga apostolo: ‘Ndokoni pontho mu templo, pontho kapfundziseni anthu.’

Mangwana mwace namacibese, atsogoleri a mauphemberi apangwa kuti: ‘Apostolo abuluka nkaidi, pontho iwo ali mu templo mbapfundzisa anthu!’ Natenepa apostolo amangwa pontho mbaendeswa ku Thando Yakutongera Miseru.  Nyantsembe wankulu alonga: ‘Ife takupangani kuti nee musafunika kupitiriza kulonga pya Yezu!’ Mbwenye Pedhru atawira: “Tisafunika kubvera Mulungu ninga ntongi, tayu anthu.”

Pidabva iwo pyenepi, atsogoleri a mauphemberi aipirwa kakamwe mbafuna kupha apostolo. Mbwenye Nfarisi unango akhacemerwa Gamaliyeli alamuka mbalonga: ‘Citani mphole- mphole! Panango Mulungu ali pabodzi na amuna anewa. Musafunadi kumenyana na Mulungu?’ Iwo abvera uphungu unoyu. Mbwenye mbadzati kuasiya toera aende, iwo aamenya mbaapanga kuti nee akhafunikabve kulonga pya Yezu. Mbwenye apostolo nee asiya kumwaza mphangwa. Iwo apitiriza kumwaza mphangwa zadidi mwacipapo mu templo na nyumba na nyumba.