Pidamala Yezu caka cibodzi na hafu m’basa ya kumwaza mphangwa, iye akhafunika kucita cisankhulo cakufunika kakamwe. Iye akhafunika kusankhula anthu toera kuphata basa pabodzi na iye, pontho toera kutsogolera mpingo Wacikristu. Yezu akhafuna ciphedzo ca Yahova toera kusankhula anthu anewa. Na thangwi ineyi, iye aenda ekhene kuphiri mbaphembera masiku onsene kweneko. Namacibese, Yezu acemera atowereri ace angasi, mbasankhula apostolo ace 12. Musakumbuka madzina awo? Madzina awo akhali Pedhru, Andreya, Tiyago, Juwau, Filipi, Bhartolomeu, Tomee, Mateu, Tiyago mwana wa Alfeu, Tadheu, Simau na Yuda Iskariyoti.

Apostolo anewa Khumi na Awiri mbadafamba pabodzi na Yezu. Pakumala kuapfundzisa, Yezu aatuma toera akamwaze mphangwa okhene. Yahova aapasa mphambvu toera kubulusa madimonyo na kuwangisa anthu akuduwala.

Kuna Yezu, apostolo Khumi na Awiri akhali axamwali ace, pontho akhaanyindira. Afarisi akhanyerezera kuti apostolo nee apfundza  maxikola. Mbwenye Yezu aapfundzisa kuti anacita tani basa yawo. Iwo akhala na Yezu m’midzidzi yakufunika kakamwe ya umaso wace, ndzidzi wakuti adzati kufa na pakumala kulamuswa kwace. Ninga Yezu, azinji mwa apostolo Khumi na Awiri akhali a ku Galileya, pontho anango a iwo akhali akumanga banja.

Apostolo akhali anthu akusowa ungwiro akuti akhacita madodo. Midzidzi inango akhalonga pinthu mwakukhonda nyerezera mwadidi, akhacita pisankhulo pyakuipa, pontho akhacimwana kupirirana. Iwo afika pakulongezana kuti mbani wakufunika kakamwe pakati pawo. Mbwenye iwo akhali anthu adidi akuti akhafuna Yahova. Iwo mbadakhazikisa mpingo Wacikristu Yezu angaenda kudzulu.