Juwau, mwana wa Zakariya na Elizabheti, adzakula mbakhala mprofeta. Yahova aphatisira Juwau toera kupfundzisa mbumba kuti Mesiya mbadabwera. Juwau nee akhapfundzisa m’masinagoga peno m’mizinda, mbwenye akhamwaza mphangwa n’thando. Anthu a mu Yerusalemu na a mu Yudeya akhaenda kuna Juwau toera kupfundziswa. Iye akhaapfundzisa kuti toera akomerese Mulungu, iwo akhafunika kusiya kucita pinthu pyakuipa. Natenepa pidamala iwo kupfundziswa na Juwau, azinji atcunyuka, pontho iye aabatiza mu Nkulo wa Yordani.

Juwau nee akhali na pinthu pizinji. Nguwo zace zikhali zakucitwa na maweya a kamelo, pontho akhadya nthete na uci. Anthu azinji akhafuna kudziwa Juwau. Ngakhale Afarisi na Asadhuki akuti akhali akudzikuza akhaendambo basi kaona Juwau. Juwau aapanga: ‘Imwe musafunika kucinja mbamutcunyuka. Lekani kunyerezera kuti ndimwe akufunika kakamwe basi ene thangwi musalonga kuti Babathu ndi Abhrahamu. Pyenepi nee pisabveka kuti ndimwe ana a Mulungu.’

Anthu azinji akhaenda kuna Juwau mbambvundza: ‘Tisafunika kucitanji toera kukomeresa Mulungu?’ Juwau apanga Ayuda: ‘Khala imwe muli na nguwo ziwiri, pasanimbo ule adaisowa.’ Usadziwa kuti thangwi yanji Juwau alonga pyenepi? Iye akhafuna kuti atowereri ace adziwe kuti toera kukomeresa Mulungu, iwo akhafunika kufuna andzawo.

Juwau apanga anyakulipisa misonkho: ‘Khalani akulungama, lekani kunyengeza anthu.’ Iye apangambo anyankhondo: ‘Lekani kulonga uthambi peno kupokosera munthu kobiri yace.’

 Anyantsembe na Alevi akhaendambo kuna Juwau mbambvundza: ‘Kodi iwe ndiwe ani? Anthu onsene asafuna kukudziwa.’ Juwau aatawira: ‘Ndine fala ya munthu anakhuwa n’thando, ndisaphedza anthu toera kudziwa Yahova ninga mudalongera mprofeta Izaiya.’

Mbumba ikhakomerwa na pinthu pikhapfundzisa Juwau. Azinji akhadzumatirwa mbanyerezera kuti Juwau akhali Mesiya. Mbwenye iye aapanga: ‘Ali kubwera munthu wankulu kakamwe kupiringana ine. Nee ndathema kusudzula mithambo ya masandalya ace. Ine ndisabatiza na madzi, mbwenye iye anadzakubatizani na nzimu wakucena.’