Ntongi wa ku Roma, Sezari Augustu, akhazikisa ntemo toera Ayuda onsene abwerere ku mizinda ikhakhala iwo toera kulemberwa. Natenepa Zuze na Mariya acita ulendo mbaenda ku Bhetelehemu ku dziko idabalwa Zuze. Ukhadafika ndzidzi toera Mariya abale.

Pidafika iwo ku Bhetelehemu, nyumba yakufikira alendo nee ikhalibve na mbuto, natenepa iwo aenda n’thanga. Ndi mwenemu mudabalwa Yezu. Mariya ampyangirira na nguwo zadidi kakamwe mban’gonesa munadyera pifuyo.

Dhuzi na nzinda wa Bhetelehemu, akumbizi anango akhaonera pifuyo pyawo namasiku. Mwakukhonda dikhira, anju aonekera patsogolo pawo, pontho mbuto ineyi yonsene ikhayetimira kakamwe na mbiri ya Yahova. Natenepa akumbizi agopa kakamwe, mbwenye anju aapanga: ‘Lekani kugopa. Ine ndabwera kudzakupangani  mphangwa zakutsandzayisa. Lero Mesiya abalwa ku Bhetelehemu.’ Mu ndzidzi unoyu, aanju azinji aonekera kudzulu, mbalonga: “Mbiri kuna Mulungu kudzulu, ntendere pantsi pano.” Buluka penepo aanju nee aonekabve. Kodi akumbizi acitanji?

Akumbizi alonga kuna unango na ndzace: “Tendeni cincino ku Bhetelehemu.” Iwo aenda mwakucimbiza mbagumana Zuze na Mariya na mwanawo n’thanga.

Anthu onsene adabva mphangwa zidalonga anju kuna akumbizi adzumatirwa kakamwe. Mariya anyerezera mwadidi mafala adalonga anju, pontho cipo aaduwala. Buluka penepo, akumbizi abwerera kuna pifuyo pyawo, mbakapereka takhuta kuna Yahova thangwi ya pinthu pyonsene pidabva iwo na pidaona iwo.