ONANI nkhangaiwa inatcita mbibwera pa nsolo wa mamuna. Mamuna unoyu ndi Yezu. Iye akhali cifupi na piaka 30 pyakubalwa. Na mamuna ali na iye ndi Juwau. Ife tamala kupfunza pinango pya iye. Kodi musakumbuka mudaenda Mariya kaona wacibale wace Elizabeti, na khombwani m’mimba mwa Elizabeti anumpha na kukomerwa? Khombwani unoyu m’mimba akhali Juwau. Kodi Juwau na Yezu akucitanji pano?

Juwau amala kwene kubiza Yezu m’madzi a Nkulo wa Yoridani. Ndi m’njira ineyi inabatizwa munthu. Pakutoma, asabizwa m’madzi, buluka penepo mbabuluswa pontho. Nakuti ipi ndipyo pikhacita Juwau anthu, iye akhacemerwa Juwau Mbatizi. Mbwenye thangwi yanji Juwau abatiza Yezu?

Mwandimomwene, Juwau acita pyenepi thangwi Yezu aenda kaphemba Juwau kuti ambatize. Juwau akhabatiza anthu ale akhafuna kupangiza kuti atsukwala thangwi ya pinthu pyakuipa pidacita iwo. Kodi Yezu acita ulendo unango cinthu cakuipa cakuti atsukwale thangwi ya ico? Nkhabe, cipo Yezu acicita, thangwi iye ndi Mwana ene wa Mulungu adabuluka kudzulu. Natenepa iye aphemba Juwau kuti ambatize na thangwi yakusiyana. Tendeni tione thangwi yace.

Yezu mbasati kuenda kule kukakhala Juwau, iye akhali nyakupala matabwa. Nyakupala matabwa ndi munthu anacita pinthu pya matabwa, ninga zimeza, makadera na mipando. Zuze, mamuna wa Mariya, akhali nyakupala matabwa, na iye apfunzisa Yezu kukhalambo nyakupala matabwa. Mbwenye Yahova hadatuma Mwanace pa dziko yapantsi kudzakhala nyakupala matabwa tayu. Iye akhali na basa yakupambulika towera mwanace aicite, na ukhadafika nzidzi kuti Yezu atome kuicita. Natenepa, towera kupangiza kuti abwera kudzacita kufuna kwa Babace, Yezu aphemba Juwau kuti ambatize. Kodi Mulungu akomerwa na ipi?

Inde, iye akomerwa, thangwi mudamala Yezu kubuluka m’madzi, fala yakubuluka kudzulu yalonga: ‘Uyu ndi Mwananga, wakuti ndisakomerwa naye.’ Pontho, kudzulu kwakhala ninga kwafunguka na nkhangaiwa iyi yatcita mbibwera padzulu pa Yezu. Mbwenye ikhali nkhangaiwa yandimomwene tayu. Ikhaoneka basi ninga nkhangaiwa. Mwandimomwene ukhali nzimu wakucena wa Mulungu.

M’nzidzi uneule Yezu akhali na pizinji pyakunyerezera, natenepa iye aenda ku mbuto yace ekhene m’ntsiku 40. Kweneko Satana abwera kwa iye. Satana ayesera katatu kucitisa Yezu cinthu cakusiyana na miyambo ya Mulungu. Mbwenye Yezu adacita tayu.

Buluka penepo, Yezu abwerera na agumanikana na amuna angasi adadzakhala atowereri ace akutoma, peno anyakupfunza. Madzina mangasi a iwo akhali Andrea, Pedru (akhacemerwambo Simoni), Filipi na Natanyeli (akhacemerwambo Baritolomeyu). Yezu na anyakupfunza apswa anewa aenda ku cisa ca Galileya. Ku Galileya iwo alimira pa Kana, nzinda udabalwa Natanyeli. Kweneko Yezu aenda ku phwando ikulu ya ukwati, mbacita cirengo cace cakutoma. Kodi musacidziwa kuti ndi cipi? Aphinduza madzi mbabwera vinyu.