YANG’ANANI cinthu ici cakugopswa cinacitika! Yezu akuphiwa. Iwo ankhomera pamuti. Maperegu akhomerwa m’manja na m’manyalo mwace. Kodi thangwi yanji munthu akhafunika kucita pyenepi kwa Yezu?

Thangwi anthu angasi akhaida Yezu. Kodi musadziwa kuti iwo akhali ani? Mbodzi wa iwo akhali anju wakuipa Satana Diyabu. Akhali iye adakwanisa kucitisa Adamu na Yeva kukhonda bvera Yahova. Na akhali Satana adacitisa anyamalwa a Yezu kucita upandu uyu wakugopswa.

Ngakhale Yezu mbasati khomerwa pamuti, anyamalwa ace ancitira pinthu pyakuipa. Kodi musakumbuka mafikiro awo ku munda wa Getsemani mbankwata mbaenda naye? Kodi anyamalwa anewa akhali ani? Inde, akhali atsogoleri arelijiau. Mphapo tendeni tione pidacitika patsogolo pace.

Mudakwatwa Yezu na atsogoleri arelijiau, apostolo ace athawa. Iwo asiya Yezu ekhene na anyamalwa ace, thangwi akhagopa. Mbwenye apostolo Pedru na Juwau hadaenda kutali kakamwe tayu. Iwo atowerera kuti aone pikhafuna citikira Yezu.

Anyantsembe akwata Yezu mbaenda naye kwa mamuna nkulu Anasi, ule akhali nyantsembe wankulu. Mwinji hudakhala penepo m’nzidzi ukulu tayu. Patsogolo pace akwata Yezu mbaenda naye ku nyumba ya Kayafa, wakuti m’nzidzi uneule akhali nyantsembe wankulu. Atsogoleri azinji arelijiau agumanyikana pa nyumba yace.

Kunyumba ya Kayafa iwo atonga nseru. Anthu akhapitiswa towera alongere Yezu unthawatawa. Atsogoleri a relijiau onsene alonga: ‘Yezu asafunika kuphiwa.’ Buluka penepo iwo amphulira mata kunkhope, na ammenya na maxoko awo.

Mukacitika pinthu ipi pyonsene, Pedru akhali kunja pa cintalo. Akhali masiku akuthondola, natenepa mbumba yagasa moto. Mukaotha iwo moto, nzakazi wankazi ayang’ana Pedru, mbalonga: ‘Mamuna uyu akhalimbo na Yezu.’

Pedru atawira: ‘Nkhabe, ndikhali naye tayu!’

M’maulendo matatu anthu alonga kwa Pedru kuti iye akhali na Yezu. Mbwenye paulendo ubodzi na ubodzi Pedru alonga kuti nee ukhali undimomwene. Paulendo wacitatu udalonga Pedru ipi, Yezu azungunuka mbamuyang’ana. Pedru akutsukwala kakamwe thangwi ya kulonga unthawatawa, na iye abuluka mbalira.

Mukabuluka dzuwa Ncixanu namacibese, anyantsembe akwata Yezu mbaenda naye ku mbuto yawo ikulu ya misonkhano, nyumba ya Sinedriyu. Kweneko iwo akhabverana kuti mbadacitanji na iye. Iwo aenda naye kwa Ponsu Piratu, ntongi wa cisa ca Yudeya.

Anyantsembe apanga Piratu: ‘Uyu ndi mamuna wakuipa. Iye asafunika kuphiwa.’ Pakumala kucita Yezu mabvunzo, Piratu alonga: ‘Ine nkhabe kuona nee cinthu cibodzi cakuipa cidacita iye.’ Buluka penepo Piratu atumiza Yezu kwa Herodi Antipa. Herodi akhali ntongi wa Galileya, mbwenye iye akakhala ku Yerusalemu. Herodi nee akwanisa kuonambo cinthu cakuipa cidacita Yezu, natenepa iye ambweza kwa Piratu.

Piratu akhafuna kusudzula Yezu. Mbwenye anyamalwa a Yezu akhafuna kuti asudzulwe nyakaidi unango mbuto mwace. Mamuna unoyu akhali phanga Baraba. Mphapo mudabuluswa Yezu kudambo na Piratu ikhali midiya. Iye alonga kwa mbumba: ‘Onani! Mambo wanu!’ Mbwenye nkulu wa anyantsembe akhuwa: ‘Ndokoni naye! Mpheni! Mpheni!’ Natenepa Piratu asudzula Baraba, na iwo akwata Yezu mbaenda kamupha.

Kutoma kwa masikati a Cixanu Yezu akhomerwa pamuti. Imwe nkhabe kwanisa kuaona pa cithunzithunzi, mbwenye ku khundu ibodzi na ibodzi ya Yezu kukhalimbo na phanga pamuti towera kufa. Mukadasala Yezu pang’ono na kufa, mbodzi wa mapanga alonga kwa iye: ‘Ndikumbukeni mungapita m’umambo wanu.’ Na Yezu atawira: ‘Ndikukupikira kuti unadzakhala na ine m’Paradizu.’

Kodi pikiro ineyi si yakudzumatirisa tayu? Kodi musadziwa paradizu akhalonga Yezu? Kodi paradizu adacita Mulungu pakutoma akhali kupi? Inde, akhali pa dziko yapantsi. Na munafuna kudzatonga Yezu kudzulu ninga mambo, iye anadzabweresa pontho mamuna uyu ku umaso towera atsanzaye m’Paradizu ipswa pa dziko yapantsi. Kodi ife nkhabe komerwa na pyenepi?