CITANI ANYAKUPFUNDZA
NSOLO 10
Phedzani Anthu Toera Akhale Anyakupfundza
Bhibhlya isalonga: “Ife tikhali dzololo, tayu basi toera kukumwazirani mphangwa zadidi za Mulungu, mbwenye toera kupereka umaso wathu thangwi ya imwe, thangwi imwe mwadzakhala anthu akufuniwa kakamwe na ife.”—1 Ates. 2:8.
Yezu acitanji?
1. Onani VIDHYU, peno lerini Juwau 3:1, 2. Buluka penepo onani mibvundzo iyi:
-
Kuna imwe, thangwi yanji Nikodhemu aenda kacedza na Yezu namasiku?—Onani Juwau 12:42, 43.
-
Pidatawira iye kucedza na Nikodhemu namasiku, kodi Yezu apangiza tani kuti akhawangisira kakamwe toera kucita anyakupfundza?
Tisapfundzanji na Pidacita Yezu?
2. Ife tinapangiza kuti tisafuna anthu tingawangisira toera kuaphedza kuti akhale anyakupfundza.
Towezerani Yezu
3. Pfundzani pa ndzidzi na mbuto yakuthema kuna nyakupfundza. Panango nyakupfundza wanu anasankhula ntsiku na ndzidzi unafuna iye. Kodi iye anakhala wakusudzuka kupfundza kubasa kwace, panyumba pace peno pa mbuto inango? Wangisirani toera kucinja ndandanda yanu toera ibverane na pinafuna nyakupfundza wanu.
4. Pfundzani mwakukhonda phonya. Khala munabulukapo, citani masasanyiro toera nyakupfundza apitirize kupfundza. Bvundzikani:
-
Pinakwanisika kucitisa pfundziro ntsiku inango nkati mwa sumana ineyi?
-
Pinakwanisika kuphatisira ntokodzi peno vidhyukonferensya toera kucitisa pfundziro?
-
Pinakwanisika kuphemba m’mwazi mphangwa unango toera acitise pfundziro?
5. Citani phembero toera mukhale na maonero adidi. Phembani Yahova toera akuphedzeni kuti mupitirize kuphedza nyakupfundza wanu, maseze m’midzidzi inango pisanentsa kuna iye kupfundza mwakukhonda phonya peno kuphatisira pinapfundza iye. (Afil. 2:13) Panango nyakupfundza wanu ali na makhaliro mazinji adidi; phembani Yahova kuti akuphedzeni toera kuona makhaliro anewa.
