Bhibhlya ndi mafala adalembeswa na Mulungu toera kulonga na ife tonsene. Ife tisafunika kuipfundza toera tidziwe Mwanaciro. (Juwau 17:3; 2 Timoti 3:16) MʼBhibhlya, Yahova Mulungu asapangiza cifuniro cace kuna anthu na dziko yapantsi.—Genesi 3:15; Apokalipse 21:3, 4.

Nkhabepo bukhu inango yakuti isaphedza kakamwe anthu kupiringana Bhibhlya. Bhibhlya isatiphedza toera kupangiza makhaliro a Yahova ninga ufuni, kukoma ntima na ntsisi. Iyo isapasa anthu cidikhiro na kuaphedza toera kupirira nyatwa ngakhale zakunentsa kakamwe. Pontho isapangiza makhaliro a dziko ino akuti nee asabverana na pinafuna Mulungu.—Masalmo 119:105; Ahebheri 4:12; 1 Juwau 2:15-17.

Pakutoma Bhibhlya ikhadalembwa Mucihebheri, Muciaramaki na Mucigerego, pontho yathumburuzwa yonsene peno khundu ibodzi mu pilongero pyakupiringana 3.000. Nkhabepo bukhu inango yakuti yathumburuzwa mu pilongero pizinji mbigawizwa pa dziko yonsene yapantsi ninga Bhibhlya. Ndi pyenepi pikhadikhira ife. Profesiya inango ya Bhibhlya isalonga: “Mphangwa zadidi za Umambo [mphangwa zinagomezerwa kakamwe mʼBhibhlya] zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala kunadzafika.”—Mateu 24:14.

Thangwi yakudzindikira kufunika kwa mphangwa za mʼBhibhlya, cifuniro cathu cikhali kuthumburuza Bhibhlya yakuti nee ndi yakusiyana na mabukhu akutoma, pontho yakubveka mwadidi na yakukhonda nentsa kuleri. Mu Apendise A muli na nsolo wakuti “Pitsogolero Toera Kuthumburuza Bhibhlya,” “Pinthu Pinagumanika mʼBhibhlya Ino” na “Bhibhlya Yafika Tani Mpaka Lero.” Misolo ineyi isafokotoza pitsogolero pidaphatisirwa toera kuthumburuza Bhibhlya, pontho isafokotoza mabvekero a pinthu pinango pinagumanika mʼBhibhlya ino.

Ale akuti asafuna Yahova Mulungu, pontho akuti asamulambira, asafuna Bhibhlya yakunyindirika na yakubveka mwadidi. (1 Timoti 2:4) Na thangwi ineyi, ife tabulusa Bhibhlya ino ya Cisena toera kukwanirisa cifuniro cathu cakuthumburuza Bhibhlya ya Dziko Ipswa mu pilongero pizinji. Ife tisacita phembero, pontho tisadikhira kuti imwe anyakuleri athu munakomerwa na kuleri Bhibhlya ino mu ndzidzi unawangisira imwe toera ‘kusaka Mulungu mbamunʼgumana.’—Mabasa 17:27.