Masalmo 68:1-35
Kuna nyakutsogolera nyimbo. Nyimbo ya Dhavidhi. Nyimbo.
68 Mulungu mbalamuke, pontho anyamalwa ace mbabalalike,Onsene anamuida mbathawe pamaso pace.+
2 Athamangiseni ninga munamburuswa utci na mphepo;Ninga upula wakuti usanyunguluka ungakhala dhuzi na moto,Mbaphiwe anyakuipa pamaso pa Mulungu.+
3 Mbwenye anyakulungama mbatsandzaye;+Iwo mbatsandzaye kakamwe pamaso pa Mulungu;Iwo mbakomerwe kakamwe na kutsandzaya.
4 Imbirani Mulungu; imbani nyimbo toera kusimba dzina yace.+
Imbirani Ule anapita na nʼthando yakuzwerera.*
Dzina yace ndi Yahova!*+ Komerwani pamaso pace!
5 Baba wa ana aumphawi* na ntsidzikizi* wa akazi azice+Ndi Mulungu, ule anakhala pa mbuto yace yakucena.+
6 Kuna anthu adasowa ciphedzo, Mulungu asaapasa nyumba toera akhale;+Asasudzula anyakaidi mbaaphedza toera pinthu piafambire mwadidi.+
Mbwenye anthu akukhonda bvera* anakhala mu dziko yakupiswa na dzuwa.+
7 Mulungu, pidatsogolera imwe* mbumba yanu,+Pidapita imwe na nʼthando, (Sela)
8 Dziko yapantsi yatekenyeka;+Madzi abvumba* buluka kudzulu thangwi ya imwe Mulungu;Phiri ya Sinai yatekenyeka thangwi ya imwe Mulungu, Mulungu wa Izraeli.+
9 Mulungu, imwe mwacitisa kuti madzi abvumbe kakamwe;Imwe mwapasa pontho mphambvu mbumba* yanu yakuti ikhadaneta.
10 Iwo akakhala mʼmisasa yanu;+Mulungu, thangwi ya udidi wanu, imwe mwapasa anyakutcerenga pikhafuna iwo.
11 Yahova asapereka ntemo;Akazi anamwaza mphangwa zadidi ndi nsoka ukulu wa anyankhondo.+
12 Amambo na anyankhondo awo asathawa,+ iwo asathawa!
Nkazi anakhala panyumba asapaswambo unthaka.+
13 Maseze imwe mukhagona nʼkhundu mwa moto pa misasa,*Imwe munadzatambira nkhangaiwa yakuti maphapido ace akhwazwa parata,Pontho manthenga ace ndi a ouro yadidi kakamwe.
14 Mulungu Wamphambvu Zonsene pidabalalisa iye amambo a dziko ineyi,*+Matalala agwa mu Zalmoni.*
15 Phiri ya ku Bhasani+ ndi phiri ya Mulungu;*Phiri ya ku Bhasani iri na ntsonga zizinji.
16 Imwe mapiri a ntsonga zizinji, thangwi yanji musayangʼana mwabibvuPhiri idasankhula* Mulungu toera iye akhalepo?+
Inde, Yahova anadzakhala penepo kwenda na kwenda.+
17 Ngolo za nkhondo za Mulungu ndi pikwi pizinji kakamwe.+
Yahova abuluka kuphiri ya Sinai mbapita mʼmbuto yakucena.+
18 Imwe mwakwira kudzulu;+Imwe mwakwata mabitcu;Mwakwata amuna ninga miyoni,+Inde, imwe Yahova* Mulungu mwakwata ngakhale anthu akukhonda bvera+ toera mukhale pakati pawo.
19 Mbasimbwe Yahova wakuti ntsiku zonsene asathukula mitolo yathu,+Mulungu wandimomwene wakuti ndi mpulumusi wathu. (Sela)
20 Mulungu wandimomwene ndi Mulungu anatipulumusa;+Yahova Mbuya Wankulu Kakamwe asapereka njira yakupulumukira pakuthimbana na kufa.+
21 Inde, Mulungu anadzanyedza misolo ya anyamalwa ace,Misolo ya anthu onsene anapitiriza kufamba mʼmadawo awo.+
22 Yahova alonga: “Ine ndinadzaabulusa ku Bhasani;+Ine ndinadzaabulusa mʼbara yakuzika kakamwe,
23 Toera ubvike manyalo ako mu ciropa ca anyamalwa,+Pontho toera malirimi a anambwa ako anyangute ciropa ca anyamalwa.”
24 Mulungu, anthu anadzaona kufamba kwa misoka yanu yakuwina,Misoka yakuwina ya Mulungu wanga na Mambo wanga, mbikaenda ku mbuto yakucena.+
25 Anyakuimba ali patsogolo, nduli mwawo muna anyakuimba pyakuimba napyo pya nkhambala;+Pakati pawo pana atsikana akuti akuimba mapandero.+
26 Simbani Mulungu pa mpingo ukulu;Simbani Yahova, imwe adabuluka kuna Phata* ya Izraeli.+
27 Kweneko iwo akukundwa na dzindza ingʼono ya Bhenjamini,+Pontho atsogoleri a Yuda na mwinji wawo wakuti ukakhuwa mwakutsandzaya,Atsogoleri a Zebhuloni na atsogoleri a Nafitali.
28 Mulungu wako alonga kuti unadzakhala wamphambvu.
Imwe Mulungu, pangizani mphambvu zanu, imwe wakuti musatiphedza.+
29 Thangwi ya templo yanu ya ku Yerusalemu,+Amambo anadzakubwereserani miyoni.+
30 Sandikani pikala pinakhala mʼmitete,Sandikani nkumbi wa ngʼombe+ na anawo,Mpaka madzindza agodame mbabweresa* pinthu pya parata.
Mbwenye iye asabalalisa mbumba zinakomerwa na nkhondo.
31 Pinthu pya nkuwa* pinadzabwereswa* bulukira ku Ejitu;+Kusi anadzaenda mwakucimbiza toera kapereka miyoni kuna Mulungu.
32 Imwe amambo a pa dziko yapantsi, imbirani Mulungu,+Imbani nyimbo toera kusimba Yahova, (Sela)
33 Imbirani ule wakuti asafamba kudzulu kakamwe, kwakuti kulipo kutomera kale kakamwe.+
Bveserani! Iye asadhima na fala yace, fala yace yamphambvu.
34 Dzindikirani mphambvu za Mulungu.+Utongi wace ukulu uli kuna Izraeli,
Pontho mphambvu zace ziri kuthambo.*
35 Anthu asafunika kugopa na kulemedza Mulungu wakuti ali pa mbuto yace yakucena.+
Iye ndi Mulungu wa Izraeli,Ule anapereka ciwangiso na mphambvu kuna mbumba yace.+
Simbani Mulungu.
Pidzindikiro Pyapantsi
^ Munjira inango: “mʼmakole.”
^ Fala na Fala: “Yah.” Yah ndi dzina ya Yahova ingalembwa mwacigwagwa.
^ Peno: “ana adaferwa na pai.”
^ Fala na Fala: “ntongi.”
^ Peno: “anthu akupanduka.”
^ Fala na Fala: “pidaenda imwe patsogolo pa.”
^ Fala na Fala: “adjodja.”
^ Fala na Fala: “unthaka.”
^ Munjira inango: “mʼmathanga a mabira.”
^ Fala na Fala: “amambo ace.”
^ Peno: “Pikhali ninga matalala agwa mu Zalmoni.”
^ Peno: “phiri ikulu kakamwe.”
^ Peno: “idakomerwa na.”
^ Fala na Fala: “Yah.” Yah ndi dzina ya Yahova ingalembwa mwacigwagwa.
^ Peno: “Tsinde.”
^ Munjira inango: “mbaponda.”
^ Peno: “bhronzi.”
^ Munjira inango: “Aimiriri anadzabwera.”
^ Fala na Fala: “mʼmakole.”
