Ezekiyeli 1:1-28
1 Pa ntsiku yacixanu ya mwezi wacinai wa caka 30, pikhali ine pakati pa mbumba idaendeswa ku ubitcu,+ cifupi na nkulo wa Kebhari,+ kudzulu kwafunguka, mbanditoma kuona masomphenya a Mulungu.
2 Pa ntsiku yacixanu ya caka cacixanu ca ubitcu wa Mambo Yeowakimu,+
3 Ezekiyeli* mwana wa nyantsembe Bhuzi, atambira mafala a Yahova pikhali iye mu dziko ya Akaldheya,+ cifupi na nkulo wa Kebhari. Pa mbuto ineyi, mphambvu ya nzimu wa Yahova yatoma kuphata basa muna iye.*+
4 Mu ndzidzi ukhayangʼanisa ine, ndaona mphepo yamphambvu+ ikhabwera buluka kunkwiriro, pontho pakhali khole ikulu kakamwe na malirimi a moto,+ akuti ceza cawo cikhali cikulu kakamwe nʼkhundu, pontho pakati pa moto pakhali na cinthu cikhaoneka ninga utale wakuyetimira.+
5 Pakati pa moto unoyu, pakhali aanju anai+ akuti mʼbodzi na mʼbodzi, maonekero ace akhali ninga a munthu.
6 Mʼbodzi na mʼbodzi wa aanju anewa, akhali na nkhope zinai na maphapido manai.+
7 Miyendo yawo nee ikhafunyika, pantsi pa manyalo awo pakhali ninga pantsi pa nyondo ya mwanangʼombe. Pontho miyendo yawo ikhayetimira ninga nkuwa udamala kupukutwa mwadidi.+
8 Mʼmaphapido manai ene a anju mʼbodzi na mʼbodzi mukhali na manja ninga a munthu. Aanju anewa anai akhali na nkhope, pontho na maphapido.
9 Maphapido awo akhagwentsana* inango na indzace, pikhaenda iwo nee akhazungunuka, mʼbodzi na mʼbodzi wa iwo akhaenda kutsogolo.+
10 Nkhope za aanju anewa zikhali na maonekero awa: Mʼbodzi na mʼbodzi wa aanju anewa anai akhali na nkhope ya munthu, akhali na nkhope ya nkhalamu+ kukhundu yamadyo, kukhundu yabzwere akhali na nkhope ya ngʼombe,+ pontho mʼbodzi na mʼbodzi akhali na nkhope+ ya capungu.+
11 Anewa akhali maonekero a nkhope zawo, maphapido awo akhali akufuthuka padzulu pawo. Mʼbodzi na mʼbodzi akhali na maphapido mawiri akuti akhagwentsana,* maphapido anango mawiri akhaphimbira manungo awo.+
12 Mʼbodzi na mʼbodzi wa iwo akhaenda kutsogolo, konsene kwene kukhaatsogolera nzimu wa Mulungu toera kuenda,+ iwo akhaenda kukhundu ineyi. Pikhaenda iwo, nee akhazungunuka.
13 Aanju anewa akhaoneka ninga makala a moto. Pakati pa aanju anewa pakhafamba-famba pinthu pyakulandana na nyale zakugaka pyakuti pikhaenda uku na uku. Pontho ceza cikhacetuma pa moto unoyu.+
14 Aanju anewa pikhaenda iwo kutsogolo mbabwerera nduli, akhafamba mwakucimbiza kakamwe ninga kucetuma.
15 Pikhayangʼanisa ine aanju anewa, ndaona roda pantsi, ikhali pakhundu pa anju mʼbodzi na mʼbodzi akuti akhali na nkhope zinai.+
16 Maroda anewa na maonekero awo, akhayetimira ninga mwala wa krizolito, pontho maroda manai ene akhali sawasawa. Maonekero awo na makhaliro awo, akhali ninga kuti roda ibodzi ikhali nkati mwa roda indzace.*
17 Mu ndzidzi ukhafamba iwo, maroda mbadakwanisa kuenda kukhundu ibodzi na ibodzi mwa makhundu manai, mbakhonda kuzungunuka mu ndzidzi ukhaenda iwo.
18 Maroda ace akhali akulapha kakamwe munjira yakudzumisa, pontho maroda manai ene akhadadzala na maso adazungulira nʼkhundu monsene.+
19 Ndzidzi onsene ukhafamba aanju anewa, maroda akhafambambo pabodzi na iwo, mu ndzidzi ukhathukuka aanju buluka pantsi, maroda akhathukukambo.+
20 Iwo akhaenda kukhaatsogolera nzimu toera kuenda, konsene kwene kukhaenda nzimu. Maroda akhathukukambo pabodzi na aanju, thangwi nzimu ukhatsogolera aanju anewa, ukhalimbo mʼmaroda.
21 Mu ndzidzi ukhafamba aanju, maroda akhafambambo, mu ndzidzi ukhalimira iwo, maroda akhalimirambo, mu ndzidzi ukhathukuka aanju pantsi, maroda akhathukukambo pabodzi na iwo, thangwi nzimu ukhatsogolera aanju anewa, ukhalimbo mʼmaroda.
22 Padzulu pa misolo ya aanju anewa, pakhali na mbuto yakuyetimira na yakudzumisa, yakuti ikhali ninga jelo, idathasikwa padzulu pa misolo yawo.+
23 Pantsi pa mbuto ineyi, maphapido awo akhadafuthuka, ibodzi mbigwentsana na indzace. Anju mʼbodzi na mʼbodzi akhali na maphapido mawiri toera kuphimbira khundu ibodzi ya manungo, pontho anango mawiri toera kuphimbira khundu inango.
24 Pidabva ine dungu ya maphapido awo, ikhali ninga kutitima kwa madzi amphambvu, ninga fala ya Wamphambvu Zonsene.+ Pikhaenda iwo, akhabveka ninga nsoka wa anyankhondo. Pikhalimira iwo, akhagwisa maphapido awo.
25 Padzulu pa mbuto ikhali padzulu pa misolo yawo, pakhabuluka fala. (Pikhalimira iwo, akhagwisa maphapido awo.)
26 Padzulu pa mbuto ikhali padzulu pa misolo yawo, pakhali na cinthu cakulandana na mwala wa safira,+ cakuti cikhaoneka ninga mpando waumambo.+ Pa mpando unoyu waumambo, wakuti ukhali padzulu, alipo adakhala pantsi penepo, wakuti akhaoneka ninga munthu.+
27 Ine ndaona cinthu cikhagaka ninga utale wakuyetimira+ ninga moto wakuti ukhagaka, ukhaoneka kutomera ncunu mwace kuenda kudzulu. Pontho, kutomera ncunu mwace kuenda pantsi, ndaona cinthu cakulandana na moto.+ Nʼkhundu mwace monsene mukhali na ceza cakugaka,
28 ninga ceza ca utawaleza*+ unaoneka pa makole pa ntsiku inabvumba madzi. Anewa akhali maonekero a ceza cikhagaka nʼkhundu mwace, cikhaoneka ninga mbiri ya Yahova.+ Pidaona ine pyenepi, ndagodama, mbandikotamisa nsolo wanga mpaka pantsi, mbanditoma kubva fala ya munthu akhalonga.
Pidzindikiro Pyapantsi
^ Dzina ineyi isabveka “Mulungu Asawangisa.”
^ Fala na Fala: “iye aphatwa na djanja ya Yahova.”
^ Peno: “akhakhuyana.”
^ Peno: “akhakhuyana.”
^ Munjira inango: “akhali maroda a nʼdida ubodzi ene, mbapitisirana inango na indzace.”
^ Peno: “utazimu.”
