Atongi 3:1-31
3 Awa ndi madzindza adatawiriswa na Yahova kupitiriza toera ayesere Aizraeli onsene akuti nee atamba nkhondo zidaoneka mu dziko ya Akanani.+
2 (Iye asiya madzindza anewa apitirize basi ene toera Aizraeli akuti adzati kutamba nkhondo, atambe nkhondo mbapfundza kumenya nkhondo).
3 Madzindza anewa akhali amambo axanu a Afilisti,+ na Akanani onsene, Asidhoni+ na Aeveu+ akakhala Kuphiri ya Libhano,+ kutomera Kuphiri ya Bhaale-Ermoni mpaka ku Lebho-Amati.*+
4 Madzindza anewa akhayesera Aizraeli toera kuona khala iwo mbadabvera matongero a Yahova adapereka iye kuna ababawo kubulukira kuna Mose.+
5 Natenepa, Aizraeli akakhala pabodzi na Akanani,+ Aeti, Aamori, Aperesi, Aeveu na Ayebusi.
6 Aizraeli akhakwata ana akazi a madzindza anewa toera akhale akazawo, iwombo akhakwata anawo akazi mbaapereka kuna ana amuna a madzindza anewa. Penepo Aizraeli atoma kutumikira alungu+ a madzindza anewa.
7 Natenepa, Aizraeli acita pinthu pyakuipa pamaso pa Yahova, pontho aduwala Yahova Mulungu wawo, mbatumikira Abhaale+ na mizati ikhalambirwa+ na madzindza anewa.
8 Na thangwi ineyi Yahova aipirwa na Aizraeli, mbaapereka* mʼmanja mwa Kusani-Risataimi, mambo wa ku Mezopotamya.* Aizraeli atumikira Kusani-Risataimi pyaka pisere.
9 Aizraeli pidaphemba iwo ciphedzo+ kuna Yahova, Yahova apereka Otiniyeli+ mwana wa Kenazi, ngʼono wace Kalebe toera aapulumuse.+
10 Nzimu wa Yahova ukhali na iye,+ mbakhala nyakutonga miseru wa Aizraeli. Pidaenda iye kunkhondo, Yahova apereka mʼmanja mwace Kusani-Risataimi mambo wa ku Mezopotamya,* natenepa iye akunda Kusani-Risataimi.
11 Buluka penepo dziko yakhala muntendere* pyaka 40. Natenepa, Otiniyeli mwana wa Kenazi afa.
12 Buluka penepo, Aizraeli atoma pontho kucita pinthu pyakuipa pamaso+ pa Yahova. Natenepa, Yahova atawirisa Egloni mambo wa ku Moabhe+ kukhala wakuwanga kakamwe kupiringana Aizraeli, thangwi iwo acita pinthu pyakuipa pamaso pa Yahova.
13 Kusiyapo pyenepi, iye abweresa Aamoni+ na Amaleki+ toera kumenyana na iwo. Iwo amenyana na Aizraeli mbakwata nzinda wa miti+ ya micindu.
14 Aizraeli atumikira Egloni, mambo wa ku Moabhe mu pyaka 18.+
15 Aizraeli aphemba ciphedzo+ kuna Yahova. Natenepa Yahova aapasa mpulumusi,+ Eudhi+ mwana wa Jera wa dzindza ya Bhenjamini+ wakuti akhaphatisira nkono wabzwere.+ Mukupita kwa ndzidzi, Aizraeli atumiza na iye miyoni* ikhaphemba mambo Egloni wa ku Moabhe.
16 Eudhi mbadzati kuenda, asasanya supada yakuceka uku na uku ya kovadho* ibodzi ya ulaphi, aiikha ncunu mwace kukhundu yamadyo mbaiphimbira na nguwo zace.
17 Pidafika iye kuna Egloni mambo wa ku Moabhe, apereka muoni. Egloni akhali mamuna wakukhuma kakamwe.
18 Eudhi pidamala iye kupereka muoni, iye pabodzi na amuna adathukula muoni abuluka mbaenda.
19 Mbwenye pidafika iye pa mbuto ya madzimunthu akusemwa* ku Jiligale,+ abwerera kuna mambo mbampanga: “Mambo, ndiri na mphangwa zacibisobiso toera kukupangani.” Natenepa mambo alonga: “Tomani buluka pangʼono!” Penepo atumiki ace onsene abuluka.
20 Natenepa Eudhi afendedzera mambo mu ndzidzi ukhali iye ekhene pa mbuto yace yakutonthola mwadidi nkwartu yace yandzulu. Buluka penepo Eudhi alonga: “Ndiri na mphangwa za Mulungu toera kukupangani.” Natenepa iye alamuka pa mpando wace waumambo.
21 Eudhi asolola supada ikhali ncunu mwace kukhundu yamadyo na nkono wace wabzwere, mbaitukumiza mʼmimba mwa Egloni.
22 Supada yonsene yapita na ciphatiro cene, mbiphimbirika na mafuta thangwi iye nee akhadaibulusa mʼmimba mwace, pontho abuluka matubzwi.
23 Eudhi abuluka na pakhonde* mbafunga misuwo ya kwartu yandzulu.
24 Pidaenda iye, atumiki a mambo abwerera mbaona kuti misuwo ya kwartu yandzulu ikhadafungwa. Natenepa iwo alonga: “Panango iye ali ncimbuzi nkwartu yakutonthola.”
25 Iwo adikhira kakamwe mbatoma kudzudzumika, thangwi akhaona kuti misuwo ya kwartu yandzulu iciri yakufungwa. Natenepa iwo akwata xavi mbafungula misuwo ineyi. Penepo iwo agumana mbuyawo ali thasa pantsi, wakufa!
26 Mu ndzidzi ukhanyerezera iwo kuti pyenepi pyacitika tani, Eudhi athawa. Iye apita na pa mbuto ya madzimunthu+ akusemwa* mbafika ku Seira.
27 Pidafika iye kucisa ca mapiri ca Efraimu,+ iye atoma kuliza nyanga.+ Natenepa, Aizraeli atcita buluka kucisa ca mapiri iye mbakhala patsogolo pawo.
28 Penepo iye aapanga: “Nditowereni thangwi Yahova apereka mʼmanja mwanu Amoabhe akuti ndi anyamalwa anu.” Natenepa iwo antowera mbafunga mbuto zinawambuka na anthu Yordani toera Amoabhe acimwane kuwambuka, pontho nee mʼbodzi adatawirisa iwo kuwambuka.
29 Pa ndzidzi unoyu, iwo apha Amoabhe+ cifupi na 10.000, onsene akhali amuna amphambvu na acipapo; nee mʼbodzi adapulumuka.+
30 Natenepa Izraeli akunda Moabhe pa ntsiku ineyi; pontho dziko yakhala muntendere pyaka 80.+
31 Eudhi apitirwa mbuto na Sangari+ mwana wa Anate, wakuti aphatisira muti wakusongoka wakukumbiza nawo ngʼombe+ mbapha nawo amuna a Afilisti+ akukwana 600; iye apulumusambo Aizraeli.
Pidzindikiro Pyapantsi
^ Peno: “nsuwo wa Amati.”
^ Fala na Fala: “mbaagulisa.”
^ Fala na Fala: “Aramu-Naaraimu.”
^ Fala na Fala: “Aramu.”
^ Fala na Fala: “dziko yapuma.”
^ Miyoni ineyi ikhali ninga nsonkho.
^ Panango ikhali kovadho yakubvira ya masentimetru cifupi na 38. Onani Apendise B14.
^ Munjira inango: “mbuto inakumbwa miyala.”
^ Munjira inango: “panapita na mphepo.”
^ Munjira inango: “mbuto inakumbwa miyala.”
