Atongi 20:1-48
-
Nkhondo na dzindza ya Bhenjamini (1-48)
20 Natenepa, amuna onsene a Aizraeli kutomera ku Dhani+ mpaka ku Bhersebha na a ku dziko ya Jiliyadhi,+ agumanyikana pabodzi pene pamaso pa Yahova ku Mispa.+
2 Akulu a mbumba na madzindza onsene a Izraeli alimira pa nsonkhano* wa mbumba ya Mulungu, pontho anyankhondo 400.000 akhali na masupada.+
3 Anthu a dzindza ya Bhenjamini abva kuti Aizraeli akhadaenda ku Mispa.
Natenepa Aizraeli abvundza: “Tipangeni, pinthu pyenepi pyakuipa pyacitika tani?”+
4 Penepo, Mulevi+ mamunace nkazi adaphiwa atawira: “Ine na nkazanga tafika ku nzinda wa Jibheya,+ wakuti ndi wa Bhenjamini toera kugona kweneko.
5 Amuna a ku Jibheya agumanyikana namasiku mbazungulira nyumba ikhali ine. Iwo akhafuna kundipha, mbwenye mʼmbuto mwakupha ine, iwo athabusa nkazanga, mbamʼpha.+
6 Natenepa ine ndakwata manungo a nkazanga, ndaagwanda mʼmapindi, mbandiatumiza kuna madzindza onsene a Izraeli,+ thangwi iwo acita pinthu pyakupasa manyadzo mu Izraeli.
7 Imwe mbumba yonsene ya Aizraeli, longani pano maonero anu+ na uphungu wanu.”
8 Penepo mbumba yonsene yatawira pabodzi pene kuti: “Nee mʼbodzi wa ife anafuna kuenda ku nsasa wace peno kunyumba kwace.
9 Pinafuna kucita ife na Jibheya ndi ipi: Tinasaka cidzindikiro ca Mulungu*+ toera kudziwa kuti mbani anafuna kuenda kamenyana nawo.
10 Pa amuna 100 a madzindza onsene a Izraeli ife tinakwata amuna 10, pa amuna 1.000 tinakwata amuna 100, pontho pa amuna 10.000 tinakwata amuna 1.000. Amuna anewa anadzasakira anyankhondo pinthu pinafuna iwo toera anyankhondo amenyane na nzinda wa Jibheya wa ku Bhenjamini thangwi ya pinthu pyakupasa manyadzo pidacita iwo mu Izraeli.”
11 Natenepa anyankhondo onsene a Izraeli agumanyikana pabodzi toera kumenyana na nzinda wa Jibheya.
12 Buluka penepo, madzindza a Izraeli atuma amuna kuna akulu onsene a dzindza ya Bhenjamini, mbalonga: “Thangwi yanji pinthu pyenepi pyakuipa pyacitika kuna imwe?
13 Tipaseni amuna akuipa a mu Jibheya+ toera tiaphe, mbatibulusa uipi unoyu mu Izraeli.”+ Mbwenye dzindza ya Bhenjamini nee yabvera pidalonga abale awo, Aizraeli.
14 Buluka penepo, anthu a dzindza ya Bhenjamini abuluka mʼmizinda yawo, mbagumanyikana ku Jibheya toera kuenda kamenyana na anyankhondo a Izraeli.
15 Anthu a dzindza ya Bhenjamini adabuluka mʼmizinda yawo mbagumanyikana akhali akukwana 26.000. Iwo akhali anyankhondo akuti akhali na masupada, kusiyapo anyankhondo anango a maluso akukwana 700 a ku Jibheya.
16 Pakati pa anyankhondo anewa, akhalipo anyankhondo 700 a maluso akuti akhaphatisira nkono wabzwere. Anyankhondo anewa akhali na maluso kakamwe akuponya miyala,* pontho nee akhakhwitca.
17 Anyankhondo a Izraeli akuti akhali na masupada+ mbagumanyikana pabodzi akhali akukwana 400.000, kusiyapo amuna a ku Bhenjamini, pontho onsene akhali anyankhondo aluso.
18 Aizraeli aenda ku Bheteli kabvundza Mulungu+ kuti: “Mwa ife mbani anafuna kutitsogolera toera kuenda kamenyana na dzindza ya Bhenjamini?” Yahova aatawira: “Yuda anakutsogolerani.”
19 Mangwana mwace namacibese Aizraeli alamuka mbamanga misasa dhuzi na Jibheya toera kumenyana na nzinda unoyu.
20 Anyankhondo a Izraeli aenda kapakana ku Jibheya toera kumenyana na dzindza ya Bhenjamini.
21 Natenepa anthu a dzindza ya Bhenjamini abuluka ku Jibheya pa ntsiku ineyi, mbapha anyankhondo a Izraeli akukwana 22.000.
22 Mbwenye anyankhondo a Izraeli akhala na cipapo, mbapakana pontho pa mbuto ibodzi ene ya ntsiku yakutoma.
23 Buluka penepo Aizraeli aenda ku Bheteli, alira pamaso pa Yahova mpaka maulo mbabvundza Yahova kuti: “Tisafunika kuenda pontho kamenyana na abale athu a dzindza ya Bhenjamini?”+ Penepo Yahova atawira: “Ndokoni kamenyana nawo.”
24 Natenepa, Aizraeli aenda pontho pa ntsiku yaciwiri kuna dzindza ya Bhenjamini.
25 Anthu a dzindza ya Bhenjamini abuluka ku Jibheya toera kuenda kagumanikana nawo pa ntsiku yaciwiri, mbapha anyankhondo 18.000 a Izraeli,+ onsene akhali na masupada.
26 Natenepa anyankhondo onsene a Izraeli aenda ku Bheteli. Iwo alira, akhala pantsi pamaso pa Yahova,+ mbacita jejuu+ pa ntsiku ineyi mpaka namasiku, pontho apereka kuna Yahova ntsembe zakupiswa+ na ntsembe toera kupereka takhuta.+
27 Buluka penepo anyankhondo a Izraeli abvundza Yahova,+ thangwi mu ntsiku zenezi bokosi ya cibverano ca Mulungu wandimomwene ikhali kweneko.
28 Mu ndzidzi unoyu, Fineya+ mwana wa Eleazare, mwana wa Aroni, akhatumikira* dhuzi na bokosi ya cibverano. Iwo abvundza: “Tisafunika kuenda pontho kamenyana na abale athu, amuna a dzindza ya Bhenjamini peno nkhabe?”+ Yahova atawira: “Ndokoni, thangwi mangwana ine ndinadzaapereka mʼmanja mwanu.”
29 Natenepa Aizraeli atuma amuna toera kuenda kabisala+ mʼmakhundu onsene a nzinda wa Jibheya.
30 Aizraeli aenda pontho kuna dzindza ya Bhenjamini pa ntsiku yacitatu, pontho apakana toera kumenyana na Jibheya ninga pikhacita iwo mʼmaulendo anango.+
31 Pidabuluka dzindza ya Bhenjamini toera kuenda kaonana na anyankhondo, iwo aendeswa kutali na nzinda.+ Natenepa, ninga pidacitika mʼmaulendo anango, iwo atoma kupha anyankhondo 30 a Izraeli mʼmiseu yakunja kwa nzinda.+ Ubodzi mwa miseu ineyi ukhaenda ku Bheteli, unango ukhaenda ku Jibheya.
32 Penepo dzindza ya Bhenjamini yalonga: “Tiri kuakunda ninga pidacita ife mʼmaulendo anango.”+ Mbwenye Aizraeli alonga: “Tendeni tithawire ku miseu toera tiacitise kukhala kutali na nzinda.”
33 Natenepa, anyankhondo a Izraeli aenda kapakana ku Bhaale-Tamari toera kumenya nkhondo, mu ndzidzi ubodzi ene, Aizraeli akuti akhadabisala cifupi na Jibheya abuluka mʼmbuto zikhadabisala iwo.
34 Buluka penepo, anyankhondo a maluso akukwana 10.000 a Izraeli afika ku Jibheya mbamenya kakamwe nkhondo. Mbwenye dzindza ya Bhenjamini nee ikhadziwa kuti ikhali dhuzi toera kukundwa.
35 Yahova akunda dzindza ya Bhenjamini+ pamaso pa Aizraeli, pontho pa ntsiku ineyi Aizraeli apha anyankhondo akukwana 25.100 a dzindza ya Bhenjamini, onsene akhali na masupada.+
36 Pikhaona dzindza ya Bhenjamini kuti anyankhondo a Izraeli akuthawa, akhanyerezera kuti ali kuakunda.+ Mbwenye iwo akhathawa thangwi akhanyindira anyankhondo adabisala dhuzi na nzinda wa Jibheya.+
37 Anyankhondo akhadabisala, mwakukhonda dembuka akunda nzinda wa Jibheya. Pidapita iwo mu nzinda, apha na supada anthu onsene akhali mwenemo.
38 Anyankhondo a Izraeli akhadabverana na anyankhondo akhadabisala dhuzi na nzinda kuti mbadagasa moto mu nzinda toera utci ukhale cidzindikiro.
39 Pidatoma kuthawa anyankhondo a Izraeli, amuna a dzindza ya Bhenjamini apha anyankhondo 30 a Izraeli,+ pontho alonga: “Ife tiri kuakunda pontho ninga pidacita ife maulendo anango.”+
40 Mbwenye utci wakuti ukhali cidzindikiro watoma kukwira kudzulu buluka mu nzinda. Pidazungunuka amuna a dzindza ya Bhenjamini, aona kuti nzinda onsene uli kugaka moto.
41 Natenepa anyankhondo a Izraeli azungunuka mbatoma pontho kumenya nkhondo, mbwenye amuna a dzindza ya Bhenjamini afewa manungo, thangwi adzindikira kuti akundwa.
42 Na thangwi ineyi, iwo athawa anyankhondo a Izraeli mbaenda kuthando, mbwenye anyankhondo a Izraeli aatowera; pontho amuna akhabuluka mʼmizinda aaphambo.
43 Iwo azungulira anthu a dzindza ya Bhenjamini, aathamangisa mbakhonda kuapasa ndzidzi wakupuma. Iwo aapha dhuzi na Jibheya, kumabulukiro a dzuwa.
44 Pakumalisa, amuna akukwana 18.000 a dzindza ya Bhenjamini aphiwa, onsene akhali anyankhondo amphambvu.+
45 Amuna anango a dzindza ya Bhenjamini athawira nʼthando, kuphiri ya Rimoni,+ pontho Aizraeli apha mʼmiseu amuna 5.000 a dzindza ya Bhenjamini. Iwo apitiriza kuathamangisa mpaka ku Jidhomu; mbapha amuna anango akukwana 2.000.
46 Amuna onsene a dzindza ya Bhenjamini adaphiwa ntsiku ineyi akhali akukwana 25.000, iwo akhali na masupada,+ pontho akhali anyankhondo amphambvu.
47 Mbwenye amuna 600 athawira nʼthando, kuphiri ya Rimoni. Iwo akhala kuphiri ya Rimoni miyezi minai.
48 Pontho anyankhondo a Izraeli abwerera kuna dzindza ya Bhenjamini mbapha na supada pyonsene pikhali mʼmizinda, anthu na pinyama pyene. Kusiyapo pyenepi, iwo apisa na moto mizinda ineyi yonsene.
Pidzindikiro Pyapantsi
^ Fala na Fala: “mpingo.”
^ Iwo akhafuna kucita pinthu pyakuti mbapidapangiza cisankhulo ca Mulungu.
^ Fala na Fala: “Anyankhondo anewa akhakwanisa kulondeza tsisi ibodzi mbaimenya na mwala.”
^ Fala na Fala: “akhalimira.”
