Tsamba Kuna Akristu a ku Galasya 2:1-21
2 Buluka penepo, pidapita pyaka 14, ine ndaenda pontho ku Yerusalemu pabodzi na Bharnabhe,+ ndakwatambo Tito mbandienda naye pabodzi.+
2 Ine ndaenda kweneko thangwi ya masomphenya adaoneswa ine. Ine ndafokotozera abale mphangwa zadidi zinamwaza ine kuna anthu a madzindza anango. Mbwenye ndacita pyenepi pakhundu, pamaso pa amuna akulemedzeka, toera ndikhale na cinyindiro cakuti nee ndiri kuthamanga papezi, peno kuti nee ndathamanga papezi.*
3 Mbwenye Tito+ wakuti akhali pabodzi na ine, nee akakamizwa toera kusidzwa,+ maseze iye ndi Nʼgerego.
4 Mbwenye nkandzo unoyu waoneka thangwi ya abale authambi, adapita mwakubisala mu mpingo,+ iwo apita toera aone ufulu+ uli na ife thangwi yakuphatana kwathu na Kristu Yezu, toera atisanduze kudza mabitcu kakamwe;+
5 mbwenye ife nee taabvera,+ nee pangʼono pene, toera imwe mupitirize kukhala na undimomwene wa mphangwa zadidi.
6 Mbwenye ale akhatsogolera mpingo,+ nkhabe cinthu cipswa cidandipanga iwo, pontho mwakukhonda tsalakana kuti kale iwo akhali tani, ine nkhabe napyo basa, thangwi Mulungu nkhabe kutonga munthu mwakubverana na maonekero ace akunja.
7 Mbwenye iwo aona kuti ine ndapaswa basa yakumwaza mphangwa zadidi kuna anthu akukhonda sidzwa,+ ninga Pedhru adapaswambo basa yakumwaza mphangwa zadidi kuna anthu akusidzwa,
8 thangwi ule adapasa Pedhru mphambvu zakukwana toera akhale mpostolo kuna anthu akusidzwa, apasambo ine mphambvu toera ndikhale mpostolo kuna anthu a madzindza anango.+
9 Pontho, pidadzindikira iwo kukoma ntima kukulu kudapangizwa ine,+ Tiyago,+ Kefa na Juwau, akuti akhaoneka ninga mphanda* mu mpingo, atipasa manja na nkono wamadyo, ine na Bharnabhe+ ninga cipangizo cakuphatana kwathu,* toera ife tiende kuna anthu a madzindza anango, mbwenye iwo aende kuna anthu akusidzwa.
10 Basi ene iwo atiphemba toera tipitirize kukumbukira abale akutcerenga; natenepa, ine ndisawangisira kakamwe toera ndipitirize kucita pyenepi.+
11 Mbwenye pidafika Kefa*+ ku Antiyokiya,+ ine ndalonga naye* nkhope na nkhope mbandinsandika; thangwi iye akhadacita pinthu mwakuphonyeka.
12 Thangwi mbadzati kufika anthu adatumwa na Tiyago,+ iye akhadya pabodzi na anthu a madzindza anango;+ mbwenye pidafika iwo, iye asiya kucita pyenepi, mbapambulika, thangwi akhagopa anthu akusidzwa.+
13 Ayuda anango atomambo kucita pinthu mwaciphamaso* ninga iye, na Bharnabhe ene akwatikambo na* macitiro awo aciphamaso.*
14 Mbwenye pidaona ine kuti iwo nee akhafamba mwakubverana na undimomwene wa mphangwa zadidi,+ ine ndapanga Kefa* pamaso pa onsene: “Khala iwe, maseze ndiwe Muyuda, usakhala mʼmaso ninga munakhala anthu a madzindza anango, tayu ninga Ayuda, unakakamiza tani anthu a madzindza anango toera kukhala mʼmaso mwakubverana na miyambo ya Ayuda?”+
15 Ife akuti tabalwa ninga Ayuda, tayu ninga anthu akudawa a madzindza anango,
16 tisadzindikira kuti munthu asaoniwa ninga wakulungama basi ene thangwi yakukhulupira+ Yezu Kristu,+ tayu thangwi yakucita pinthu pinaphembwa na mwambo. Natenepa, ife tisakhulupira Kristu Yezu, toera tioniwe kuti ndife anthu akulungama thangwi yakukhulupira Kristu, tayu thangwi yakucita mabasa anaphembwa na mwambo, thangwi nkhabe munthu anafuna kudzaoniwa ninga wakulungama thangwi yakucita pinthu pinaphembwa na mwambo.+
17 Cincino, khala tisaoniwa ninga anyakudawa mu ndzidzi unawangisira ife toera kuoniwa ninga anthu akulungama kubulukira mwa Kristu, kodi pisabveka kuti Kristu ndiye anatikulumiza toera kucita madawo? Nee pangʼono pene!
18 Khala ine ndiri kumanga pontho pinthu pidamala ine kufudza kale, ndisapangiza kuti ndine nyakudawa.
19 Thangwi ya mwambo,+ ine ndafa toera ndikhonde kuutoweza, mbwenye toera ndikhale mʼmaso kuna Mulungu.
20 Cincino ine ndakhomerwa pamuti pabodzi na Kristu.+ Natenepa, ali mʼmaso sinebve tayu,+ mbwenye ndi Kristu wakuti ali mʼmaso muna ine. Mwandimomwene, umaso uli na ine cincino mʼmanungo mwanga, ine ndiri nawo thangwi yakukhulupira Mwana wa Mulungu,+ ule adandifuna mbaperekeka thangwi ya ine.+
21 Ine nkhabe kukhonda* kukoma ntima kukulu kwa Mulungu,+ thangwi khala munthu anadzaoniwa kukhala wakulungama thangwi yakubvera mwambo, mwandimomwene kufa kwa Kristu nkhabe basa.+
Pidzindikiro Pyapantsi
^ Peno: “toera kuona kuti basa ya utumiki ikhaphata ine, nee ndi yapezi.”
^ Peno: “matcikhwa, mizati.”
^ Peno: “cipangizo ca uxamwali.”
^ Peno: “ndansumula, ndamulongera.”
^ Asadziwikambo na dzina ya Pedhru.
^ Peno: “mwaumpfakafaka.”
^ Peno: “atowezerambo.”
^ Peno: “aumpfakafaka.”
^ Asadziwikambo na dzina ya Pedhru.
^ Peno: “kupwaza.”
