Kronika Waciwiri 10:1-19
-
Aizraeli asandukira Robhoamu (1-19)
10 Robhoamu aenda ku Sikemu,+ thangwi Aizraeli onsene akhadaenda ku Sikemu toera kun’khazikisa ninga mambo.+
2 Yerobhoamu+ mwana wa Nebhati pidabva iye pyenepi, mwakucimbiza abwerera buluka ku Ejitu (iye akhali ku Ejitu thangwi akhadathawa Mambo Salomoni).+
3 Natenepa iwo ancemeresa. Buluka penepo, Yerobhoamu na Aizraeli onsene aenda kaonana na Robhoamu, mbampanga:
4 “Babanu alemeresa mitolo yathu.+ Imwe mungafewesa basa yakuwanga idatipasa babanu, mbamululupisa mitolo yakulemera idatithukisa iye, ife tinakutumikirani.”
5 Penepo iye aapanga: “Bwererani kuna ine zingapita ntsiku zitatu.” Natenepa mbumba yaenda.+
6 Buluka penepo mambo Robhoamu abvundzisa amuna akulu* akuti Salomoni pai wace Robhoamu mbadzati kufa, akhadatumikira ninga anyakupereka uphungu kuna iye. Robhoamu aabvundza: “Ndi uphungu upi unafuna imwe kundipasa toera nditawire mbumba iyi?”
7 Iwo antawira: “Imwe mungakhala munthu wadidi kuna mbumba iyi, mungacita pinafuna iwo, pontho mbamuatawira mwadidi, ndzidzi onsene iwo anakhala atumiki anu.”
8 Mbwenye iye akhonda uphungu udapaswa iye na amuna akulu,* mbaenda kaphemba uphungu wa aphale adakula pabodzi na iye akuti pa ndzidzi unoyu akhali atumiki ace.+
9 Iye aabvundza: “Ndi uphungu upi unafuna imwe kundipasa toera titawire mbumba iyi idandipanga kuti: ‘Lulupisani mitolo yakulemera idatithukisa babanu’?”
10 Aphale adakula pabodzi na iye ampanga: “Mbumba idakupangani kuti: ‘Babanu alemeresa mitolo yathu, mbwenye imwe musafunika kuilulupisa,’ imwe musafunika kuipanga tenepa: ‘Cala canga cing’ono ca m’manja cinadzakhala cikulu kupiringana cunu ca babanga.
11 Babanga akuthukisani mitolo yakulemera, mbwenye ine ndinathimizira mitolo yanu. Babanga akutcunyusani na mitcamu, mbwenye ine ndinadzakutcunyusani na mitcamu ya minga.’”*
12 Yerobhoamu na mbumba yonsene, abwera kuna Robhoamu pa ntsiku yacitatu, ninga mukhadalongera mambo kuti: “Bwererani kuna ine zingapita ntsiku zitatu.”+
13 Mbwenye mambo aatawira mwaukali. Natenepa, Mambo Robhoamu akhonda uphungu wa amuna akulu.*
14 Iye aapanga mwakubverana na uphungu udapaswa iye na aphale, mbalonga: “Ine ndinadzathimizira mitolo yanu, inde, ndinailemeresa maningi. Babanga akutcunyusani na mitcamu, mbwenye ine ndinakutcunyusani na mitcamu ya minga.”
15 Natenepa mambo nee abvera mbumba, thangwi ndi Mulungu wandimomwene+ akhacitisa pinthu pyenepi toera akwanirisike mafala adalonga Yahova kuna Yerobhoamu mwana wa Nebhati kubulukira kuna Aiya+ wa ku Silo.
16 Nakuti mambo akhonda kubvera mbumba, Aizraeli onsene apanga mambo: “Ife nkhabe ubale na Dhavidhi! Unthaka wa mwana wa Yese mbukhale na iye. Imwe Aizraeli, m’bodzi na m’bodzi mbabwerere kuna alungu ace.* Imwe anthu a dzindza ya Dhavidhi,+ tsalakanani mwekhene umaso wanu!” Natenepa Aizraeli onsene abwerera m’manyumba* mwawo.+
17 Mbwenye Robhoamu apitiriza kutonga Aizraeli akakhala m’mizinda ya ku Yuda.+
18 Buluka penepo, Mambo Robhoamu atuma Adhoramu+ wakuti akhaonera ale akhacemerwa toera kuphata basa mwakukakamizwa, mbwenye Aizraeli am’menya na miyala mpaka kufa. Mambo Robhoamu akwanisa kukwira ngolo yace ya nkhondo mbathawira ku Yerusalemu.+
19 Natenepa Aizraeli apitiriza kusandukira dzindza ya Dhavidhi mpaka lero.
Pidzindikiro Pyapantsi
^ Peno: “akulu a mpingo.”
^ Peno: “na akulu a mpingo.”
^ Ineyi ikhali mitcamu ya nkhambala yakuti ikhali na utale ninga ncira wa kong’a.
^ Peno: “wa akulu a mpingo.”
^ Peno: “mbaende kalambira alungu ace.”
^ Fala na Fala: “m’makumbi.”
