Samweli Wakutoma 3:1-21
-
Samweli acemerwa toera akhale mprofeta (1-21)
3 Mu ndzidzi unoyu, mʼphale Samweli akhatumikira+ Yahova mbakatsogolerwa na Eli, mbwenye mu ntsiku zenezi anthu nee akhabva kazinji kene fala ya Yahova; pontho masomphenya+ nee akhaoneka kazinji kene.
2 Ntsiku inango Eli akhagona nkwartu mwace, maso ace akhadathowa; natenepa iye nee akhakwanisa kuona.+
3 Samweli akhagona mu templo*+ ya Yahova, mule mukhali Bokosi ya Mulungu. Nyale+ ikhadzati kuthimiswa nʼnyumba ineyi ya Mulungu.
4 Buluka penepo, Yahova acemera Samweli. Iye atawira: “Ndiri pano.”
5 Iye athamanga kuna Eli mbalonga: “Ndabwera, mwandicemera?” Mbwenye iye ampanga: “Nee ndakucemera. Ndoko kagone.” Natenepa iye aenda kagona.
6 Yahova ancemera pontho: “Samweli!” Penepo Samweli alamuka, aenda kuna Eli mbalonga: “Ndabwera, mwandicemera?” Mbwenye iye ampanga: “Mwananga, nee ndakucemera. Ndoko kagone.”
7 (Samweli akhadzati kudziwa mwadidi Yahova, pontho iye akhadzati kutambira mphangwa za Yahova.)+
8 Yahova ancemera pontho kacitatu: “Samweli!” Penepo Samweli alamuka, aenda kuna Eli mbalonga: “Ndabwera, mwandicemera?”
Natenepa Eli adzindikira kuti ndi Yahova akhacemera mwana unoyu.
9 Penepo Eli apanga Samweli: “Ndoko kagone, iye angakucemera pontho, tawira tenepa: ‘Longani Yahova, ine ntumiki wanu ndiri kubva.’” Samweli aenda pontho kagona.
10 Buluka penepo, Yahova ancemera pontho ninga pidacita iye maulendo anango: “Samweli, Samweli!” Penepo Samweli atawira: “Longani, ine ntumiki wanu ndiri kubva.”
11 Yahova apanga Samweli: “Ndisafuna kucita cinthu mu Izraeli cakuti anthu onsene anafuna kucibva, anadzatsukwala.*+
12 Pa ntsiku ineyi, ndinadzakwanirisa pyonsene pidalonga ine kuti ndinapicita kuna Eli na kuna anthu a panyumba pace, pinthu pyakutoma mpaka pyakumalisa.+
13 Usafunika kumpanga kuti ndinadzatcunyusa anthu a panyumba pace kwenda na kwenda thangwi ya madawo anadziwa iye,+ thangwi anace akutikana Mulungu,+ mbwenye iye nkhabe kuasandika.+
14 Na thangwi ineyi, ine ndadumbira kuti madawo a anthu a panyumba ya Eli cipo anadzalekererwa nee na ntsembe peno miyoni.”+
15 Samweli agona mpaka kunja kuca; pidalamuka iye afungula misuwo ya nyumba ya Yahova. Mbwenye Samweli akhagopa kupanga Eli masomphenya adaona iye.
16 Mbwenye Eli acemera Samweli: “Samweli mwananga!” Iye atawira: “Ndiri pano.”
17 Eli ambvundza: “Ninji pidakupanga iye? Ndaphata miyendo, leka kundibisira cinthu. Mulungu mbakutcunyuse kakamwe ungadibisira cibodzi mwa pinthu pyonsene pidakupanga iye.”
18 Natenepa Samweli ampanga pyonsene, nee kumʼbisira cinthu. Eli alonga: “Ndi Yahova adalonga pyenepi. Mbacite pinaona iye kukhala pyadidi.”
19 Samweli apitiriza kukula, pontho Yahova akhali na iye.+ Mulungu akwanirisa mafala onsene adalonga Samweli.
20 Aizraeli onsene kutomera ku Dhani mpaka ku Bhersebha adzindikira kuti Samweli asankhulwa toera akhale mprofeta wa Yahova.
21 Pontho Yahova apitiriza kuonekera ku Silo, thangwi ndi kweneko kudaonekera Yahova kuna Samweli, kubulukira mʼmafala a Yahova.+
