Kronika Wakutoma 15:1-29
15 Dhavidhi apitiriza kumanga nyumba zace mu Nzinda wa Dhavidhi; pontho iye akhunganya mbuto toera kuikha Bokosi ya Mulungu wandimomwene, mbaimangira nsasa.+
2 Penepo Dhavidhi alonga: “Nkhabe munthu unango asafunika kuthukula Bokosi ya Mulungu wandimomwene, basi ene isafunika kuthukulwa na Alevi, thangwi Yahova aasankhula toera kuthukula Bokosi ya Yahova, pontho toera antumikire ndzidzi onsene.”+
3 Buluka penepo, Dhavidhi agumanya Aizraeli onsene ku Yerusalemu toera aende kakwate Bokosi ya Yahova aibwerese pa mbuto idakhunganya iye toera kuiikha.+
4 Dhavidhi agumanya dzindza ya Aroni+ na Alevi:+
5 Mu dzindza ya Kowati, iye akwata ntsogoleri Urieli na abale ace akukwana 120;
6 Mu dzindza ya Merari, iye akwata ntsogoleri Azaya+ na abale ace akukwana 220;
7 Mu dzindza ya Jersoni, iye akwata ntsogoleri Yoeli+ na abale ace akukwana 130;
8 Mu dzindza ya Elizafani,+ iye akwata ntsogoleri Semaya na abale ace akukwana 200;
9 Mu dzindza ya Ebhroni, iye akwata ntsogoleri Eliyeli na abale ace akukwana 80;
10 Mu dzindza ya Uzieli,+ iye akwata ntsogoleri Aminadhabhu na abale ace akukwana 112.
11 Kusiyapo pyenepi, Dhavidhi acemeresambo anyantsembe Zadhoke+ na Abhiyatari,+ pabodzi na Alevi awa: Urieli, Azaya, Yoeli, Semaya, Eliyeli na Aminadhabhu,
12 mbaapanga: “Imwe ndimwe atsogoleri a mbumba za Alevi. Natenepa cenesekani, imwe pabodzi na abale anu, pontho bweresani Bokosi ya Yahova Mulungu wa Izraeli toera ikhale pa mbuto idakhunganya ine.
13 Thangwi paulendo wakutoma,+ imwe nee mwaithukula, na thangwi ineyi, Yahova Mulungu wathu apangiza ukali wace kuna ife,+ thangwi ife nee tasaka pitsogolero pyakuthema.”+
14 Natenepa, anyantsembe na Alevi aceneseka toera abwerese Bokosi ya Yahova Mulungu wa Izraeli.
15 Penepo Alevi athukula Bokosi ya Mulungu wandimomwene m’mapewa mwawo pa pimiti,+ ninga mudalonga Mose mwakubverana na mafala a Yahova.
16 Dhavidhi apanga atsogoleri a Alevi toera akhazikise abale awo akuti ndi anyakuimba toera aimbe mwakutsandzaya na pyakuimba napyo pya nkhambala, maarpa+ na pyakuimba napyo pya utale.+
17 Natenepa, Alevi asankhula Emani+ mwana wa Yoeli; mwa abale ace, iwo asankhula Azafe+ mwana wa Bherekiya; mwa abale awo a dzindza ya Merari, iwo asankhula Etani+ mwana wa Kusaya.
18 Iwo akhali pabodzi na abale awo a nsoka waciwiri:+ Zakariya, Bheni, Yazieli, Semiramoti, Jeiyeli, Uni, Eliabhe, Bhenaya, Maseya, Matitiya, Elifeleu, Mikineya, kuphatanizambo Obhedhi-Edhomi na Jeiyeli akuti akhali anyakuonera misuwo.
19 Anyakuimba Emani,+ Azafe+ na Etani akhafunika kuimba pyakuimba napyo pya nkuwa;+
20 Zakariya, Aziyeli, Semiramoti, Jeiyeli, Uni, Eliabhe, Maseya na Bhenaya akhaimba na pyakuimba napyo pya nkhambala mwakugaluza mbabulusa fala ya Alamoti;*+
21 Matitiya,+ Elifeleu, Mikineya, Obhedhi-Edhomi, Jeiyeli na Azaziya akhaimba maarpa mbabulusa fala ya Seminiti*+ toera kutsogolera nyimbo.
22 Kenaniya+ ntsogoleri wa Alevi ndiye akhaonera basa yakuthukula Bokosi, thangwi iye akhadziwa mwadidi basa ineyi,
23 Bherekiya na Elikana ndiwo akhaonera misuwo ya mbuto ikhali Bokosi.
24 Anyantsembe Sebhaniya, Yosafati, Netaneli, Amasai, Zakariya, Bhenaya na Eliezeri akhaliza matuluka mwakugaluza kutsogolo kwa Bokosi ya Mulungu wandimomwene,+ pontho Obhedhi-Edhomi na Yeiya akhalimbo anyakuonera misuwo ya mbuto ikhali Bokosi.
25 Dhavidhi na akulu a mbumba ya Izraeli, pabodzi na atsogoleri a misoka ya anthu 1.000 aenda mwakutsandzaya+ kunyumba kwa Obhedhi-Edhomi+ toera akakwate Bokosi ya Cibverano ca Yahova.
26 Nakuti Mulungu wandimomwene akhaphedza Alevi akhathukula Bokosi ya Cibverano ca Yahova, iwo apereka ntsembe ya ng’ombe zinomwe na mabira manomwe.+
27 Dhavidhi akhadabvala tunika yakusowa mikono ya nguwo yadidi, ninga pidacita Alevi onsene akhathukula Bokosi, anyakuimba na Kenaniya wakuti ndiye akhaonera basa yakuthukula Bokosi na anyakuimba. Dhavidhi akhadabvalambo efodhi wa linyu.+
28 Aizraeli onsene akhabweresa Bokosi ya Cibverano ca Yahova; iwo akhakhuwa mwakutsandzaya,+ mbaliza nyanga, matuluka+ na pyakuimba napyo pya utale. Iwo akhaimba mwakugaluza pyakuimba napyo pya nkhambala na maarpa.+
29 Mbwenye Bokosi ya Cibverano ca Yahova pidafika iyo mu Nzinda wa Dhavidhi,+ Mikale+ mwana wa Sauli ayang’ana na pajanela mbaona Mambo Dhavidhi akhanumpha-numpha mwakutsandzaya; penepo iye atoma kumpwaza muntima mwace.+
Pidzindikiro Pyapantsi
^ “Alamoti” ndi fala Yacihebheri yakuti mabvekero ace nkhabe dziwika. Panango ndi soprano yakuti ndi fala ing’ono ya atsikana peno aphale. Onani Mabvekero a Mafala Anango.
^ “Seminiti” ndi fala Yacihebheri yakuti isabveka fala ikulu yakuthowa ya cakuimba naco nyimbo. Onani Mabvekero a Mafala Anango.
