Iạ ne Fup‘ȧk te ta ‘atmại se‘ ‘e ‘isa. Ia kokon‘ȧk ‘is la fakse ta Ö‘fa mäeav hanisit. Tape‘ma, ‘eake ia ‘amnȧk‘ȧk la ‘is la väe ‘e iag ma noh puer se ‘isa. (Jeremaia 10:23) La fakse ta le‘ mea‘mea‘ het ne pa ‘es ‘e muạ‘ạkiag ne ‘on ö‘rua, ma ‘is ‘atakoa pa ‘es ‘e muạ‘ạkiag ‘on ‘Ạitu. (Aisea 48:17, 18) Puer‘ȧk te fak Puk Ha‘a, tefakhanisit ‘e ‘Ạitu ne naam muạ‘ạkiga.​—Hat 2 Timoti 3:16.

 Foh ‘on Jihova ma ‘on fäeag puer‘ạki rak‘ȧk se ‘isa sal pumuạ ne mạuri ‘e ‘on ‘i‘i, ma kel‘ȧk se ‘isa ‘os la po tapen ne ạlạlum‘ạkiạg ne mȧür se ‘es a‘ofiget ‘e avat ‘ut‘utum ‘og. ‘E reko ‘Ạitu ta fup‘ȧk se ‘is, ma nonoj kikia la ‘is la tạria ‘e ‘ofa ‘on muạ‘ạkiga.​—Hat Salamo 19:7, 11; Kel‘ȧk Tē 4:11.

 Puer‘ȧk te fak Puk Ha‘a iạ te ‘esav aier pumuet. Foho ‘e ta hanhap hoi‘ạkit, kop ma la pola a‘esav‘ȧk se ta kạinag fufu het. (Nā Hoi‘ạkiag Ne Foho 22:8) ‘Is kop la garue‘ạkia a‘häe ‘atmại la ‘inea ne muạ‘ạkiget la garue‘ȧk tapen se kạinag te ne soksoko. (Fäeag ‘Es Fuạga 2:10-12) La fakse, Puk Ha‘ heta rak‘ȧk ne mạuri iạ tefakhanisit ‘e ‘Ạitu. Puer‘ȧk te te‘is pola muạ‘ạkia ‘is ‘e ut ne ‘is garue, ‘os hanua, ma ‘e avat ne ‘is la‘ se ta utut. Ma na sal se ‘is la matạ‘ e te ne la ho‘im raksa‘a se ‘isa ma famör ne tore.​—Hat Garue 17:28.

 Jisu fäeag‘ạkia puer‘ȧk te ruạ ne ‘es‘ao ti‘ pumuạ se‘. ‘On tā, kel‘ạkia ‘amnȧk pạu ne mȧür  ‘on famori​—la inea ‘Ạitu, lạ hanis ‘e iag, ma la titi‘ȧk se iạ ‘e huạg aire. Puer‘ȧk te mumue ta kop la a‘häe‘ȧk ‘e ‘os hil te. ( Fäeag ‘Es Fuạga 3:6) Te‘ ne iris ne tạupir se puer‘ȧk te te‘is pola po hạikạinagag ‘elet ma ‘Aitu, ‘oaf‘oaf aire, ma mäür se ‘es tohiget.​—Hat Mataio 22:36-38.

 ‘On ruạ ne puer‘ȧk te la pola muạ‘ạkia ‘is la ‘is la noh hạia‘leleiag ma iris ne tore. (1 Korinita 13:4-7) Tạupiriag se‘on ruạ ne puer‘ȧk te ta laloag‘ạkia ‘os rakoag ne rere ‘on ‘Ạitu se famori.​—Hat Mataio 7:12; 22:39, 40.

 Puer‘ȧk te fak Puk Ha‘a rak‘ȧk se kạunohoga ‘oris la teag‘esea ‘e hanisi. (Kolosa 3:12-14) Fäeag ‘on ‘Ạitu pär tape‘ma kạunohoga ‘e ‘on rak‘ạkiag ne puer‘ȧk hoi‘ạkit​—ne ‘inoso la pola fumou.​—Hat kamataga 2:24.

 Tạupiriag ne puer‘ȧk te fak Puk Ha‘a, ‘is la pola mata‘ se ‘os huga ma te fakforo ne mou se ‘isa. La fakse, lelea‘ ‘es garue ‘oaf kikia se famör garue ne taupir se puer‘ȧk te fak Puk Ha‘a ne ag nonoj ma vahia garue. (Fäeag ‘Es Fuạga 10:4, 26; Hiperiu 13:18) Fäeag ‘on ‘Ạitu rak‘ȧk tape‘ma se ‘isa la ‘is la tau sema se te ne ‘is po ka la a‘ti‘akia ‘os hạikạinagagat ma ‘Ạitu la ta te pumuet, ‘e koroa fakforo.​—Hat Mataio 6:24, 25, 33; 1 Timoti 6:8-​10.

 Garue‘ạkiag ne puer‘ȧk te fak Puk Ha‘a pola pärea ‘is, la noh ne‘ne‘. (Fäeag ‘Es Fuạga 14:30; 22:24, 25) La fakse, a‘fạiag se foh ‘on ‘Ạitu la se ‘oan pola pärea ‘e ‘af‘af raksa‘a ma hạipaaga. (Fäeag ‘Es Fuạga 23:20) Jihova aier‘ȧk ‘is la ‘iom te ‘oan ka la re hạitạuạg ma. (Salamo 104:15; 1 Korinita 6:10) Puer‘ȧk te fak ‘Ạitu la ‘es‘av se ‘isa ‘e ‘on rak‘ạkiag se ‘isa la matạ‘ ‘is ‘e te ne ‘is re ka tape‘ma se ‘os a‘häe. (Salamo 119:97-​100) Ka, famör fakKaristo aire ‘eake ‘e‘ȧk fas‘ȧk te ‘on ‘Ạitu la ‘es‘ao ma se irisa. Ka iris re ‘e reko iris fak te‘ạkia Jihova.​—Hat Mataio 5:14-​16.