1. Xana a xitsrhungu lexikulu xa dzana dzra ku sungula xi byeliwe ku yentxa yini?

A KU hlengeletane xitsrhungu lexikulu xa vavanuna ni vavasati va matiko ni tindzrimi ta ku hambanahambana. Hi siku ledzro ku yentxeke ntxhumu lowu hlamalisaka swinene. Ntlawa wa Vayuda lava tolovelekiki va sungule ku vulavula hi tindzrimi ta matiko ya vhanu lava a va yendzrele Yuda! Leswo a swi hlamalisa hakunene, kambe leswi vhanu lavo va ngeke na ku swi dzrivala hi leswi Vayuda kun’we na mupostola Petro va va byeliki swone. Dzrungula ledzro a dzri patsra mhaka ya leswaku va nga huluxiwa hi ku kombisa lipfumelo ka Yesu Kriste. Xitsrhungu lexo xi khumbiwe ngopfu swinene hi dzrungula ledzro, lakakuva xi vutisa leswi: ‘Xana hi ta yentxa yini?’ Hi loko va hlamula va ku: ‘Ndzrulukani, mun’wana ni mun’wana wa kwenu a babatisiwa.’​—Min 2:37, 38.

2. Hi ta kambisisa yini ka xidondzro lexi? (Vona xifaniso lexi nga ka kapa.)

² Leswi swi yentxekiki ntsrhaku ka leswo swi hlamalisa ngopfu. Kolomu ka 3.000 wa vhanu va babatisiwile hi siku dzroledzro va va va ndzruluka vadondzrisiwa va Kriste. Loku ku ve ku sungula ka ntizro lowukulu wa ku yentxa vadondzrisiwa lowu Yesu a leletiki valandzreli vakwe ku wu yentxa. Ntizro lowo wa ha ya wu kula ku tlhasa ni namunhla. Namunhla, a hi nge mu dondzrisi mhunu hi va hi mu babatisa hi maworanyana matsrongo ntsena. Xidondzro xi nga ha teka tihweti, nambi lembe kumbe ku tlula a ku za xi babatisiwa. Loko ku li leswaku u fambisela mhunu xidondzro xa Bibele, u yi tiva ha hombe ndlela leyi swi kazrataka ha yone ku mu pfuna ku ndzruluka mudondzrisiwa wa Kriste. Ka xidondzro lexi, hi ta vona leswi u nga swi yentxaka akuva u pfuna xidondzro xaku xa Bibele akuva xi babatisiwa.

3. Hi ku ya hi Matewu 28:19, 20, xana xidondzro xezru xa Bibeke xi fanela ku yentxa yini akuva xi hluvuka xi za xi babatisiwa?

³ Na lweyi u dondzraka na yene Bibele a nga si na babatisiwa, a fanela ku zranga a hanya hi leswi Bibele dzri swi dondzrisaka. (Dondzra Matewu 28:19, 20.) Loko xidondzro xezru xi tizrisa leswi xi swi dondzraka, xi ndzruluka xi fana ni “wanuna wa ku tlhazriha” wa le xifanisweni xa Yesu, lweyi a keliki swinene a za a ya kuma zribye akuva a yaka yindlu yakwe. (Mt 7:24, 25; Lk 6:47, 48) Hi nga xi pfunisa kuyini xidondzro xezru ku tizrisa leswi xi swi dondzraka? A hi voneni swidzringanyeto swizrazru.

4. Hi nga mu pfunisa kuyini lweyi hi dondzraka na yene Bibele akuva a tikazratela ku babatisiwa? (Vona bokisi ledzri liki “ Pfuna Lweyi U Dondzraka Na Yene Akuva A Tibekela Makungu A Tlhela A Ma Hetisisa.”)

⁴ Pfuna xidondzro xaku ku tibekela makungu. Ha yini u fanela ku yentxa leswo? Yanakanya hi xifaniso lexi: Loko a wo djula ku yendzrela kule, a wu ta yanakanya hi mimbangu ya ku xonga leyi a wu ta pfana u yima ka yone. Hi ndlela leyo, ni mpfhuka a wu nge ti wu twa. Hi ku fanana, loko xidondzro xa Bibele xi tibekela makungu ya kola na kola, xi nga swi xiya leswaku xi nga swi kota nambi ku babatisiwa. Tizrisa xiyenge lexi liki “Lwela leswi” xa buku ledzri liki Hanya Hi Ku Nyonxa Hi La Ku Nga Helikiki! akuva u pfuna xidondzro xaku ku yentxa nhluvuku. A ku heleni ka xidondzro xin’wana ni xin’wana, bulisana ni lweyi u dondzraka na yene Bibele mayelanu ni ndlela leyi kungu ledzro dzri nga mu pfunaka ha yone ku tizrisa leswi a ha ka ku heta ku swi dondzra. Loko lweyi u dondzraka na yene Bibele u mu pimisela kungu dzrimbeni, dzri tsrale ka xiyenge lexi liki “Swin’wana”. Minkama hinkwayu tizrisa xiyenge lexi xa xidondzro akuva u yanakanyisisa ni lweyi u dondzraka na yene Bibele mayelanu ni makungu yakwe lawa ma tekaka nkama wutsrongo ni lawa ma tekaka nkama wa ku leha.

5. Hi ku ya hi Marka 10:17-22, i yini leswi Yesu a byeliki wanuna wa kukazri lwa nga xipfundzri ku swi yentxa, nakone ha yini?

 ⁵ Pfuna xidondzro xaku ku txintxa mahanyela nambi loko swi xi kazratela. (Dondzra Marka 10:17-22.) Yesu a a swi tiva leswaku a swi ta kazrata kuva xipfundzri xi xavisa mintxhumu ya xone hinkwayu. (Mr 10:23) Nambi tanu, Yesu a byele wanuna lwiyani leswaku a yentxa ku txintxa lokukulu a wuton’wini byakwe. Ha yini? Hikusa Yesu a a mu zrandzra. Minkama yimbeni hi nga ha txhava ku kutxa xidondzro xezru ku tizrisa leswi xi swi dondzraka hi kuva hi pimisa leswaku a xi si na tibekisela ku yentxa ku txintxa koloko. Swi nga ha teka nkama leswaku vhanu va hlivila swihena swa khale, va yambala wumhunu lebyimpshwa. (Kl 3:9, 10) Kambe loko u hatla u xi khanyisela mhaka, na xo xidondzro xi nga ha hatla xi sungula ku txintxa. Loko u bula na xone hi mhaka leyo u va na u kombisa leswaku wa zron’weka ha xone.​—Ps 141:5; Pr 27:17.

6. Ha yini hi fanela ku tizrisa swivutiso leswi djulaka mavonela?

⁶ Swi ni lisima kuva hi hamba swivutiso leswi djulaka mavonela ya xidondzro. Hamba swivutiso swa ku tanu akuva u vona leswi xidondzro xaku xi swi twisisaka ni leswi xi swi kholwaka. Loko minkama hinkwayu u yentxa leswo swi ta ku nabyalela akuva a nkameni lowu taka u bulisana na xone hi mintxhumu leyi swi xi kazratelaka ku yi pfumela. Buku ledzri liki Hanya Hi Ku Nyonxa Hi La Ku Nga Helikiki! dzri ni swivutiso swinyingi leswi djulaka mavonela. Hi xikombiso, ndzrima 4 yi ni xivutiso lexi: “U vona leswaku Yehovha a titwisa kuyini loko u tizrisa vito dzrake?” Ndzrima 9 yi ni xivutiso lexi: “He yini yin’we ya mintxhumu leyi u navelaka ku yi kombela?” A ku sunguleni swi nga ha xi kazratela ku hlamula swivutiso leswi djulaka mavonela. U nga ha mu pfuna hi ku mu dondzrisa ku yanakanyisisa hi ndlela leyi Matsralwa kumbe swifaniso swi yelanaka ni mhaka ya kone ha yone.

7. Hi nga yi tizrisisa kuyini mimfambu ya hakunene hi ndlela leyi pfunaka?

⁷ Loko xidondzro xaku xi za xi twisisa leswi xi fanelaka ku swi yentxa, tizrisa mimfambu ya hakakunene akuva u xi pfuna ku yentxa tanu. Hi xikombiso, loko swi xi kazratela ku hlalela mintlhanganu, u nga ha xi komba vídeo ledzri liki Yehovha A Ni Hlayisile ledzri kumekaka ka xiyenge lexi liki “Handzrisisa” xa dondzro 14. Ka tindondzro tinyingi ta buku ledzri liki Hanya Hi Ku Nyonxa Hi La Ku Nga Helikiki! u ta kuma mimfambu ya ku tanu ka swiyenge leswi liki “Kelisisa” kumbe “Handzrisisa”. * Tivonele ku pimanisa xidondzro xaku ni mhunu mumbeni hi ku hlaya swa ku fana ni leswi: “Loko a swi kotile, na wene u nga swi kota.” Tsrhika xidondzro xi tipimisela leswo ha wuswaxone. A matsrhan’wini ya leswo, vulavula hi tinhlankulu leti pfuniki mhunu lweyi a kombisiwiki ka vídeo akuva a tizrisa leswi a swi dondzriki a Bibeleni. U nga ha vulavula hi tsralwa dzra kukazri kumbe ntxhumu lowu pfunaka, lowu yentxiwiki. Minkama hinkwayu loko swi koteka kandzrakanya ndlela leyi Yehovha a mu pfuniki ha yone mhunu wa kone.

8. Hi nga xi pfuna hi ndlela yini xidondzro xezru ku zrandzra Yehovha?

⁸ Pfuna xidondzro xaku ku zrandzra Yehovha. Hi ndlela yini? Djuletela mikhandlu ya ku mu dondzrisa hi matsrhamela ya Yehovha. Pfuna xidondzro xaku ku vona Yehovha swanga Xikwembu Nkulukumba lweyi a tsrhaviki ni lweyi a pfunaka lava mu zrandzraka. (1Tm 1:11; Hb 11:6) Komba xidondzro xaku leswaku xi ta pfuneka hi ku tizrisa dzrungula ledzro u tlhela u xi tlhamuxela leswaku ku pfuneka koloko ku kombisa leswaku Yehovha awa xi zrandzra. (Eza  48:17, 18) Loko lizrandzru dzra xone ha Yehovha dzri ya dzri kula, xidondzro xaku xi ta kutxeka ku yentxa ku txintxa kun’wana ni kun’wana loku djulekaka.​—1Yh 5:3.

9. Hi ku ya hi Marka 10:29, 30, i yini xi nga pfunaka mhunu ku tikazrata akuva a kota ku va mudondzrisiwa lwa babatisiwiki?

⁹ Akuva xi tlhasela ku babatisiwa, xidondzro xa Bibele xi fanela ku tikazrata. Ku fana ni xipfundzri lexi hi sunguliki hi khanela ha xone, swidondzro swimbeni swa Bibele swi nga ha fanela ku tsrhika mintxhumu yimbeni ya nyama. Loko ntizro wa swone wu nga yelani ni minsinya ya milawu ya Bibele, swi nga ha fanela ku wu tsrhika, swi djula wumbeni. Vanyingi va nga ha fanela ku tsrhika vanghanu lava nga mu gandzreliki Yehovha. Van’wana va nga ha tsruviwa hi maxaka yavu lama nga ti zrandzrikiki Timboni ta Yehovha. Yesu a hlayile leswaku vambeni swi nga ha va kazratela ku yentxa ku txintxa koloko. Kambe a dumbise leswaku lava mu landzrelaka va nge ti khomisiwa tingana. A matsrhan’wini ya leswo, va ta kuma hakelo dzrikulu dzra ku va ni ndangu wa moya lowu nga ni lizrandzru. (Dondzra Marka 10:29, 30.) U nga xi pfunisa kuyini xidondzro xaku xa Bibele akuva xi pfuneka hi nyiko leyo ya ku xonga?

10. U dondzra yini ka mfambu wa Manuel?

¹⁰ Yaka wunghanu ni xidondzro xaku. I swa lisima ku komba xidondzro xaku leswaku wa zron’weka ha xone. Vona leswi hlayiwaka ha Manuel, lweyi a tsrhamaka a México. Loko a dzrimuka nkama lowu a a ha li xidondzro xa Bibele, a li: “Na hi nge si na sungula xidondzro xin’wana ni xin’wana, mudondzrisi wanga a a ni dzrungulisa ndzrava. A a ni pfuna ku zrulela a tlhela a ni pfumelela ku tiphofula mayelanu ni timhaka timbeni. A ni titwa na a zron’weka ha mine ha kakunene.”

11. Xana swidondzro swezru swa Bibele swi nga pfunekisa kuyini hi ku hungata na hine?

¹¹ Yesu a tinyikiki nkama wa ku va ni valandzreli vakwe. Hi ndlela leyi fanaka, tinyike nkama wa ku va ni swidondzro swaku. (Yh 3:22) Loko swi koteka, zramba xidondzro xaku xa Bibele lexi yentxaka nhluvuku akuva xi ta  kaya kwaku mi ta khweva txana xikan’we, mi da swakuda kumbe ku hlalela Wuhaxi bya JW bya hweti ni hweti. Xidondzro xaku xi nga ha tlangela xizrambu xaku, ngopfungopfu loko ho xi zramba hi nkama lowu maxaka ni vanghanu va xone va hambaka minkhuvu ya wukhongoti bya madzrimi kumbe minkhuvu ya tiko, lani xi nga ha titwaka wuswaxone. Kazibwe, wa le Uganda, a li: “Ni pimisa leswaku ni dondzre swinyingi ha Yehovha loko ni le ku hungateni ni mudondzrisi wanga wa Bibele, ku fana ni loko hi li ku dondzreni. Ni vone ndlela leyi Yehovha a va hlayisaka ha yone vhanu vakwe ni ndlela leyi va nyonxiki ha yone. Leswi hi leswi a ni djula swone a wuton’wini byanga.”

12. Ha yini swi li swa hombe ku ya ka swidondzro swezru ni vazrezri va ku hambanahambana?

¹² Zramba vazrezri va ku hambanahambana ka xidondzro. Minkama yimbeni hi nga ha swi vona swi yampswa ku fambisa xidondzro wuswezru kumbe ku zramba muzrezri yelweyi wa mun’we. Hi nga ha swi zrandzra ku yentxisa xileswo, kambe xidondzro xezru xa Bibele xi nga ha pfuneka loko hi ku famba ka nkama hi xi yela ni vazrezri va ku hambanahambana. Dmitrii, wa le Moldova, a li: “Muzrezri mun’wana ni mun’wana lweyi a a ta kaya loko va ta ta ni dondzrisa a a ni pfuna ku twisisa timhaka hi ndlela yimbeni. Leswo swi ni pfune ku twisisa timhaka hi tindlela ta ku siyanasiyana. Xileswo ni titwe na ni ntsrhunxekile loko ni ya hlalela ntlhanganu wanga wa ku sungula hikusa afa kutani ni tolovelane ni vamakwezru vanyingi va xinuna ni va xisati.”

13. Ha yini hi fanela ku pfuna xidondzro xezru ku hlalela mintlhanganu?

¹³ Pfuna xidondzro xaku ku hlalela mintlhanganu ya bandla. Ha yini? Hikusa Yehovha a leleta vagandzreli vakwe leswaku va hlengeletana; i xiyenge xa wugandzreli byezru. (Hb 10:24, 25) Ntlhantakubidzri, a vamakwezru va xinuna ni va xisati hi wo ndangu wezru wa moya. Loko hi li mintlhanganwini na vone swi fana ni loko hi li kaya na vone hi tikholisa hi swakuda swa ku nandzrika. Loko u pfuna xidondzro xaku xa Bibele ku hlalela mintlhanganu u va na u xi pfuna ku yentxa wun’wana wa mintxhumu ya lisima ngopfu swinene akuva xi babatisiwa. Kambe swi nga ha xi kazratela ku teka gwansu ledzro. Xana a buku ledzri liki Hanya Hi Ku Nyonxa Hi La Ku Nga Helikiki! dzri nga xi pfunisa kuyini xidondzro xaku ku hlula swihinga leswi xi nga ha langusanaka na swone?

14. Hi nga xi kutxisa kuyini xidondzro xezru ku ya mintlhanganwini?

¹⁴ Tizrisa dondzro 10 ya buku ledzri liki Hanya Hi Ku Nyonxa Hi La Ku Nga Helikiki! akuva u kutxa xidondzro xaku. Vazrezri lava wupfiki lava kombeliwiki ku kambeta ku tizrisa ndzrima leyi ya buku ledzri na dzri nge si na humexiwa, va ve ni mihandzru leyi nyonxisaka loko va pfuna swidondzro swavu ku hlalela mintlhanganu. Nakunene, a swi vileli kuva u tlhasa ka dondzro 10 akuva u zramba xidondzro xaku xa Bibele ku ya mintlhanganwini. Lwela ku xi zramba na ma ha sungula ku dondzra u tlhela u tama u xi zramba minkama hinkwayu. Xidondzro xin’wana ni xin’wana xa Bibele xi ni swikazratu swa xone. Xileswo, xiya swivileleko swa xidondzro xaku u va u lwela ku xi pfuna hi tindlela leti tizraka. U nga godoli loko xi hlwela ku ya mintlhanganwini. Lehisa mbilu u va u khinyela ku xi zramba.

15. I ku txhava muni loku swidondzro swezru swi nga ha vaka na kone?

¹⁵ Xana u txhavilenyana loko u pimisa hi ku va mun’wana wa Timboni ta Yehovha? Swi nga yentxeka u pimise leswaku u nge zi u swi kotile ku zrezra hi muti ni muti. Kumbe swi nga yentxeka u txhave leswaku maxaka ni vanghanu va ta ku kaneta. Loko swi li tanu, u nga ma twisisa matitwela ya xidondzro xaku. Yesu a a swi twisisa  leswaku ku txhava koloko ka humelela. Nambi tanu, a kutxe valandzreli vakwe leswaku va nga pfumeleli ku txhava ku va tsrhikisa ku tizrela Yehovha. (Mt 10:16, 17, 27, 28) Xana Yesu a va pfunise kuyini valandzreli vakwe ku hlula ku txhava? Hi nga xi yetiselisa kuyini xikombiso xakwe?

16. Hi nga xi dondzrisisa kuyini xidondzro xezru ku byela vambeni leswi xi swi dondzraka?

¹⁶ Ha katsrongokatsrongo dondzrisa xidondzro xaku ku vulavula hi lipfumelo dzra xone. Swi nga yentxeka vadondzrisiwa va Yesu va txhavile loko a va zrume ku ya ku zrezreni. Kambe Yesu a va pfunile vadondzrisiwa vakwe hi ku va byela lomu va taka zrezrela kone ni leswi va taka swi hlaya. (Mt 10:5-7) U nga mu yetisela hi ndlela yini Yesu? Pfuna xidondzro xaku ku vona mikhandlu ya ku zrezra. Hi xikombiso, mu vutise kumbe a tiva mhunu wa kukazri lweyi a nga pfunekaka hi ku tiva xihlayelamfuzri xa kukazri xa Bibele. Ntsrhaku, mu pfune ku lulamisela leswi a taka swi hlaya hi ku mu komba ndlela ya ku nabyala ya ku dondzrisa ntiyiso lowo. Loko swi faneleka, u nga ha tizrisa xiyenge xa ku titoloveta, lexi liki “Van’we Va Li” ni lexi liki “Leswi Vambeni Va Swi Vutisaka”, leswi kumekaka ka buku ledzri liki Hanya Hi Ku Nyonxa Hi La Ku Nga Helikiki! Loko u yentxa tanu, lwela ku dondzrisa xidondzro xaku ku tizrisa Bibele akuva xi nyikela tinhlamulo ta ku nabyala hi ndlela ya lizrandzru.

17. Hi nga dzri tizrisisa kuyini buku dzra Matewu 10:19, 20, 29-31 loko hi pfuna xidondzro xezru ku dumba Yehovha?

¹⁷ Pfuna xidondzro xaku ku dumba Yehovha. Yesu a tiyisekise vadondzrisiwa vakwe leswaku Yehovha a a ta va pfuna hikusa a a va zrandzra. (Dondzra Matewu 10:19, 20, 29-31.) Dzrimuxa xidondzro xaku leswaku Yehovha a ta xi pfuna na xone. U nga xi pfuna ku tiseketela ha Yehovha hi ku khongota na xone mayelanu ni makungu lawa xi nga na wone. Franciszek, lweyi a tsrhamaka a Polônia, a li: “Mudondzrisi wanga minkama yinyingi a a patsra makungu yanga ka swikhongoto swakwe. Loko ni vone leswi Yehovha a hlamulisiki xiswone swikhongoto swa mudondzrisi wanga, hi ku kahlula na mine ni sungule ku khongota. A ni wu twa mpfunu wa Yehovha loko ni kombela ku ntsrhunxiwa a ntizrweni lowu a ne he ku tholiwa, akuva ni kota ku hlalela tinhlengeletanu ni mintlhanganu”.

18. Xana Yehovha a titwisa kuyini hi ntizro lowu vadondzrisi lava nga vakriste va wu yentxaka?

¹⁸ Yehovha a zron’weka ngopfu swinene hi swidondzro swezru swa Bibele. Awa yi tlangela ndlela leyi vadondzrisi lava nga vakriste va tikazrataka ha yone akuva va pfuna vhanu ku tsrhindzrekela kwakwe, nakone awa va zrandzra hi kola ka leswo. (Eza 52:7) Nambi loko u nge na xidondzro xa Bibele swoswi, u nga swi kota ku pfuna swidondzro swa Bibele ku hluvuka swi tlhasela ku babatisiwa hi ku heketa vazrezri vambeni ka swidondzro swavu.