NHLOKOMHAKA YA XIDONDZRO 19
LISIMU 22 Mfumu Wu Le Matilweni—A Wu Te!
Xana I Yini Leswi Hi Swi Tivaka Mayelanu Ni Ndlela Leyi Yehovha A Taka Yavanyisa Ha Yone Vhanu A Nkameni Lowu Taka?
“Yehovha . . . a nga naveli leswaku ni mun’we a helisiwa.”—2 PET. 3:9.
NKONGOMETO
Hi Nga tiyiseka leswaku wuyavanyisi bya Yehovha bya le nkameni lowu taka byi ta va lebyinene nakone lebyi lulamiki.
1. Ha yini hi nga hlayaka leswaku hi hanya a minkameni ya ku nyonxisa?
HI HANYA a minkameni ya ku nyonxisa! Siku dzrin’wana ni dzrin’wana hi vona ku hetiseka ka wuprofeta bya Bibele. Hi xikombiso, hi vona ‘hosi ya le n’walungu’ ni ‘hosi ya le nyingitimu’ na ti lwela ku fuma misava hinkwayu. (Dan. 11:40) Hi vona ku zrezriwa ka madzrungula lamanene ya Mfumu wa Xikwembu Nkulukumba a misaveni hinkwayu, nakone vhanu vanyingi va hlawula ku tizrela Yehovha. (Eza. 60:22; Mat. 24:14) Nakone hi yamukela swakuda swinyingi swa moya “hi nkama wa kone”.—Mat. 24:45-47.
2. I yini leswi hi nga tiyisekaka ha swone, kambe i yini leswi hi fanelaka ku swi pfumela?
2 Yehovha a ya mahlweni a hi pfuna ku twisisa swiyentxakalo leswi taka humelela ku nga li khale. (Amapr. 4:18; Dan. 2:28) Hi nga tiyiseka leswaku loko nhlomulo lowukulu wu sungula, hi ta swi tiva leswi hi fanelaka ku swi yentxa akuva hi tama hi va ni wumun’we ka xiyimu lexi xa ku kazrata. Kambe hi fanela ku pfumela leswaku a hi mintxhumu hinkwayu leyi hi yi tivaka mayelanu ni leswi taka yentxeka a nkameni lowu taka. Ka xidondzro lexi, ku sungula hi ta kambisisa leswaku ha yini hi txintxe leswi hi swi hlayiki mayelanu ni swin’we swa swiyentxakalo leswo. Hi ku landzrela, hi ta kambisisa yin’we ya mintxhumu leyi hi yi tivaka mayelanu ni wumundzruku ni ndlela leyi Papayi wezru wa le matilweni a taka yangula ha yone.
LESWI HI KALAKA HI NGA SWI TIVI
3. I yini leswi hi swi hlayiki mayelanu ni nkama lowu Yehovha a taka pfala mukhandlu wa kuva vhanhu va kombisa lipfumelo, nakone ha yini hi tlhasele wugamu lebyo?
3 A khale, a hi hlaya leswaku loko nhlomulo lowukulu wu sungula, vhanu a va nge ti va ni mukhandlu wa ku kombisa lipfumelo ka Yehovha ni ku huluka ka Armagedoni. Hi tlhasele wugamu lebyo hikusa a hi twisisa leswaku a wudzrunguli mayelanu ni ndhambhi ya Nowa a ku li xikombiso xa leswi a swi ta yentxeka a nkameni lowu taka. Hi xikombiso, leswi a swi nge ti koteka kuva vhanu va nghena a ngalaweni ntsrhaku ka loko Yehovha a pfale xipfalu na ku nga si na sungula ndhambhi, hi lani ku fanaka, a hi yanakanya leswaku a nga kone lweyi a taka kombisa lipfumelo ka Yehovha a va a huluxiwa loko nhlomulo lowukulu wu sungula.—Mat. 24:37-39.
4. Xana swoswi hi vona wudzrunguli mayelanu ni ndhambhi ya Nowa swanga wuprofeta bya leswi taka yentxeka a nkameni lowu taka? Tlhamuxela.
4 Xana hi fanela ku vona wudzrunguli bya ndhambhi swanga wuprofeta bya leswi taka yentxeka nkameni lowu taka? Nhlamulo i im-him. Ha yini? Hikusa Bibele a dzri hlayi leswo. a Yesu a fananise ‘masiku ya Nowa’ ni masiku ya ku ta kwake. Kambe, Yesu a nga hlayanga leswaku hinkwaswu leswi nga yentxeka a nkameni wa Nowa a swi ta hetiseka hi ndlela leyikulu a nkameni lowu taka hi lani swi yentxekiki ha kone loko Yehovha a pfale xipfalu xa ngalawa. Kambe leswo a swi hlayi swone leswaku a hi nge susi ndondzro ya kukazri ka wudzrunguli bya ndhambhi ya Nowa.
5. a) I yini leswi Nowa a swi yentxiki na ndhambhi yi nga si na tlhasa? (Vaheberu 11:7; 1 Petro 3:20) b) Mayelanu ni ntizro wa ku zrezra, xiyimu xezru namunhla xi fana hi ndlela yini ni xa le masikwini ya Nowa?
5 Loko Nowa a twe dzrungula dzra wuyavanyisi bya Yehovha, a kombise leswaku a ni lipfumelo hi kuva a yaka ngalawa. (Dondzra Vaheberu 11:7; 1 Petro 3:20.) Hi ndlela leyi fanaka, vhanu lava yingelaka madzrungula lamanene mayelanu ni Mfumu wa Xikwembu Nkulukumba va fanela ku hanya hi leswi va swi dondzraka. (Mint. 3:17-20) Petro a hlaye leswaku Nowa a a li “muzrezri wa swa ku lulama”. (2 Pet. 2:5) Kambe, hi lani hi swi voniki ha kone ka xidondzro lexi khalutiki, a hi swi tivi leswaku Nowa a swi kotile ku zrezrela vhanu a misaveni hinkwayu na ndhambhi yi nga si na tlhasa. Namunhla, hi tikazratela ku zrezrela vhanu a misaveni hinkwayu, nakone hi yentxa leswo hi ku hiseka. Nambiloko hi tikazrata, a hi nge swi koti ku zrezrela vhanu hinkwavu a misaveni na wugamu byi nga si na tlhasa. Ha yini?
6-7. Ha yini hi nga hlayaka leswaku a hi nge swi koti ku zrezrela vhanu a misaveni hinkwayu na wugamu byi nga si tlhasa? Tlhamuxela.
6 Yanakanya hi leswi Yesu a swi hlayiki mayelanu ni ntizro wezru wa ku zrezra. Yesu a profete leswaku madzrungula lamanene a ma ta zrezriwa “a misaveni hinkwayu akuva ku va wumboni ka matiko hinkwawu”. (Mat. 24:14) Wuprofeta lebyi byi hetiseka hi ndlela leyikulu namunhla ku tlula nkameni lowu khalutiki. A madzrungula ya Mfumu ma kumeka hi tindzrimi leti tlulaka 1.000 nakone vhanu vanyingi a misaveni hinkwayu va ma kuma madzrungula lawa hi ku tizrisa pajina dzrezru dzra jw.org.
7 Nambitasu, Yesu a tlhele a byela vadondzrisiwa vake leswaku a va nge ti swi kota ku ‘heta ntizro wavu a madoropeni’, kumbe ku zrezrela munhu mun’wana ni mun’wana na yene a nga si tlhasa. (Mat. 10:23; 25:31-33) A mazritu ya Yesu ma ta hetiseka ni le masikwini yezru. Vhanu vanyingi namunhla va hanya a matikweni lawa swi kalaka swi nga koteki ku va hi zrezra na hi ntsrhunxekile. Handle ka leswo, ku pswaliwa swivanana swinyingi minutu yin’wana ni yin’wana. Hi yentxa hinkwaswu leswi hi nga swi kotaka akuva hi zrezra madzrungula lamanene ka vhanu “va matiko hinkwawu, tinxaka hinkwatu ni tindzrimi hinkwatu”. (Mpful. 14:6) Kambe a hi nge swi koti ku zrezrela vhanu hinkwavu a misaveni madzrungula lamanene na wugamu byi nga si na tlhasa.
8. He xini xivutiso lexi hi nga ha xi hambaka mayelanu ni wuyavanyisi bya Yehovha a nkameni lowu taka? (Tlhela u vona ni mufoto.)
8 Kutani ke, ku tlakuka xivutiso lexi liki: Swi li yini hi lava ku taka tlhasa nhlomulo lowukulu na va nga si va ni mukhandlu wa ku twa madzrungula lamanene? Xana Yehovha kun’we ni N’wanake, lweyi a mu bekiki kuva a va muyavanyisi, va ta va yavanyisisa kuyini vhanu lava? (Yoh. 5:19, 22, 27; Mint. 17:31) A tsralwa dzra nhlokomhaka ya xidondzro lexi dzri kombisa leswaku Yehovha “a nga naveli leswaku ni mun’we a helisiwa”. Amatsrhan’wini ya leswo, a djula leswaku “vhanu hinkwavu va tisola”. (2 Pet. 3:9; 1 Tim. 2:4) Nambileswi hi tivaka mintxhumu leyi mayelanu na Yehovha, yene a nga si na hi byela ndlela leyi a taka yavanyisa ha yone vhanu lava kalaka va nga si yingela madzrungula lamanene. Nambitasu, a nga sindzriseki ku hi byela leswi a swi yentxiki ni leswi a ha taka swi yentxa.
Xana Yehovha a ta yentxa yini hi vhanu lava taka pfumala mukhandlu wa ku yingiseta madzrungula lamanene na nhlomulo lowukulu wu nga si sungula? (Vona yava 8) c
9. I yini leswi Yehovha a hi byeliki hi ku tizrisa Bibele?
9 A Zritwini dzrake, Yehovha a hi byela mintxhumu leyi a taka yi yentxa. Hi xikombiso, a Bibele dzri hi byela leswaku Yehovha a ta pfuxa vhanu “lava kalaka va nga lulamanga” lava kalaka va nga kumanga mukhandlu wa ku yingela madzrungula lamanene ni ku txintxa mahanyela yavu. (Mint. 24:15; Luk. 23:42, 43) Leswo swi tlakuxa swivutiso swin’wana swa lisima.
10. He swini swivutiso swin’wana leswi tlakukaka?
10 Xana hinkwavu lava taka fa hi nkama wa nhlomulo lowukulu va ta heliseliwa wugamu va nga ha vi na dumbo dzra ku tlhela va pfuxiwa? A Matsralwa ma swi beka livaleni leswaku hinkwavu lava pfukelaka Yehovha kun’we ni lava a taka va helisa hi ku tizrisa khandzra dzrake ka yimpi ya Armagedoni, a va nge he ti tlhela va pfuxiwa. (2 Tes. 1:6-10) Kambe swi li yini hi vhanu van’wana lava hi xikombiso, va nga ha faka hi nkama wa nhlomulo lowukulu hi kola ka mavabyi, ku duhala, tinghozi kumbe ku dlayiwa hi vhanu? (Ekles. 9:11; Zek. 14:13) Xana van’we ka vhanu lava, va nga ha patsreka ka vhanu “lava kalaka va nga lulamanga” lava taka pfuxiwa a misaveni leyimpshwa? A hi swi tivi.
LESWI HI SWI TIVAKA
11. Xana vhanu va ta yavanyisiwa hi ku ya hi yini ka Armagedoni?
11 Hi tiva swinyingi mayelanu ni leswi taka yentxeka nkameni lowu taka. Hi xikombiso, hi tiva leswaku ka Armagedoni vhanu va ta yavanyisiwa hi ku ya hi ndlela leyi va va khomiki ha yone vamakwavu va Kriste. (Mat. 25:40) Lava taka yavanyisiwa swanga tihamba, va ta va na va seketele vatotiwa na Kriste. Nakone ha swi tiva leswaku van’we ka vamakwavu va Kriste va ta va na va ha li lani misaveni ntsrhaku ka loko nhlomulo lowukulu wu sungulile, nakone va ta tekiwa va ya matilweni na ke sala nkamanyana wutsrongo akuva a yimpi ya Armagedoni yi sungula. Na vamakwavu va Kriste va ha li lani misaveni, swi nga yentxeka vhanu va timbilu letinene va kuma mukhandlu wa ku va seketela ni ku seketela ntizro lowu va wu yentxaka. (Mat. 25:31, 32; Mpful. 12:17) Ha yini mintiyiso leyo yi twisiseka?
12-13. Xana van’wana va nga ha yangulisa kuyini ntsrhaku ka ku vona ku helisiwa ka “Babilona Lwenkulu”? (Tlhela u vona ni mufoto.)
12 Nambiloko ku ta va ku sungule nhlomulo lowukulu, swi nga yentxeka lava taka vona ku helisiwa ka “Babilona Lwenkulu” va ta dzrimuka leswaku Timboni ta Yehovha ku dzringana malembe manyingi a ti vulavula hi xiyentxakalo lexi. Xana van’we ka lava taka vona ku helisiwa ka “Babilona Lwenkulu” hi nkama wa nhlomulo lowukulu va nga kombisa lipfumelo ka Yehovha?—Mpful. 17:5; Ezek. 33:33.
13 Loko leswo swo yentxeka a swi ta fana ni leswi nga humelela a Egipta a nkameni wa Moxe. Ku hlayiwa leswaku ‘a xitsrhungu hinkwaxu xa vhanu’ xi tipatsre ni Vaisrayele loko va huma a Egipta. Van’wana va kombise lipfumelo ka Yehovha loko va vona leswaku mazritu ya Moxe mayelanu ni makhombo ya 10 a ma li ntiyiso. (Eks. 12:38) Loko ko yentxeka ntxhumu lowu fanaka ntsrhaku ka loko ku helisiwe Babilona Lwenkulu, xana hi ta vaviseka hikuva vhanu vanyingi va tipatsra na hine na ke sala nkamanyana wutsrongo akuva wugamu byi tlhasa? Nikutsrongo! Hi djula ku kombisa tsrhamela dzra ku fana ni dzra Papayi wezru wa le matilweni, ‘Xikwembu Nkulukumba wa timpswalu ni lizrezre, wa ku hlwela ku hlundzruka, wa ku yandzra wumbilu ni xihlayelamfuzri’. b—Eks. 34:6.
Van’we ka lava taka vona ku helisiwa ka “Babilona Lwenkulu” va ta dzrimuka leswaku Timboni ta Yehovha ku dzringana malembe manyingi a ti vulavula hi xiyentxakalo lexi (Vona mayava 12-13) d
14-15. Xana akuva mhunu a kuma wutomi lebyi nga helikiki swi ya hi nkama lowu mhunu a faka ha wone kumbe hi lani a tsrhamaka kone? Tlhamuxela. (Amapsalma 33:4, 5)
14 Minkama yin’wana, vamakwezru lava nga ni maxaka lama kalaka ma nga li Timboni, va nga ha hlaya leswi: “Loko a vo fa na ku nga si sungula nhlomulo lowukulu a swi ta yampswa hikusa a va ta va ni dumbo dzra ku pfuxiwa.” Handle ka ku ganaganeka, va ni swivangelo leswi twalaka swa ku hlaya leswo. Kambe ku hanya hi lani ku nga helikiki a swi yi hi nkama lowu mhunu a fiki ha wone. Yehovha i muyavanyisi wa ku hetiseka, leswi liki a teka swiboho leswinene ni leswi lulamiki. (Dondzra Amapsalma 33:4, 5.) Hi nga tiyiseka leswaku ‘mutsremi wa misava hinkwayu’ a ta yentxa leswi nga swinene.—Gen. 18:25.
15 Nakone swa twala ku hlaya leswaku akuva mhunu a kuma wutomi lebyi nga helikiki a swi yi hi lomu a tsrhamaka kone. A swi twali ku hlaya leswaku Yehovha a ta yavanyisa vhanu vanyingi swanga “timbuti” hi leswi va tsrhamaka a matikweni lawa va pfumaliki mukhandlu wa ku yingela a dzrungula dzra Mfumu. (Mat. 25:46) Muyavanyisi wa ku lulama wa misava hinkwayu a zron’weka ngopfu hi vhanu lava, ku tlula ndlela leyi hi yi yanakanyaka. A hi swi tivi leswaku Yehovha a ta yi kongomisisa kuyini mintxhumu hi nkama wa nhlomulo lowukulu. Swi nga yentxeka van’we vavu va ta va ni mukhandlu wa ku dondzra hi Yehovha, va kombisa lipfumelo kwake ni ku seketela Yehovha nkama lowu a tixwengisaka a misaveni hinkwayu.—Ezek. 38:16.
Ntsrhaku ka ku sungula ka nhlomulo lowukulu, . . . xana van’wana va lava taka vona swiyentxakalo leswi, va nga kombisa lipfumelo?
16. I yini leswi hi swi tivaka mayelanu na Yehovha? (Tlhela u vona ni mufoto.)
16 Loko hi dondzra Bibele, hi kota ku tiva ndlela leyi wutomi bya vhanu byi nga bya lisima ha yone ka Yehovha. A nyikele wutomi bya N’wanake akuva hinkwezru hi va ni mukhandlu wa ku kuma wutomi lebyi nga helikiki. (Yoh. 3:16) Hinkwezru hi kota ku vona lizrandzru ledzri nga helikiki ledzri Yehovha a nga na dzrone ha hine. (Eza. 49:15) Yehovha a tiva mun’wana ni mun’wana wezru hi vito. Ku hlaya ntiyiso, a hi tiva ha hombe lakakuva nambiloko hi fa a nga swi kota ku hi pfuxa hikusa a dzrimuka wutsrhokotsrhoko hinkwabyu mayelanu ni mun’wna ni mu’wana wezru ku patsra ni leswi a hi swi pimisa! (Mat. 10:29-31) Nakunene hi ni swivangelo leswi twalaka swa ku hlaya leswaku Papayi wezru wa le matilweni a ta yavanyisa mun’wana ni mun’wana hi ndlela leyi hetisekiki, hi wutlhazri, wululami ni ntwelawusiwana.—Yak. 2:13.
Hi nga tiyiseka leswaku Yehovha a ta yavanyisa vhanu hi ndlela leyi hetisekiki, hikusa a ni wutlhazri, wululami ni ntwelawusiwana (Vona yava 16)
17. Hi ta kambisisa yini ka xidondzro lexi landzrelaka?
17 Mintlhamuxelo leyi yi yentxa leswaku ntizro wa ku zrezra wu tama wu va wa xihantla. Ha yini hi hlaya leswo? Nakone i yini lexi nga hi pfunaka ku tama hi zrezra hi nkhinkhi? Ka xidondzro lexi landzrelaka hi ta kuma tinhlamulo ta swivutiso leswi hi wutsrhokotsrhoko.
LISIMU 76 Swo Yini Mbilwini?
a Akuva u tiva leswaku ha yini ku ve ni ku txintxa loku, vona nhlokomhaka leyi liki: Leyi I “Ndlela Leyi Amukeriwaka Hi Wena” ka Xihondzo xo Rindza xa 15 ka Marsu wa 2015 pp. 7-11.
b Ntsrhaku ka ku helisiwa ka Babilona Lwenkulu, malandzra hinkwawu ya Yehovha ma ta dzringiwa hi nkama wa nhlaselo wa Goge wa Magoge. Lava taka tipatsra ni vhanu va Yehovha ntsrhaku ka ku helisiwa ka Babilona Lwenkulu na vone va ta dzringiwa.
c MINTLHAMUXELO YA MIFOTO KA : Swiyimu swizrazru leswi kombisaka leswaku ha yini vhanu van’wana va nga ti tlhaseliwa hi madzrungula lamanene: 1) wansati lweyi a tsrhamaka mugangeni lowu a titwaka na a nga sizrelelekanga hi kola ka wukhongoti lebyi khomiki a muganga wolowo, 2) vatekani lava hanyaka a tikweni ledzri ntizro wezru wa ku zrezra wu yilisiwaka nakone swi nga ni khombo ni 3) wanuna lweyi a tsrhamaka ka mbangu wa kule swinene nakone swi kazrataka ku wu tlhasela.
d NTLHAMUXELO WA MUFOTO: Mumpshwa lweyi a yimiki ku tizrela Yehovha a dzrimuka leswi a swi dondzriki mayelanu ni ku helisiwa ka “Babilona Lwenkulu”. A teka xiboho xa ku tlhelela ka Yehovha ni le ka vapswele vake lava nga vakriste. Loko mintxhumu ya ku fana ni leyo yi humelela, hi djula ku fana ni Papayi wezru lwa nga matilweni lweyi a nga ni ntwelawusiwana ni timpswalu hi tlhela hi nyonxa hi leswi mudohi a tlheleliki.
