Yesu a tlhamuxele mintxhumu leyi a yi ta hi pfuna ku ‘tiva leswaku a Mfumu wa Xikwembu Nkulukumba wu kusuhi’. (Luka 21:31) A profete leswaku, ka mintxhumu ya ku siyana-siyana leyi a yi ta yentxeka, a ku ta va ni tiyimpi, swimbeta leswikulu, tindlala ni mintungu. Leyo i mintxhumu leyi hi yi vonaka namunhla.​—Luka 21:10-17.

Bibele dzri tlhela dzri kombisa leswaku a ‘masiku ya wugamu’ ya ku fuma ka vhanu a ma ta tikomba hi ndlela leyi vhanu a va ta hanya ha yone, kumbe hi mahanyela ya ku biha. U nga dondzra hi mahanyela wolawo ka 2 Timoteo 3:1-5. Loko u ma vona mahanyela wolawo ka vhanu namunhla, handle ka ku ganaganeka wa pfumelelana na swone leswaku wuprofeta lebyo bya Bibele bya hetiseka namunhla.

Xana swoswo swi tlhamuxela yini? Swi tlhamuxela leswaku a nkama wa kuva Mfumu wa Xikwembu Nkulukumba wu yentxa ku txintxa loku taka yampswisa swinene wutomi lani misaveni wu kusuhi. (Luka 21:36) A Bibeleni, Xikwembu Nkulukumba a dumbisa ku yentxela misava ni lava taka hanya ka yone mintxhumu ya ku xonga. A hi vone yin’wana ya yone.

‘[Yesu] a nyikiwa vuhosi, ni ku phatima, ni mfumu, akuva tintsrhundzru hinkwatu, ni matiko hinkwawu, ni va tindzrimi hinkwatu, va mu tizrela. A vuhosi byakwe hi vuhosi lebyi ngeke na vugamu, lebyi ngeke na ku hela; nakone a mfumu wakwe wu nga helisiwe.’​—DANIEL 7:14.

Leswi swi tlhamuxelaka swone: U nga va ni wutomi lebyi nyonxisaka hansi ka mfumu lowu wu tlakukiki swinene lowu simekiwiki hi Xikwembu Nkulukumba. Yesu a ta va Hosi wa wone nakone wu ta va wa misava hinkwayu.

‘Ku nga vi na muyaki lwa taka ku: Ndzra vabya.’​—EZAYA 33:24.

Leswi swi tlhamuxelaka swone: A wu nge he vabyi kumbe ku limala; u ta kota ku hanya hi la ku nga helikiki.

‘A helisa tiyimpi, ku yisa vugan’wini bya misava.’​—AMAPSALMA 46:9.

Leswi swi tlhamuxelaka swone: A hi nge he txhavisiwe hi tiyimpi nakone ku xaniseka hinkwaku loku vangiwaka hi tone ku ta hela.

‘Lwemfani a ta va a nge he kone . . . lava ku simama va ta titekela misava.’​—AMAPSALMA 37:10, 11.

Leswi swi tlhamuxelaka swone: A ku nge he vi na vhanu lava yentxaka swa ku biha, ku ta sala ntsena lava djulaka ku yingiseta Xikwembu Nkulukumba.

‘Va ta yaka tiyindlu, va tsrhama ku tone; va ta byala mivinya, va va va da ni mihandzru ya yone.’​—EZAYA 65:21, 22.

Leswi swi tlhamuxelaka swone: Misava hinkwayu yi ta va mbangu wa ku xonga ni lowu nyonxisaka ku hanya ka wone. Xikwembu Nkulukumba a ta hlamula xikhongoto xezru xa kuva ku zrandzra kwakwe ku yentxiwa ‘a misaveni’.​—Mattheo 6:10.