1-2. a) Ha yini hi nga hlayaka leswaku a hi wuswezru loko hi kumana ni swikazratu? b) Hi ta bula ha yini ka nhlokomhaka leyi?

 LOKO hi kumana ni swikazratu swa ku siyanasiyana, hi nga ha titwa ingiki ho va wuswezru ka boti dzra dzritsrongo a lwandle hi siku dzra xidzedze lexikulu. Kambe a hi wuswezru nkama lowu hi kumanaka ni swikazratu. Papayi wezru wa le matilweni lweyi a nga ni lizrandzru a ngo hi vona ntsena loko hi lwisana ni swikazratu, kambe a dumbisa ku hi pfuna kuva hi swi tiyiselela. Yehovha a nyika nandzra mun’wana ni mun’wana lweyi a dumbekaka kwake xidumbiso lexi: ‘Ndzri ta ku pfuna.’—Eza. 41:10.

² Nhlokomhaka leyi yi ta vulavula hi ndlela leyi Yehovha a hi pfunaka ha yone hi 1) ku hi kongomisa, 2) ku hi nyika leswi hi swi vilelaka, 3) ku hi sizrelela ni 4) ku hi txhavelela. Yehovha a hi tiyisekisa leswaku swi nge na mhaka swikazratu leswi hi kumanaka na swone a wuton’wini, yene a nge ti txhuka a hi dzrivala. Ni siku ni dzrin’we a nge ti hi tsrhika. Hi ndlela leyo a hi wuswezru.

YEHOVHA AWA HI KONGOMISA

3-4. Xana Yehovha a hi kongomisa hi ndlela yini? (Amapsalma 48:14)

³ Dondzra Amapsalma 48:14. Yehovha a nga yimeli leswaku hi tikongomisa. Xana Yehovha a kongomisa malandzra yake namunhla hi ndlela yini? Yin’we ya tindlela i ku tizrisa Bibele. (Amaps. 119:105) Hi ku tizrisa Zritu dzrake ledzri huhuteliwiki, Yehovha a hi pfuna ku teka swiboho ni ku txutxela matsrhamela lawa ma hi yentxaka hi kuma ku nyonxa lokukulu na ke he swoswi ni le nkameni lowu taka. a Hi xikombiso, Bibele dzri hi dondzrisa leswaku a hi fanelanga ku bekelana xiviti, hi fanela ku dumbeka ka hinkwaswu hi tlhela hi zrandzra vhanu hinkwavu hi mbilu hinkwayu. (Amaps. 37:8; Heb. 13:18; 1 Pet. 1:22) Loko hi kombisa matsrhamela lawa hi ta va vapswele lavanene, nuna kumbe nsati lwenene hi tlhela hi va vanghanu lavanene.

⁴ Handle ka leswo, a Bibeleni Yehovha a tsrale swikombiso swa  vhanu lava va kumaniki ni mindzringo va tlhela va va ni matitwela lawa ma fanaka ni yezru. (1 Kor. 10:13; Yak. 5:17) Loko hi dondzra hi wudzrunguli bya vhanu lava hi tlhela hi tizrisa leswi hi swi dondzriki ka swikombiso swavu, ha pfuneka hi tindlela tibidzri. Ya ku sungula, hi twisisa leswaku a hi wuswezru, van’wana na vone va kumane ni swiyimu leswi fanaka ni swezru kambe va kote ku swi tiyiselela. (1 Pet. 5:9) Ndlela ya wubidzri, hi dondzra ku lwisana ni mindzringo leyi hi kumanaka na yone.—Rom. 15:4.

5. Yehovha a tizrisa vamani akuva va hi kongomisa a wuton’wini byezru?

⁵ Yehovha a tlhele a yentxa lulamiselo dzra kuva hi kongomisiwa hi vapfumelikulozri. b Hi xikombiso, minkama hinkwayu valaviseli va miganga va yendzrela mabandla leswaku va hi tiyisa. Wukaneli byavu byi tiyisa lipfumelo dzrezru byi tlhela byi pfuna ku hlayisa wumun’we byezru. (Mint. 15:40–16:5) Vakulu va bandla na vone va zron’weka hi wuhlayiseki bya muzrezri mun’wana ni mun’wana. (1 Pet. 5:2, 3) Vapswele va dondzrisa vanavu ku zrandzra Yehovha ni ku teka swiboho swa wutlhazri. (Amapr. 22:6) Nakone vakriste va xisati lava kuliki va pfuna vamakwezru va xisati lava ha liki vampshwa hi ku va bekela xikombiso lexinene, va va nyika swilayu leswi tizraka ni ku va kutxa hi ndlela ya lizrandzru.—Tit. 2:3-5.

6. Hi fanela ku yentxa yini akuva hi pfuneka hi nkongomiso wa Yehovha?

⁶ Yehovha a hambe xiyenge xake hi ku hi nyika nkongomiso lowu hi wu vilelaka. Xana hi nga swi kombisa hi ndlela yini leswaku hi swi nyika lisima hinkwaswu leswi Yehovha a hi yentxeliki swone? Amaproverbia 3:5, 6 yi li: ‘Dumba Yehovha hi mbilu yaku hinkwayu, u nga dumbe ku yingelisisa kwaku.’ Loko hi yentxa leswo ‘a ta lulamisa tindlela [tezru]’, leswi liki a ta hi pfuna ku fambela kule ni swikazratu hi tlhela hi hanya wutomi lebyi nyonxisaka. Nakunene ha mu tlangela Yehovha hi ku hi nyika swilayu leswi kombisaka leswaku awa hi zrandzra!—Amaps. 32:8.

YEHOVHA A HI NYIKA LESWI HI SWI VILELAKA

7. He yini mintxhumu yin’wana leyi Yehovha a hi pfunaka ha yone? (Vafilipiya 4: 19)

⁷ Dondzra Vafilipiya 4:19. Handle ka ku hi kongomisa hi tlhelo dzra moya, Yehovha a tovokisa ku tikazrata kwezru akuva hi kuma swakuda, mpahla ni mbangu wa ku tsrhama ka wone. (Mat. 6:33; 2 Tes. 3:12) Nambileswi swi nga swa ntumbuluku kuva hi kazrateka hi swivileleko swezru swa nyama, Yehovha a hi byela leswaku a hi fanelanga ku va hi kazrateka ngopfu swinene hi mintxhumu leyo. (Mat. 6:25) Ha yini? Hikusa papayi wezru a nge txhuki a tsrhika malandzra yake ya ku dumbeka loko ma vilela xa kukazri. (Mat. 6:8; Heb. 13:5) A Bibeleni Yehovha a hlaya leswaku a ta hi nyika leswi hi swi vilelaka, xileswo hi nga mu dumba.

8. I yini leswi Yehovha a swi yentxeliki Davhida?

⁸ Vona ndlela leyi Yehovha a pfuniki Davhida ha yone. Ka malembe ya ku kazrata lawa Davhida a a tsrhamela ku tsrutsruma, Yehovha a nyike Davhida kun’we ni vavanuna lava a a li na vone leswi a va swi vilela leswaku va hanya. Loko a yanakanyisisa hi ndlela leyi Yehovha a mu hlayisiki ha yone ku dzringana malembe manyingi, Davhida a tsrale leswi: ‘Ndzra vi mumpshwa, swoswi ndzri duhwalile, kambe a ndzri vonanga wa ku lulama a tsrhikiwa, ni vatukulu vakwe va kombela swakuda.’ (Amaps. 37:25) Ku fana na Davhida, swi nga yentxeka na wene u vone Yehovha hi ndlela ya lizrandzru a ku nyika leswi a u swi vilela kumbe a nyika vamakwezru leswi a va swi vilela hi minkama ya ku kazrata.

9. Xana Yehovha a hlayisa vhanu vake lava weliwaka hi timhangu hi ndlela yini namunhla? (Tlhela u vona ni mifoto.)

⁹ Yehovha a tlhela a hlayisa malandzra yake  loko ma kumana ni timhangu ta ntumbuluku. Hi xikombiso, loko vakriste va le dzaneni dzra ku sungula va weliwe hi ndlala, vamakwavu lava a va tsrhama a mimbangwini ya ku siyanasiyana va va zrumelele leswi a va swi vilela. (Mint. 11:27-30; Rom. 15:25, 26) Vhanu va Xikwembu Nkulukumba namunhla va kombisa moya lowu fanaka wa ku hanana. Loko ku humelela mhangu, hi ndlela ya lizrandzru Yehovha a susumetela vhanu vake akuva va pfuna vamakwavu hi leswi va swi vilelaka swa ku fana ni swakuda, mati, mpahla ni mizri. Vamakwezru lava tizraka ka ku yaka va lulamisa tiyindlu leti honekiki ni Tiyindlu ta Wugandzreli. Nakone malandzra ya Yehovha, hi xihantla ma txhavelela vamakwezru hi tlhelo dzra moya, lava kalaka va nge he na tiyindlu kumbe lava feliwiki hi vazrandzriwa vavu. c

10-11. Xana u dondzra yini ka mfambu wa Borys?

¹⁰ Yehovha a tlhela a hanana ni lava kalaka va nge si na sungula ni ku mu tizrela. Hi ndlela leyi fanaka, hi djuletela mikhandlu ya ku kombisa wunene ka lava kalaka va nga li vapfumeli. (Gal. 6:10) Minkama yinyingi, ku yentxa leswo swi nyikela wumboni lebyinene. Vona mfambu wa Borys, diretori wa xikole lweyi a tsrhamaka a Ucrânia. Nambileswi Borys a kalaka a nga li Mboni ya Yehovha, minkama hinkwayu a khome swidondzri leswi nga Timboni ta Yehovha hi ndlela ya wunene nakone a kombise leswaku a hlonipha leswi swidondzri swi pfumelaka ka swone. Loko Borys a teke xiboho xa ku suka lomu a a tsrhama kone hi kola ka yimpi, kutani a zruzrela ka mbangu lowu hlayisekiki, Timboni ta Yehovha ti mu pfunile. Siku dzrin’wana, Borys a ye hlalela Xidzrimuxo xa lifu dzra Yesu. Loko a yanakanyisisa hi leswi mu humeleliki, Borys a te: “A Timboni ta Yehovha ti  kombise leswaku ta zron’weka ha mine ti tlhela ti ni hlayisa. Ni ti tlangela ngopfu a Timboni ta Yehovha.”

¹¹ Na hine hi nga yetisela Papayi wezru wa timpswalu lweyi a nga matilweni hi ku kombisa lizrandzru ka vhanu lava pfumalaka, swi nge na mhaka leswaku va pfumela ka leswi hi swi kholwaka kumbe im-him. (Luk. 6:31, 36) Ingiki minzamu leyi hi yi yentxaka ya ku kombisa vhanu lizrandzru yi nga va pfuna ku va vadondzrisiwa va Kriste. (1 Pet. 2:12) Kambe nambiloko va nga hlawuli ku tizrela Yehovha, hi ta nyonxa hikusa “ku hanana swi tisa ku nyonxa lokukulu ku tlula ku yamukela”.—Mint. 20:35.

YEHOVHA AWA HI SIZRELELA

12. Xana Yehovha a dumbisa ku sizrelela vhanu vake swanga ntlawa hi ndlela yini? (Amapsalma 91:1, 2, 14)

¹² Dondzra Amapsalma 91:1, 2, 14. Namunhla Yehovha a dumbisa ku hi sizrelela hi tlhelo dzra moya. A nge txhuki a pfumelela kuva Sathana a helisa wugandzreli bya ntiyiso. (Yoh. 17:15) Nakone loko “nhlomulo lowukulu” wu sungula, hi nga tiyiseka hi ku helela leswaku Yehovha a ta hetisisa xidumbiso xake xa ku sizrelela vhanu vake ku nga li ntsena hi tlhelo dzra moya, kambe ni hi tlhelo dzra nyama.—Mpful. 7:9, 14.

13. Xana Yehovha a sizrelela mun’wana ni mun’wana wezru hi ndlela yini?

¹³ Xana Yehovha a sizrelela mun’wana ni mun’wana wezru hi ndlela yini? Hi ku tizrisa Matsralwa, Yehovha a hi pfuna ku hambanisa leswi nga swinene ka leswi bihiki. (Heb. 5:14) Loko hi hanya hi ku pfumelelana ni minsinya ya milawu leyi kumekaka a Zritwini dzra Xikwembu Nkulukumba ha sizreleleka hi tlhelo dzra moya ni dzra nyama. (Amaps. 91:4) Handle ka leswo, Yehovha awa hi sizrelela hi ku tizrisa bandla. (Eza. 32:1, 2) Loko hi va kun’we ni vhanu lava zrandzraka Yehovha va tlhela va hanya hi ku pfumelelana ni minsinya ya milawu yake, va hi kutxa va tlhela va hi tiyisa akuva hi fambela kule ni minkutxetelo ya ku biha.—Amapr. 13:20.

14. a) Ha yini Xikwembu Nkulukumba a nga hi sizreleli ka mindzringo hinkwayu leyi hi kumanaka na yone? b) Xana Amapsalma 9:10 yi hi tiyisekisa yini? (Tlhela u vona nthlamuxelo wa le hansi.)

¹⁴ A nkameni lowu khalutiki, minkama yin’wana Yehovha a sizrelele malandzra yake akuva ma nga fi kumbe ku vavisiwa. Kambe a hi minkama hinkwayu a yentxiki leswo. Minkama yin’wana mintxhumu leyi a hi nga yi yimelanga ya hi humelela. (Ekles. 9:11) Handle ka leswo, a matin’wini ya vhanu Yehovha a pfumelele kuva malandzra yake ma xanisiwa nambi kuva ma dlayiwa akuva a kombisa leswaku Sathana i muhembi. (Yb. 2:4-6; Mat. 23:34) Swi hi ndlela leyi fanaka ni namunhla. Nambiloko Yehovha a nga hi suseli mindzringo leyi hi lavisanaka na yone, hi nga tiyiseka leswaku a nge ti txhuka a va tsrhika lava mu zrandzraka. d—Amaps. 9:10

YEHOVHA AWA HI TXHAVELELA

15. Xana hi txhaveleleka hi ndlela yini hi xikhongoto, Bibele ni vamakwezru? (2 Vakorinte 1:3, 4)

¹⁵ Dondzra 2 Vakorinte 1:3, 4. Minkama yin’wana hi nga ha feliwa hi vhanu lava hi va zrandzraka, hi nga ha hlatiyela kumbe hi vaviseka. Swi nga yentxeka swoswi u le ka xiyimu lexi vavisaka lexi ku yentxaka u titwa na u li wuswaku. Xana a kone lweyi a yi twisisaka ndlela leyi u titwaka ha yone? Ina, Yehovha awa yi twisisa. Yehovha a nga twisisi ntsena ku vavisa loku hi ku twaka, kambe awa hi txhavelela “ka swikazratu hinkwaswu leswi hi kumanaka na swone”. Hi ndlela yini? Loko hi kombela Yehovha hi xikhongoto, a hi nyika “ku zrula ka Xikwembu Nkulukumba loku tlulaka ku twisisa hinkwaku”. (Filp. 4:6, 7) Hi tlhela hi txhaveleleka loko hi dondzra mazritu lawa Yehovha a hi tsraleliki wone a Bibeleni. Ka mazritu lawo, Yehovha a hi byela ndlela  leyi a hi zrandzraka ha yone, a hi dondzrisa kuva vhanu lava tlhazrihiki a tlhela a hi nyika dumbo. Hi tlhela hi txhaveleleka loko hi li mintlhanganwini lani hi dondzraka mintxhumu leyi kutxanaka a Bibeleni nakone hi tlhela hi va ni vamakwezru lava hi zrandzraka.

16. Xana u dondzra yini ka leswi humeleliki Nathan na Priscilla?

¹⁶ Hi xikombiso, akuva u vona ndlela leyi Yehovha a hi txhavelelaka a tlhela a hi tiyisa ha yone hi ku tizrisa Bibele, yanakanya hi mfambu wa Nathan na Priscilla lava tsrhamaka a Estados Unidos. Malembenyana ntsrhaku, va teke xiboho xa ku zruzrela lomu a ku ni xivileleko lexikulu xa vazrezri va Mfumu. Nathan a li: “A hi dumba leswaku Yehovha a a ta yi tovokisa minzamu yezru.” Kambe ntsrhakunyana ka loko va tlhase ka xiyavelo xavu leximpshwa, na va nga swi yimelanga va kumane ni swikazratu swa lihanyu va tlhela va langusana ni swikazratu swa timali. Vatekani lava va sindzriseke ku tlhelela kaya, lani va tamiki va va ni swikazratu swa timali. Loko a dzrimuka, Nathan a li: “A ni tivutisa swaku ha yini Xikwembu Nkulukumba a nga hi tovokisanga hi lani a hi yanakanye leswaku a ta yentxa ha kone. Ni ve ni tivutisa leswaku kumbe a ne yentxa ntxhumu lowu hoxekiki.” Kambe hi ku famba ka nkama, Nathan na Priscilla va twisise leswaku Xikwembu Nkulukumba a a nga va tsrhikanga hi nkama lowu a va vilela mpfunu. Nathan a li: “Hi nkama luwani wa ku kazrata, a Bibele dzri fane ni munghanu wezru lweyi a tlhazrihiki lweyi a a hi tiyisa ni ku hi kongomisa.” A tlhele a ku: “A matsrhan’wini ya ku beka miyanakanyu ntsena ka swikazratu, ku yanakanyisisa hi ndlela leyi Yehovha a hi pfuniki ha yone akuva hi kota ku tiyiselela swikazratu leswo swi hi lulamisele akuva hi lipfumelo hi lavisana ni swikazratu leswi a swa ha ta.”

17. Xana makwezru Helga a kume ntxhavelelo hi ndlela yini? (Tlhela u vona ni mufoto.)

¹⁷ Vamakwezru na vone va hi nyika ntxhavelelo lowu hi wu vilelaka. Hi ndlela yini? Vona xikombiso xa Helga lweyi a tsrhamaka a Hungria. Ku dzringana malembe manyingi, Helga a lwisane ni swikazratu swa ku siyanasiyana leswi mu yentxiki a titwa na nga li wa ntxhumu. Kambe loko a yanakanyisisa hi nkama lowu khalutiki, a vone  ndlela leyi Yehovha a a mu txhavelela ha yone hi ku tizrisa vamakwezru. A tsrale a ku: “Minkama hinkwayu Yehovha a ni pfunile loko a vona leswaku ntamu wanga a wu li wutsrongo hikola ka ntizro wa siku ni siku, ku hlayisa n’wananga lweyi a a vabya ni loko ni lwisana ni mindzringo yin’wana. Ka 30 wa malembe lawa ma khalutiki a dzri vanga kone siku ni dzrin’we ledzri Yehovha a kalaka a nga hetisisanga xidumbiso xake xa ku ni txhavelela. Minkama yinyingi awa ni tiyisa hi ku tizrisa vamakwezru lava zron’wekaka ha mine va tlhela va ni byela mazritu lawa ma yakaka. Minkama yinyingi a ni yamukela mamensaji, mapapela nakone a va ni kulungela hi nkama lowu a ni swi vilela ha wone.”

18. Hi nga txhavelela van’wana hi ndlela yini?

¹⁸ Hi ni mukhandlu wa ku yetisela Xikwembu Nkulukumba wezru hi ku txhavelela van’wana. Hi nga swi yentxisa kuyini leswo? Hi ku va yingiseta hi ku lehisa mbilu, hi ku vulavula na vone hi ndlela leyi txhavelelaka ni hi ku va pfuna hi leswi va swi vilelaka. (Amapr. 3:27) Hi tikazratela ku txhavelela hinkwavu lava xanisekaka, ku patsra ni lava kalaka va nge si sungula ku mu tizrela Xikwembu Nkulukumba. Loko vavhizinyu vezru va vavisekile, va vabya kumbe ku hlatiyela, ha va pfuxela, hi va yingiseta ni ku va byela matsralwa lawa ma tiyisanaka ya le Bibeleni. Loko hi yetisela Yehovha, “Xikwembu Nkulukumba wa ntxhavelelo hinkwawu”, hi ta kota ku pfuna ku nga li ntsena vakriste ku tiyiselela swikazratu, kambe hi nga ha pfuna ni lava kalaka va nga mu tizreli Xikwembu Nkulukumba akuva va dondzra ha yene.—Mat. 5:16.

MINKAMA HINKWAYU YEHOVHA A TA HI PFUNA

19. I yini leswi Yehovha a hi yentxelaka swone nakone hi nga mu yetisela hi ndlela yini?

¹⁹ Yehovha a zron’weka ngopfu hi vhanu hinkwavu lava mu zrandzraka. A nga hi tsrhiki loko hi lwisana ni swikazratu. Ku fana ni papayi lweyi a hlayisaka n’wanake hi lizrandzru, Yehovha a hlayisa vagandzreli vake va ku dumbeka. Awa hi kongomisa, a hi nyika leswi hi swi vilelaka, a hi sizrelela ni ku hi txhavelela. Hi yetisela Papayi wezru wa le matilweni lweyi a nga ni lizrandzru loko hi seketela ni ku tiyisa vhanu van’wana nkama lowu va kumanaka ni mindzringo. Ka misava leyi hi hanyaka ka yone, hi nga ha kumana ni swikazratu hi tlhela hi vaviseka. Kambe hi nga tiyiseka leswaku Yehovha a na hine. Phela a hi dumbisa a ku: ‘U nga txhavi, hikusa ndzri na wene.’ (Eza. 41:10) Awee xidumbiso lexo! Nakunene a hi wuswezru.