1-2. Hi ku ya hi 1 Timoteo 6:20, i yini leswi Timotewu a a nyikiwe swone?

SWI TOLOVELEKILE akuva hi teka mintxhumu leyi nga ya lisima ka hine hi nyika van’wana akuva va hi hlayisela. Hi xikombiso, ntalu wezru hi tolovela ku beka mali a banku. Hi yimela leswaku yi hlayiseka, a hi swi djuli leswaku yi lahleka kumbe yi yiviwa. Xileswo, ha swi twisisa leswaku swi tlhamuxela yini ku teka ntxhumu lowu nga wa lisima hi wu nyika mhunu mumbeni akuva a hi hlayisela.

² Dondzra 1 Timoteo 6:20. Mupostola Pawulo a dzrimuxe Timotewu leswaku yene a a yamukele ntxhumu wa lisima, ku nga wutivi bya ntiyiso bya mintxhumu leyi Xikwembu Nkulukumba a taka yi yentxela vhanu. Nakone Timotewu a a tlhele a nyikiwa ndjombo ya ku ‘zrezra zritu’ ni ku ‘yentxa ntizro wa muzrezri wa evhangeli’. (2Tm 4:2, 5) Xileswo, Pawulo a kutxe Timotewu akuva a bekisa leswi a swi bekiwe ku yene. Hi lani a yentxiki ha kone ka Timotewu, Yehovha a hi nyike mintxhumu ya lisima swinene akuva hi yi bekisa. Hi yini mintxhumu ya kone? Nakone hi nga byi sizrelelisa kuyini wukosi lebyi Yehovha a hi nyikiki byone?

3-4. Hi swini swin’we swa swivangelo leswi yentxaka mintiyiso ya Bibele yi va ya lisima ngopfu swinene?

³ Hi wunene byakwe, Yehovha a hi nyika wutivi lebyi nga byone bya mintiyiso ya lisima leyi nga Zritwini dzrakwe, ku nga Bibele. A mintiyiso leyi nga Bibeleni i ya lisima hikusa yi hi dondzrisa ndlela leyi ha yone hi nga vaka ni wuxaka lebyinene na Yehovha nakone yi hi komba leswi hakunene swi tisaka ku nyonxa. Loko hi pfumela mintiyiso leyo hi tlhela hi hanya ha yone, hi tsrhika ku va swikazrawa swa tindondzro ta madzrimi hi tlhela hi va ni mahanyela lamanene.​—1Ko 6:9-11.

⁴ Ntxhumu wun’wana lowu yentxaka mintiyiso leyi nga Zritwini dzra Xikwembu Nkulukumba yi va ya lisima, hi leswaku Yehovha a yi paluxela ntsena lava titsrongahataka ni lava ‘bekiseliwiki [lava  nga ni ku tiyimisela lokunene, Tradução do Novo Mundo, TNM]’. (Min 13:48) Vhanu lavo, va yi pfumela ndlela leyi Yehovha a yi tizrisaka swoswi akuva a dondzrisa mintiyiso leyo. (Mt 11:25; 24:45) A hi nge ti swi kota ku dondzra mintiyiso leyo na hi nge na mpfunu, nakone a misaveni leyi a ku na ntxhumu lexi nga xa lisima swinene ku fana na yone.​—Pr 3:13, 15.

5. Hi swini swin’wana leswi Xikwembu Nkulukumba a hi nyikiki swone?

⁵ Yehovha a tlhela a hi nyika ndjombo ya ku dondzrisa van’wana mayelanu na yene ni leswi a taka swi yentxa. (Mt 24:14) A dzrungula ledzri hi dzri zrezraka i dzra lisima ngopfu swinene. Dzrone dzri pfuna vhanu akuva va hamba xiyenge xa ndangu wa Yehovha nakone dzri va nyika mukhandlu wa ku hanya hi la ku nga helikiki. (1Tm 4:16) Swi nge na mhaka kumbe hi kota ku yentxa swinyingi kumbe switsrongo a ntizrweni wa nsimu, hinkwezru hi le ku yentxeni ka ntizro wa lisima swinene ku tlula hinkwayu leyi nga kone. (1Tm 2:3, 4) Handle ka ku ganaganeka, i ndjombo yikulu ku va vatizrikulobye na Xikwembu Nkulukumba!​—1Ko 3:9.

6. I yini leswi yentxekeliki vakriste va kukazri lava tsrhikiki ku bekisa leswi a va nyikiwe swone?

⁶ Vakriste van’wana lava hanyiki nkameni wa Timotewu, va tsrhike ku nyika lisima ndjombo ya ku va vatizrikulobye na Xikwembu Nkulukumba. Hi xikombiso, Demas a a zrandzra misava nakone hi mhaka ya leswo a tsrhike ndjombo ya ku tizra na Pawulo. (2Tm 4:10) Fijelu na Hermojene na vone va tsrhike wutizreli byavu hikusa swi tikomba a va txhava ku langusana ni ku xanisiwa ka ku fana ni loku Pawulo a a langusana na kone. (2Tm 1:15) Himenayu, Aleksandro na Filetu va ndzruluke madukwa nakone va tsrhike xihlayelamfuzri. (1Tm 1:19, 20; 2Tm 2:16-18) Swi tikomba na vavanuna volavo a va tiyile hi tlhelo dzra moya, kambe va tsrhike ku pimisa hi leswi hakunene a swi li swa lisima.

7. Hi wani mazrengu lawa Sathana a ma tizrisaka akuva a hi phasa?

⁷ Ni namunhla, Sathana a djula ku hi yentxa hi tsrhika ku bekisa wukosi lebyi Yehovha a hi nyikiki byone. Hi wani mazrengu lawa a ma tizrisaka? Zrengu dzra ku sungula ledzri Sathana a dzri tizrisaka i swihungatiso ni wuhaxi. Yene a tizrisa leswo akuva a hangalasa tindondzro, mapimisela ni mahanyela lama nga hi yentxaka hi tsrhika ntiyiso. Zrengu dzra wubidzri ledzri a dzri tizrisaka i ku hi txhavisa. Yene a dzringisa ku hi txhavisela hi leswi vhanu vambeni va swi hlayaka kumbe hi ku xanisiwa akuva hi tsrhika ku zrezra. Zrengu dzra wuzrazru ledzri Sathana a dzri tizrisaka i madukwa. Sathana a dzringisa ku hi phasa hi ku tizrisa tindondzro leti vone va ti haxaka nakone yene a yimela leswaku hi tsrhika ntiyiso.​—1Tm 6:20, 21.

8. I yini leswi u swi dondzriki ka leswi yentxekeliki makwezru lweyi a vitaniwaka Daniel?

⁸ Loko hi nga tivoneli, hi nga ha tsrhika ntiyiso hakatsrongokatsrongo. Vona leswi  yentxekeliki Daniel, * lweyi a a zrandzra ku tha mavhidiyugemi. Yene a li: “Ni sungule ku tha na ni ni kolomu ka 10 wa malembe. A ku sunguleni, majogu lawa a ni ma tha a ma nge na ntxhumu xa ku biha. Kambe hi ku famba ka nkama, ni sungule ku tha majogu lawa a ma ni madzolonga ni wungoma.” Ku tlhase lani Daniel a a heta 15 wa mawora hi siku na a tha mavhidiyugemi. Yene a tlhele a ku: “Ku hlaya ntiyiso, a ni swi tiva leswaku muxaka wa majogu lawa a ni ma tha ni nkama lowu a ni wu heta ka wone, hakatsrongokatsrongo a swi ni tsrhindzreta kule na Yehovha, kambe mbilu yanga a yi tlanyalile. A ni pimisa swaku a minsinya ya milawu ya Bibele a yi nga khaneli ha mine.” Leswo swi nga yentxekela mun’wana ni mun’wana wezru. Swihungatiso swi nga ha hi hlohlotela hi ndlela ya ku tumbela nakone swi nga hi yentxa hi tsrhika ntiyiso hi ku nabyala. Loko ku yentxeka leswo, hi nga ha gama hi luza mintxhumu ya lisima leyi Yehovha a hi nyikiki yone.

9. Hi ku ya hi 1 Timoteo 1:18, 19, xana Pawulo a fanise Timotewu ni yini?

⁹ Dondzra 1 Timoteo 1:18, 19. Pawulo a fanise Timotewu ni sotxha nakone a mu kutxe akuva a tama a lwa ‘a ku lwa lokunene’. A ku lwa koloko a ku nga li ka nyama, kambe a ku li ku lwa ka moya. Hi kwini ku yelana loku nga kone a xikazri ka vakriste ni masotxha lawa ma nga yimpini? Hi wani matsrhamela lawa hine swanga masotxha ya Kriste hi fanelaka ku va na wone? Hi ta vona ntlhanu wa mintxhumu leyi hi nga yi dondzraka ka xifananiso xa Pawulo. Mintxhumu leyo yi ta hi pfuna akuva hi tama hi khomelela swi tiya a ntiyisweni.

10. Swi tlhamuxela yini ku hisekela timhaka ta Xikwembu Nkulukumba, nakone ha yini hi fanela ku yentxa leswo?

¹⁰ Hisekela timhaka ta Xikwembu Nkulukumba. Musotxha lwenene awa dumbeka. Yene a lwa hi ntamu wakwe hinkwawu akuva a sizrelela lweyi yene a mu zrandzraka kumbe ntxhumu lowu nga wa lisima ka yene. Pawulo a kutxe Timotewu akuva a hisekela timhaka ta Xikwembu Nkulukumba​—leswi liki, a va lweyi a dumbekaka ka Yehovha. (1Tm 4:7) Loko lizrandzru dzrezru ha Xikwembu Nkulukumba dzri ya dzri kula, na kone ku navela kwezru ka ku tama hi khomelela a ntiyisweni ku ta ya ku kula swinene.​—1Tm 4:8-10; 6:6.

11. Ha yini swi vilelela hi va lava tidondzrisaka?

¹¹ Tidondzrise. Musotxha a fanela ku va lweyi a tidondzrisaka loko a djula ku tibekisela yimpi. Timotewu a a tibekiselile hi tlhelo dzra moya hikusa a a landzra swilayu leswi a a nyikiwe swone hi Pawulo nakone yene a a tsrutsruma ku navela ka ku biha, a a tikazratela ku txutxela matsrhamela ya wukriste a tlhela a tipatsra ni vamakwavu a lipfumelweni. (2Tm 2:22) Leswo a swi vilela akuva a va lweyi a tidondzrisaka. Swi tanu ka hine hinkwezru. Hi fanela ku va lava tidondzrisaka akuva hi hlula yimpi leyi hi nga na yone ni ku navela ka ku biha. (Ro 7:21-25) Hi fanela ku va lava tidondzrisaka akuva hi susa wumhunu bya khale hi yambala wumhunu lebyimpswha. (Ef 4:22, 24) Nakone hi fanela ku va lava tidondzrisaka akuva hi nga pfumeleli minkazralu ya siku yi hi sivela ku ya a mintlhanganwini.​—Hb 10:24, 25.

12. Xana hi nga kota ku yampswisa wuswikoti byezru bya ku tizrisa Bibele hi tindlela tini?

¹² Musotxha a fanela ku dondzrela ku tizrisa matlhazri yakwe. Akuva a swi kota, a fanela ku yentxa leswo nkama ni nkama. Hi ndlela leyi fanaka, na hine hi fanela ku swi tiva ha hombe ku tizrisa Zritu dzra Xikwembu Nkulukumba. (2Tm 2:15) Tin’we ta tindlela ta ku yentxa leswo hi nga ti dondzra a mintlhanganwini. Kambe loko hi djula ku kholwisa vambeni leswaku ntiyiso lowu nga Bibeleni i wa lisima swinene, hi fanela ku tolovela ku hamba xidondzro xa ximhunu xa Bibele nkama ni nkama. Hi fanela ku tizrisa a Zritu dzra Xikwembu Nkulukumba akuva hi tiyisa lipfumelo dzrezru. Kambe a hi fanelanga hi gamela ka ku dondzra Bibele ntsena, hi fanela ku yanakanyisisa  hi leswi hi swi dondzraka hi tlhela hi setxhisisa ka mabuku yezru. Ko va hi ndlela leyo ntsena lani hi taka kota ku twisisa Matsralwa ha hombe hi tlhela hi ma tizrisa a wuton’wini byezru. (1Tm 4:13-15) Loko hi yentxa leswo, hi ta lulamela ku tizrisa Zritu dzra Xikwembu Nkulukumba akuva hi dondzrisa vambeni. Nakambe a hi fanelanga hi gamela ka ku dondzrela vayingiseti vezru ndzrimana ya kukazri ya Bibele ntsena, hi fanela ku va pfuna akuva va twisisa leswi ndzrimana leyo yi tlhamuxelaka swone ni ndlela leyi va nga yi tizrisaka ha yone a wuton’wini byavu. Loko hi tolovela ku hamba xidondzro xezru xa ximhunu xa Bibele nkama ni nkama, hi nga swi kota ku yampswisa wuswikoti byezru bya ku tizrisa Zritu dzra Xikwembu Nkulukumba akuva hi dondzrisa vambeni.​—2Tm 3:16, 17.

13. Hi ku ya hi Ba-Heberu 5:14, ha yini hi fanela ku tiva ku hambanisa leswi nga swinene ni leswi bihiki?

¹³ Tiva ku hambanisa leswi nga swinene ni leswi bihiki. Musotxha a fanela ku tiva khombo na dzre he kule a va a dzri tingawula. Na hine hi fanela ku dondzra ku tiva mintxhumu leyi nga ha vaka khombo ka hine hi va hi yi tingawula. (Pr 22:3; dondzra Ba-Heberu 5:14.) Hi xikombiso, hi fanela ku hlawula ha hombe swihungatiso swezru. Ma-filme manyingi ni minongonoko ya televhizawu yi kombisa mahanyela lawa ma nga liki manene. Mahanyela wolawo ma khunguvanyisa Xikwembu Nkulukumba nakone hi wugamu ma ta hi vangela khombo. Xileswo, hi fanela ku fambela kule ni swihungatiso swin’wana ni swin’wana leswi hakatsrongokatsrongo swi nga ha hi yentxaka hi tsrhika ku zrandzra Xikwembu Nkulukumba.​—Ef 5:5, 6.

14. Xana ku tiva ku hambanisa leswi nga swinene ni leswi bihiki swi mu pfune hi ndlela yini Daniel?

¹⁴ Daniel, lweyi hi sunguliki hi khanela ha yene, a voni leswaku ku tha mavhidiyugemi lawa ma kombisaka madzolonga ni lawa ma fambisanaka ni wungoma a swi nga li swinene. Xileswo, a kambisise timhaka ta kukazri ka Watchtower Library leti a ti ta mu pfuna ku langusana ni xikazratu lexo. Ma ve wani mabindzru ya kone? Daniel a tsrhike ku tha mavhidiyugemi lawa ma nga liki manene, nakone a tsrhike ku tipatsra ni vhanu lavaya a a tha na vone. Daniel a li: “A matsrhan’wini ya ku tha mavhidiyugemi, ni sungule ku tizrisa nkama wanga ka mintxhumu yimbeni ni ku tlhela ni heta nkama ni vamakwezru va le bandleni.” Swoswi Daniel i nkulu wa bandla a tlhela a va phayona.

15. Ha yini madzrungula ya madzrimi ma ni khombo?

¹⁵ Ku fana na Timotewu, na hine hi fanela ku tiva ku hambanisa madzrungula ya madzrimi lawa ma hangalasiwaka hi madukwa. (1Tm 4:1, 7; 2Tm 2:16) Hi xikombiso, va nga ha hangalasa madzrimi mayelanu ni vamakwezru kumbe va  byala ku ganaganeka mayelanu ni nhlengeletanu ya Yehovha. Madzrungula wolawo ya madzrimi ma nga ha khumba lipfumelo dzrezru. Hi fanela ku tivonela akuva hi nga kanganyisiwe ha wone. Ha yini? Hikusa madzrungula wolawo ma hangalasiwa hi ‘vhanu va miyanakanyu ya ku somboloka lava va tipfumalisiki xihlayelamfuzri’. Nkongometo wavu i ku vanga ‘ku phikisana ni timholova’. (1Tm 6:4, 5) Vone va djula leswaku hi kholwa ka madzrimi wolawo ni ku tlhela hi nga va dumbi vamakwezru.

16. Hi yini mintxhumu leyi yi nga ha hi dzrivataka?

¹⁶ U nga dzrivateki. Leswi a a li ‘nhenha leyinene ya Kriste Yesu’, Timotewu a a nga fanelanga ku dzrivateka a wutizrelini byakwe. Yene a a nga fanelanga ku pfumelela leswaku mali kumbe mintxhumu yin’wana yi mu dzrivata. (2Tm 2:3, 4) Ku fana na Timotewu, a hi fanelanga ku pfumelela leswaku ku navela ka ku va ni mintxhumu leyi vonekaka ku hi dzrivata. A ku ‘kanganyisa ka wukosi’ ku nga ha kamalata lizrandzru ledzri hi nga na dzrone ha Yehovha ni hi Zritu dzrakwe. Kone ku nga ha hi yentxa hi nga ha swi naveli ku zrezrela van’wana. (Mt 13:22) Xileswo, hi fanela ku nabyalisa wutomi byezru hi tlhela hi tizrisa nkama ni ntamu wezru akuva hi tama hi ‘zranga hi djula Mfumu’.​—Mt 6:22-25, 33.

17-18. I yini leswi hi nga swi yentxaka akuva hi sizrelela wumoya byezru?

¹⁷ Tilulamiseli akuva u hatla u yentxa xa kukazri. Musotxha a fanela ku dondzra na ke he nkama leswi a taka swi yentxa a xiyin’wini xa kukazri. Loko hi djula ku sizrelela leswi Yehovha a hi nyikiki swone akuva hi swi bekisa, hi fanela ku hatla hi yentxa xa kukazri loko ku humelela khombo. I yini leswi nga hi pfunaka ku hatla hi yentxa xa kukazri? Hi fanela ku dondzra na ke he nkama leswi hi taka swi yentxa loko ku humelela khombo.

¹⁸ Hi xikombiso, ka mintlhanganu ya kukazri, hakanyingi lava va nga kone va byeliwa leswaku va tiva lomu tinyangwa ta ku huma leti nga kusuhi ti kumekaka kone. Ha yini va yentxa leswo? Hikusa loko ku txhuka ku humelela khombo, hinkwavu va nga kota ku huma hi ku kahlula. Hi ndlela leyi fanaka, na hine hi fanela ku dondzra na ke he nkama leswaku hi ta “humisa” kuyini loko ku txhuka ku kombisiwa xifaniso xa kukazri lexi nga basangakiki, xiyentxakalu xa kukazri xa madzolonga kumbe mhaka ya kukazri ya madukwa loko hi hlalela televhizawu kumbe loko hi tizrisa internet. Loko hi tilulamisela na ke he nkama, hi ta swi kota ku hatla hi yentxa xa kukazri. Hi ta sizrelela wumoya byezru nakone hi ta tama hi va lava basiki a matihlweni ya Yehovha.​—Ps 101:3; 1Tm 4:12.

19. Hi wani matovoko lawa hi taka ma kuma loko hi sizrelela mintxhumu ya lisima leyi Yehovha a hi nyikiki yone?

¹⁹ Hi fanela ku bekisa mintxhumu ya lisima leyi Yehovha a hi nyikiki yone— ku nga mintiyiso ya lisima leyi nga Bibeleni ni ndjombo ya ku yi dondzrisa vhanu vambeni. Loko hi yentxa leswo hi ta va ni mintxhumu yinyingi leyinene: Hi ta va ni lipfalu ledzri basiki, hi ta va ni wutomi lebyi nga ni nkongometo nakone hi ta nyonxa hi ku vona vambeni na va tiva Yehovha. U nga ganaganeki leswaku hi ku pfuniwa hi Yehovha u ta swi kota ku bekisa leswi bekiwiki ku wene.​—1Tm 6:12, 19.