NHLOKO-MHAKA YA XIDONDZRO 38
‘Tanani Ku Mine, . . . Ndzri Ta N’wi Wisisa’
‘Tanani ku mine, hinkwenu lava kazraliki, na n’wine n’wi bindzriwaka, ndzri ta n’wi wisisa!’—MT 11:28.
LISIMU 17 ‘Na Swi Djula’
NKATSRAKANYU WA LESWI TAKA DONDZRIWA *
1. Hi ku ya hi Mattheo 11:28-30, hi xini xidumbiso lexi Yesu a xi yentxiki?
YESU a dumbise xitsrhungu lexi a xi mu yingiseta ntxhumu wa ku xonga. A te: ‘Tanani ku mine’, a gama a ku: ‘Ndzri ta n’wi wisisa.’ (Dondzra Mattheo 11:28-30.) Xidumbiso lexo a xi nga li madzrimi. Hi xikombiso, pimisa hi leswi a swi yentxeliki wansati wa kukazri lweyi a a ni mavabyi ya ku kazrata swinene.
2. I yini leswi Yesu a swi yentxeliki wansati lweyi a a vabya?
2 Wansati lweyo a a kazratekile swinene. A a djuletele vadokodela vanyingi, kambe a swi pfunanga ntxhumu. Ntsrhaku ka kuva a hete 12 wa malembe na a li ku xanisekeni, a a ha tama a vabya. Hi ku ya hi nawu wa Moxe, a a kumeka na a nyamile. (Lv 15:25) Kambe a game a yingela leswaku Yesu a a swi kota ku daha lava vabyaka, xileswo a fambe a ya mu djuletela. Loko a mu kumile, a khumbe ponta ya nkhantxu wakwe, kutani hi ku hatlisa a hanyisiwa! Kambe Yesu a nga gamelanga ka ku mu daha ntsena—a pfune wansati lweyo ku tlhela a tivona na a li lweyi a zrandzrekaka ni lweyi a yamukelekaka. Hi xikombiso, Yesu a mu vitane hi ndlela ya lizrandzru ni ya xitxhavu a ku ‘n’wananga’. Vona ndlela leyi wansati lweyo a wisisiwiki ha yone hakunene!—Lk 8:43-48.
3. Hi swini swivutiso leswi hi taka swi hlamula?
3 Xiya leswaku wansati lweyo hi yene a yiki ka Yesu. Hi yene a tikazratiki. Hi la ku fanaka namunhla, hi fanela ku tikazrata akuva hi ya ka Yesu. I ntiyiso leswaku swoswi Yesu a nga yentxi mahlolana akuva a hanyisa mavabyi ya lava yaka ka yene. Kambe a ha tama a va zramba a ku: ‘Tanani ku mine, . . . ndzri ta n’wi wisisa.’ Ka nhloko-mhaka leyi, hi ta hlamula swivutiso swa ntlhanu leswi landzrelaka: I yini leswi hi fanelaka ku swi yentxa akuva hi ya ka Yesu? Xana Yesu a a djula ku hlaya yini loko a ku: ‘Tibyatsrhelani a mpinga wanga’? I yini leswi hi nga swi dondzraka ka xikombiso xa Yesu? Ha yini ku yentxa ntizro lowu a hi nyikiki wone swi hi wisisa? Nakone xana hi nga swi kotisa kuyini ku ya mahlweni hi kuma ku wisa hi ku zrwala mpinga wa Yesu?
“TANANI KU MINE”
4-5. Hi tini tindlela leti hi nga yaka ka Yesu ha tone?
4 Ndlela yin’we leyi hi nga yaka ka Yesu ha yone i ku dondzra hi leswi a swi hlayiki ni ku swi yentxa hi lani hi nga swi kotaka ha kone. (Lk 1:1-4) A ku na lweyi a nga hi yentxelaka swone—hi fanela ku dondzra mayelanu ni wutomi bya Yesu ha wuswezru. Nakone hi ya ka Yesu loko hi titekela xiboho xa ku babatisiwa ni ku va valandzreli vakwe.
5 Ndlela yin’wana leyi hi nga yaka ka Yesu ha yone i ku djuletela vakulu loko hi vilela mpfunu. Yesu a tizrisa swihiwa leswo leswi nga vhanu akuva a hlayisa tihamba takwe. (Ef 4:7, 8, 11; Yh 21:16; 1Pe 5:1-3) Hi hine hi fanelaka ku zranga hi kombela mpfunu wavu. A hi fanelanga ku yimela leswaku vakulu va ta dondzra leswi nga miyanakanywini yezru va tlhela va tiva leswi hi swi vilelaka. Vona leswi makwezru lweyi a vitaniwaka Julian a swi hlayiki. A te: “Ni sindzriseki ku tsrhika xiyavelo xanga a Betele hi kola ka mavabyi. Kutani mun’we wa vanghanu vanga a ni byele leswaku a ni fanela ku kombela vakulu leswaku va ni hambela liyendzro dzra wubyisi. A ku sunguleni, ni pimise leswaku a swi nga ti vileleka. Kambe ni game ni kombela mpfunu, nakone liyendzro dzravu ku ve xin’we xa swihiwa swa ku xonga leswi ni nga sama ni swi yamukela.” Vakulu lava dumbekaka, va ku fana ni lava yendzreliki Julian, va nga hi pfuna ku tiva “ku yanakanya ka Kriste”, leswi liki, ku twisisa ni ku yetisela mapimisela ni mahanyela yakwe. (1Ko 2:16; 1Pe 2:21) Handle ka ku ganaganeka, lexo hi xone xihiwa xa ku tlula hinkwaswu leswi va nga hi nyikaka swone!
‘TIBYATSRHELANI A MPINGA WANGA’
6. Xana Yesu a a djula ku hlaya yini loko a ku: ‘Tibyatsrhelani a mpinga wanga’?
6 Mazritu ya Yesu lama liki ‘tibyatsrhelani a mpinga wanga’ ma nga ha va ma hlaya leswaku ‘yamukelani wulawuli byanga’. Nakone swi nga ha yentxeka a a djula ku hlaya leswaku: “A hi byatsrheni mpinga wanga, hi tizrela Yehovha xikan’we.” Kambe leswi tiyiki hi leswaku ku byatsrha mpinga swi tlhamuxela ku tizra.
7. Hi ku ya hi Mattheo 28:18-20, hi wini ntizro lowu hi nyikiwiki wone, nakone hi nga dumba yini?
7 Hi yamukela xizrambu xa Yesu loko hi nyiketela wutomi byezru ka Yehovha hi va hi babatisiwa. Xizrambu lexo xi ya ka vhanu hinkwavu—Yesu a nga ti txhuka a yalela mhunu ni mun’we lweyi a swi djulaka hi mbilu hinkwayu ku tizrela Xikwembu Nkulukumba. (Yh 6:37, 38) Valandzreli hinkwavu va Kriste va nyikiwe mukhandlu wa ku xonga wa ku tizra xikan’we na Yesu ka ntizro lowu Yehovha a mu nyikiki wone. Hi nga dumba leswaku Yesu minkama hinkwayu a ta va na hine ka ntizro lowo nakone a ta hi pfuna ku wu yentxa.—Dondzra Mattheo 28:18-20.
‘N’WI DONDZRA KU MINE’
Wisisa vambeni ku fana na Yesu (Vona mayava 8-11) *
8-9. Ha yini vhanu lava titsrongahataka a va zrandzra ku va kusuhi na Yesu, nakone hi swini swivutiso leswi hi fanelaka ku tihamba swone?
8 Vhanu lava titsrongahataka a va zrandzra ku va kusuhi na Yesu. (Mt 19:13, 14; Lk 7:37, 38) Ha yini? Hikusa Yesu a a hambanile ni vafarisi. Vazrangeli lavo va wukhongoti a va khoma vhanu hi mona nakone a va tikukumuxa. (Mt 12:9-14) Yesu a a ni lizrandzru nakone a a titsrongahata. Vafarisi a va djula ndhuma nakone a va tikukumuxa hi kola ka xikhundla lexi a va li naxu. Yesu a dondzrise vadondzrisiwa vakwe leswaku a va fanelanga ku tivona na va li lava tlulaka vambeni, kambe va fanela ku va lava tizrelaka vambeni. (Mt 23:2, 6-11) Vhanu a va yingiseta vafarisi hi leswi a va va txhava. (Yh 9:13, 22) Yesu a wisise vambeni hi mazritu ya wumbilu xikan’we ni mintizro yakwe ya lizrandzru.
9 Xana u suse ndondzro ya kukazri ka leswi Yesu a a li xiswone? Tivutise: ‘Xana vhanu va ni vona swanga mhunu lweyi a titsrongahataka ni lweyi a nga mbulwa? Xana na pfumela ku yentxa mintizro ya le hansi akuva ku pfuneka vambeni? Xana ni mhunu wa wumbilu?’
10. Hi wini moya lowu Yesu a a wu kutxa loko a tizrisana ni vambeni?
10 Yesu a a kutxa moya wa ku zrula ni lowu a wu yentxa lava a va tizra na yene va titwa ha hombe. Nakone a a zrandzra ku va dondzrisa. (Lk 10:1, 19-21) Yesu a a va kutxa leswaku va hamba swivutiso, nakone a a zrandzra ku yingela mavonela yavu. (Mt 16:13-16) Ku fana ni swibewu leswi byaliwiki a mbangwini lowu swi kumaka ku hisa lokunene, vadondzrisiwa a va zrumbuka hi ku kumeka xikan’we na Yesu. Va khome leswi Yesu a a va dondzrisa swone nakone va beke mihandzru, kumbe, va yentxe mintizro leyinene.
Vana lwa nghenekaka ni lweyi a nga ni xinghanu
Vana ni nkhinkhi
Vana lwa titsrongahataka ni lweyi a zrandzraka kutizra *
11. I yini leswi hi fanelaka ku tivutisa swone?
11 Xana u nyikiwi wulawuli bya kukazri? Loko swi li tanu, tivutise: ‘Hi wini moya lowu ni wu kutxaka a ntizrweni kumbe a kaya? Xana ni kutxa ku zrula? Xana ni kutxa vambeni leswaku va hamba swivutiso? Nakone ni tiyimiselile ku yingiseta mavonela yavu?’ Handle ka ku ganaganeka, a nga kone ni mun’we wezru lweyi a djulaka ku fana ni vafarisi, lava a va hlundzrukela lava a va va hamba swivutiso nakone a va xanisa lava a va ni mavonela lawa a ma hambane ni yavu.—Mr 3:1-6; Yh 9:29-34.
‘NDZRI TA N’WI WISISA’
12-14. Ha yini ku yentxa ntizro lowu Yesu a hi nyikiki wone swi hi wisisa?
12 Ha yini ku yentxa ntizro lowu Yesu a hi nyikiki wone swi hi wisisa? Ku ni swivangelo swinyingi, kambe a hi voneni swi nga li swingani.
13 Hi ni valaviseli lavanene ngopfu. Yehovha, Mulaviseli wezru Lwenkulu, a nga na tihanyi nakone awa swi kota ku tlangela. A nyika lisima ntizro lowu hi mu yentxelaka wone. (Hb 6:10) Nakone a hi nyika ntamu lowu hi wu vilelaka akuva hi wu hetisisa. (2Ko 4:7; Ga 6:5) Yesu, Hosi yezru, a hi nyika xikombiso lexinene xa ndlela leyi hi fanelaka ku va khoma ha yone van’wana. (Yh 13:15) Nakone vakulu lava hi byisaka va dzringisa ku yetisela xikombiso xa Yesu, ‘mubyisi lwenkulu’. (Hb 13:20; 1Pe 5:2) Loko va hi byisa ni ku hi sizrelela, va tikazratela ku yentxa leswo hi ndlela leyinene ni leyi kutxaka, nakone va ni xixixi.
14 Hi ni vanghanu lavanene ngopfu. Hi ni ntizro lowu nyonxisaka ku tlula mintizro hinkwayu leyi vhanu va nga nayu nakone hi ni vanghanu lava zrandzrekaka ku tlula hinkwavu. Pimisa hi leswi: Hi ni ndjombo ya ku tizra ni vhanu lava landzraka milawu leyi tlakukiki ya mahanyela, nambitanu a va tivoni na va li lava yampswaka ku tlula vambeni. Va ni wuswikoti byinyingi, kambe va titsrongahata nakone va vona van’wana na va li lava va va tlulaka. A va hi voni swanga vatizri-kulobye ntsena kambe va hi vona swanga vanghanu vavu. Nakone wunghanu byezru i byikulu ngopfu lakakuva va tiyimiseli ku nyikela wutomi byavu hi nkonta yezru!
15. Xana hi titwisa kuyini hi ku yentxa ntizro lowu hi nyikiwiki wone?
15 Hi ni ntizro lowunene ngopfu. Hi dondzrisa vhanu ntiyiso mayelanu na Yehovha nakone hi paluxa madzrimi ya Diyavulosi. (Yh 8:44) Sathana a zrwexa vhanu mpinga lowu va nga kotikiki ku wu zrwala. Hi xikombiso, a djula leswaku hi pimisa leswaku Yehovha a nge hi dzrivaleli swihoxo swezru ni leswaku a hi faneliwi hi lizrandzru dzrakwe. Vona madzrimi ni mpinga lowu bindzraka swinene! Loko hi ya ka Kriste, Yehovha awa hi dzrivalela swihoxo swezru. Nakone ntiyiso wa mhaka hi leswaku Yehovha a hi zrandzra ngopfu swinene. (Ro 8:32, 38, 39) A hi ku nyonxisa ka swone ku pfuna vhanu ku dumba Yehovha ni ku va vona na va yampswisa wutomi byavu!
YANA MAHLWENI U KUMA KU WISA HI KU ZRWALA MPINGA WA YESU
16. Hi kwini ku hambana loku nga kone a makazri ka mpinga lowu Yesu a hi kombelaka leswaku hi wu zrwala ni leyin’wana?
16 Mpinga lowu Yesu a hi kombelaka leswaku hi wu zrwala wu hambanile ni yin’wana leyi hi yi zrwalaka siku ni siku. Hi xikombiso, swi tolovelekile leswaku hi yingela minkazralu, hi tlhela hi pfilunganyeka ntsrhaku ka ku buya hi le ntizrweni wa ku tihanyisa. Hi tlhelo dzrin’wana, ntsrhaku ka ku heta mawora na hi tizrela Yehovha na Yesu, hi titwa na hi yanelisekile swinene. Hi nga ha yingela minkazralu hi tlhela hi yentxa hi ku tikoka akuva hi ya mintlhanganwini ya bandla siku ledzro. Kambe loko hi muka a kaya, hi talisa ku titwa na hi pepile hi tlhela hi kuma ntamu. Swi hi ku fana loko hi yentxa minzamu akuva hi ya ku zrezreni ni ku yentxa xidondzro xezru xa ximhunu xa Bibele. Matovoko lawa hi ma kumaka i manyingi swinene ku tlula ntamu lowu hi wu tizrisaka!
17. I yini leswi hi fanelaka ku swi pfumela, nakone hi fanela ku tivonela ka yini?
17 Hi fanela ku pfumela leswaku mun’wana ni mun’wana wezru a ni mpimu wa kukazri wa ntamu. Xileswo hi fanela ku tivonela loko hi hlawula leswi hi djulaka ku swi zrwala. Hi xikombiso, hi nga ha heta ntamu wezru na hi dzringisa ku tikumela mintxhumu leyi vonekaka. Xiya leswi Yesu a swi byeliki djaha dzra kukazri ledzri mu vutisiki dzri ku: ‘Xana ni ta yentxa yini akuva ndzri da pfindla dzra vutomi lebyi nga helikiki?’ Djaha ledzro a dzri landzra Nawu, nakone swi nga yentxeka a dzri li mhunu lwenene hikusa a Evhangeli dzra Marka dzri hlaya hi ku kongoma leswaku Yesu ‘a dzri zrandzrile’. Kutani Yesu a zrambe djaha ledzro ledzri a dzri ni mapfindla a ku: ‘Famba, u ya xavisa hinkwaswu leswi u nga naswu . . . kutani tana, u ndzri landzra.’ Djaha ledzro dzri kazratekile. A dzri swi djula ku landzra Yesu, kambe swi tikomba na dzri nga swi djulanga ku siya ‘vukosi lebyikulu’ lebyi a dzri li na byone. (Mr 10:17-22) Xileswo dzri yale ku zrwala mpinga lowu Yesu a a dzri zramba ku wu zrwala nakone dzri ye mahlweni dzri va xikazrawa xa lifuyu. (Mt 6:24) Wene ke? Anha u lange yini?
18. Hi fanela ku pfana hi yentxa yini, nakone ha yini?
18 I swinene kuva hi pfana hi tikambela ku vona leswi hi swi zrangisaka a wuton’wini. Ha yini? Hikusa leswo swi ta hi pfuna ku vona loko hi wu tizrisa hi wutlhazri ntamu wezru. Vona leswi yentxekeliki djaha ledzri vitaniwaka Mark. Dzri li: “Ni hete malembe ya ku tala na ni pimisa leswaku a ni hanya hi switsrongo. A ni li phayona, kambe minkama hinkwayu a ni pimisa hi mali ni ku va ni wutomi bya ku yampswa swinene. A ni tivutisa leswaku ha yini wutomi byanga byi bindzra. Kutani ni xiye leswaku a ni landzrelela ngopfu mintxhumu ya kakwanga ni gama ni nyika Yehovha matlhantlha ya ntamu ni nkama wanga.” Mark a txintxe mapimisela yakwe nakone a tiyimisele ku hanya hi ndlela leyi taka mu pfuna ku kuma nkama lowu yengetelekiki wa ku tizrela Yehovha. A li: “Ku ba nkama ni hlatiyela, kambe hi ku pfuniwa hi Yehovha xikan’we ni nseketelo wa Yesu, na swi kota ku hlula mindzringo yoleyo.”
19. Ha yini ku va ni vonela ledzrinene swi li swa lisima?
19 Hi ta tama hi kuma ku wisa hi ku zrwala mpinga wa Yesu loko hi yentxa mintxhumu yizrazru. Wa ku sungula, vana ni vonela ledzrinene. Hi yentxa ntizro wa Yehovha, xileswo hi fanela ku wu yentxa hi ndlela yakwe. Hine hi vatizri, Yehovha hi yene lweyi a hi nyikaka swileleto. (Lk 17:10) Loko hi dzringisa ku yentxa ntizro wakwe hi mayentxela yezru, hi ta tibindzrisela ha wuswezru. Hi xikombiso, yanakanya leswi nga yentxekelaka homu ya kukazri leyi bekeliwiki kange loko yi tsrhamela ku djika-djika, a matsrhan’wini ya ku landzra nkongomiso wa n’wini wa yone. Nambiloko yi ni ntamu swinene, yi ta gamela hi ku kazrala yi tlhela yi tivavisa. Xileswo, loko hi landzra nkongomiso wa Yehovha, mabindzru ma ta va manyingi nakone hi ta hlula xikazratu xin’wana ni xin’wana. Dzrimuka leswaku a ku na mhunu lwa nga kotaka ku sivela ku zrandzra kwakwe leswaku ku hetiseka!—Ro 8:31; 1Yh 4:4.
20. I yini lexi fanelaka ku hi susumetela ku zrwala mpinga wa Yesu?
20 Ntxhumu wa wubidzri, tizra hi nkongometo lowunene. Nkongometo wezru i ku tisela Yehovha, Tatana wezru, lidzrumu. A masikwini ya Yesu lava a va tizra na va djula leswaku ku pfuneka vone ntsena va game va heleliwa hi ku nyonxa nakone va tsrhike ku zrwala mpinga wa Yesu. (Yh 6:25-27, 51, 60, 66; Flp 3:18, 19) Hi tlhelo dzrin’wana, lava a va tizra hi leswi a va zrandzra Yehovha ni walekwavu va tame va zrwala mpinga wa Yesu hi ku nyonxa a wuton’wini byavu hinkwabyu nakone va kume ku lavisela ka ku tizra na Yesu a tilweni. Ku fana na vone, hi ta tama hi nyonxa loko hi zrwala mpinga wa Yesu hi nkongometo lowunene.
21. Hi ku ya hi Mattheo 6:31-33, i yini leswi hi nga yimelaka leswaku Yehovha a hi yentxela swone?
21 Ntxhumu wa wuzrazru, vana ni ku lavisela lokunene. Ku zrwala mpinga wa Yesu swi patsra ku hanya hi ku titsrona swa kukazri ni ku tizra swinene. Yesu a hi be ndleve ka leswaku hi ta xanisiwa. Kambe hi nga yimela leswaku Yehovha a ta hi nyika ntamu wa ku tiyisela xikazratu xin’wana ni xin’wana. Loko hi tama hi tiyisela, hi ta ya hi kuma ntamu. (Yk 1:2-4) Nakone hi nga yimela leswaku Yehovha a ta hi nyika leswi hi swi vilelaka, Yesu a ta tama a hi byisa nakone vamakwezru va ta tama va hi nyika ntamu. (Dondzra Mattheo 6:31-33; Yh 10:14; 1Te 5:11) Hakunene, hi ta va ni hinkwaswu leswi hi swi vilelaka akuva hi tama hi tiyisela!
22. I yini leswi hi nga swi tlangelaka swinene?
22 Wansati lweyi a hanyisiwiki hi Yesu a kume ku wisisiwa hi siku ledzri a hanyisiwiki ha dzrone. Kambe akuva a tama a kuma ku wisisiwa hi la ku nga helikiki a a fanela ku va mulandzreli wa ku dumbeka wa Yesu. Hi ku vona kwaku a nga va a hlawule ku yentxa yini? Loko i li leswaku a hlawule ku zrwala mpinga wa Yesu, yanakanya hakelo ledzri a dzri kumiki—dzra ku fuma na Yesu a tilweni! Minzamu hinkwayu leyi a yi yentxiki akuva a landzrela Yesu a hi ya ntxhumu loko yi fananisiwa ni tovoko ledzro. Nambiloko dumbo dzrezru dzri li dzra ku hanya a tilweni kumbe la misaveni, hi nga tlangela swinene hi leswi hi yamukeliki xizrambu xa Yesu lexi liki: “Tanani ku mine!”
LISIMU 13 Kriste I Xikombiso Xezru
^ par. 5 Yesu a hi zramba leswaku hi ya ka yene. I yini leswi hi fanelaka ku swi yentxa akuva hi kombisa leswaku ha xi yamukela xizrambu lexo? Nhloko-mhaka leyi yi ta hlamula xivutiso lexo, nakone yi ta hi dzrimuxa leswi hi nga wisisiwaka xiswone hi ku tizra na Yesu.
