Ni pswaliwe ka doropa dzra Saxônia a República Democrática Alemã. A xiyimu kaya a xi nyonxisa swinene. Vapswele vanga va ni dondzrise mahanyela lamanene. Leswi tikweni a ku fuma vakomunixta, ku tala kwezru a hi nge na mhaka ni wukhongoti. Ku hlaya ntiyiso a ni nga pfumeli leswaku Xikwembu xi kone. Ku sukela ne he ntsrongo ku tlhasa loko ni ve ni 18 wa malembe, a ni pfumela ka tindondzro tibidzri: Dondzro ya leswaku Xikwembu a xi kone ni ku zrandzra wukomunijimu.

Ha yini wukomunijimu a byi ni nyonxisa? Hikusa a ni nyonxela mhaka ya leswaku vhanu hinkwavu va fana nakone a ni yanakanya leswaku mintxhumu a yi fanela ku nyikiwa vhanu hi lani ku fanaka. Leswo a swi ta yentxa kuva wusiwana byi hela. Ni sungule pfunisa ka ntlawa wa vampswha wa vakomunixta. Loko ni ve ni 14 wa malembe, ni hete nkama wa ku tala na ni tizra ku basisa mbangu ka tsima dzra ku yentxa mapapela ya khale ma tlhela ma tizrisiwa. Vazrangeli va doropa dzra Aue, va wu nyonxele swinene ntizro wanga nakone va ni nyike xihiwa. Nambileswi a ni li mumpswha, ni kumane ni vazrangeli vanyingi va politika va vakomunixta. Ka mine a ni tivona na ni li ndleleni leyinene.

Na ni nga swi yimelanga mintxhumu yi txintxile. Hi lembe dzra 1989, a muru wa Berlim wu wile nakone mimfumu yinyingi ya wukomunijimu ya le Europa na yone yi wile. Leswo swi ni khumbe ngopfu. Ni game ni gungula leswaku tiko dzranga a dzri yentxa wubihi byikulu. Hi xikombiso, vhanu lava a va nga yimi ni wukomunijimu a va nga na timfanelo ta ku fana ni ta van’wana. A ni tivutisa leswi: xana swi kotekisa kuyini leswo? Kasi vakomunixta hinkwavu a va fani? Xana leswi swa wukomunijimu i madzrimi? Leswo swi ni yentxe ni sungula ku kazrateka.

Kutani ni vone swi yampswa ku beka mimpimiso yanga ka ku yimbelela ni ku dezenyara. Hi nkama wolowo, a ni dondzra ka xikole xi dondzrisaka ku yimbelela nakone a ni navela ku tama ni dondzra a wuyimbeleli a univhersidadi. Ku navela kwanga a a li ku va muyimbeleli ni mudezenyari. Ni tsrhike ku hanya hi leswi vapswele vanga va ni dondzrisiki swone. Leswi a ni swi vona na swi li swa lisima kwanga nkameni wolowo, a ku li ku tinyonxisa, leswi a swi patsra ku zrandzrana ni tintombhi tinyingi hi nkama wun’we. Kambe ku yimbelela ni ku dezenyara ni ku hanya wutomi bya ku tilawula, a swi yentxanga leswaku ni tsrhika ku kazrateka. Nambi leswi a ni swi dezenyara a swi kombisa txhava koloko. A ni tivutisa leswi: xana ku ta yentxeka yini ha mine? Hi wini nkongometo wa wutomi?

Loko ni kume tinhlamulo ta swivutiso swanga swi ni hlamalisile! Siku dzrimbeni a xikole mine ni vanghanu vanga a hi bula mayelanu hi wumundzruku. Mun’we wa vanghanu lava lweyi vito a a li Mandy,  * a a li Mboni ya Yehovha, a ni byele leswi: “Andreas loko u djula ku kuma tinhlamulo ta swivutiso swaku mayelanu ni wutomi ni wumundzruku u fanela ku dondzra Bibele.”

A ni nga dumbi hi ku helela leswi a swi hlayiki kambe nambi swi li tani ni vone swi yampswa ku dondzra Bibele. Mandy a ni kombe ndzrima 2 ka buku dzra Daniyele, nakone ni hlamalisiwe hi leswi ni swi dondzriki. Ndzrima leyi vulavula hi mimfumu yinyingi leyi a yi ta hi khumba swinene ku ta tlhasela namunhla. Mandy a tlhele a ni komba wuprofeta dzrin’wana ledzri a dzri vulavula hi wumundzruku. Hi wugamu ni tikumile tinhlamulu ta swivutiso swanga! Kambe i mani lweyi a tsraliki wuprofeta lebyi? Nakone a swi kotisa kuyini ku vulavula hi wumundzruku hi ndlela leyi nga yone? Xana leswi swi kombisa leswaku Xikwembu xi kone hakunene?

Mandy a ni yise ka Horst na Angelika , vatekani lava nga Timboni lava ni pfuniki ku twisisa Bibele ku yampswa. Hi ku kahlula ni vone leswaku Timboni ta Yehovha hi byone ntsena wukhongoti lebyi pfunaka vhanu ku tiva vito dzra Xikwembu Nkulukumba ku nga Yehovha. (Amapsalma 83:18; Matewu 6:9) Ni tlhele ni dondzra leswaku Yehovha a dumbisa vhanu wutomi lebyi nga helikiki lani misaveni. Amapsalma 37:9 dzri ‘Kasi lava va tindumbeliki ka Yehovha va ta titekela misava.’ Swi ni nyonxise ku tiva leswaku vhanu hinkwavu lava yingisetaka Yehovha va ta hanya hi lani ku ngahelikiki.

Nambitanu, ku ntxintxa wumhunu byanga bya khale ni hanya hi mi kongomiso ya Bibele a swi ni nabyalelanga. Leswi a ni tikukumuxa hi ku va muyimbeleli lweyi a tiviwa swinene, a swi djula ni dondzra ku titsrongahata. Handle ka leswo, a swi nga nabyali ku tsrhika mahanyela yanga ya ku biha. Ni khensa Yehovha hi leswi a nga Xikwembu Nkulukumba wa ku leha mbilu ni ku dzrivalela, lweyi a vonaka minzamu leyi hi yi yentxaka akuva hi mu tizrela!

Ku sukela na ne he ntsrongo ku ya tlhasa loko ni ve ni 18 wa malembe, wutomi byanga a byi kongomisiwa hi dondzro ya wukomunijimu ni ku kala ni nga pfumeli leswaku Xikwembu xi kone. Kambe swoswi Bibele dzri txintxe wutomi byanga. Leswi ni swi dondzriki swi pumbe ku kazrateka kwanga hi wumundzruku. kutani swi yentxe ni va ni dumbo a wuton’wini. Hi 1993, ni babatisiwile ni va Mboni ya Yehovha, nakone hi lembe dzra 2000 ni txhate na Tabitha lweyi a a hiseka swinene. Namunhla hi heta nkama wunyingi na hi dondzrisa vhanu Bibele. Ntalu wa vhanu lava hi va kumaka va kutxeteliwe hi wukomunijimu ni ku kala va nga pfumeli leswaku Xikwembu xi kone, ku fana ni leswi na mine a ni kholwa ka swone. Ni nyonxa ngopfu hi kuva pfuna kuva va tiva Yehovha ku yampswa.

Loko na ha sungula ku dondzra Bibele ni Timboni ta Yehovha, vapswele vanga a va nyonxanga. Kambe hi ku famba ka nkama, va swi vonile leswaku ku dondzra Bibele ni Timboni ta Yehovha swi txintxe wutomi byanga. Na nyonxa leswi namunhla va dondzraka Bibele va tlhela va hlengemela ni Timboni ta Yehohva.

Mine na Tabitha hi nyonxile a wukatini byezru hikusa hi tizrisa minkongomiso ya Bibele. Hi xikombiso Bibele dzri li vatekani va fanela ku dumbeka. Ku landzra xilayu lexi swi yentxa wukati byezru byi tiya.​—Ba-Heberu 13:4.

Namunhla a na ha kazrateki hi wumundzruku. Na nyonxa hi leswi ni nga mun’we wa Timboni ta Yehovha lweyi a tikholisaka hi ku zrula ni wumun’we. Ka ndangu lowo wa vamakwezru hi hanyisana hi ndlela leyi fanaka. Leswi hi leswi a ni swi djula ku sukela khale.