1-2. Kombisa ndlela leyi Yesu a fanaka ni mukongomisi wezru ha yone.

TIYANAKANYI na wu famba ni vanghanu vaku a mbangwini lowu txhavisaka, ku kalaka ku nga tsrhami mhunu nakone ku nga ni xitsrhwatsrhwa xinyingi. Mu ni mukongomisi lwa tlhazrihiki. Nkama lowu a fambaka, a siya mintila yakwe ka xitsrhwatsrhwa. Ku tlhasa nkama u nga ha mu voni mukongomisi! Nambi swi li tanu a wu txhavi. A matsrhan’wini ya leswo, wene ni vanghanu vaku mi landzra he kusuhi a mintila ya mukongomisi!

² Hi ndlela ya kukazri, hinkwezru swanga vakriste hi le ku fambeni ka mbangu lowu txhavisaka—ku nga misava leyi taliki hi wubihi. Kambe lexi nyonxisaka hi leswaku Yehovha a hi nyike mukongomisi lwa hetisekiki—ku nga N’wanakwe, Yesu Kriste. Hi nga landzrelela he kusuhi mintila leyi Yesu a hi siyeliki yone. (1Pe 2:21) Buku dzra kukazri ledzri vulavulaka hi Bibele, dzri hlaya leswaku ka ndzrimana leyi, Petro a fananise Yesu ni mukongomisi. Ku fana ni leswi mukongomisi a siyaka mintila yakwe, Yesu na yene a siye mintila yakwe akuva hi yi landzra. Ka xidondzro lexi, hi ta twisisa ku yampswa leswi swi tlhamuxelaka swone ku landzra mintila ya Yesu. Hi ta hlamula swivutiso swizrazru—Yini? Ha yini? Hi ndlela yini?

3. Xana swi tlhamuxela yini ku landzra mintila ya mhunu?

³ Xana swi tlhamuxela yini ku landzra mintila ya mhunu? Minkama yimbeni, a Bibele dzri tizrisa mazritu “ku famba” ni “milenge” akuva dzri tlhamuxela ndlela leyi mhunu a hanyaka ha yone. (Gn 6:9; Pr 4:26) A xikombiso lexi mhunu a xi bekaka, xi nga fanisiwa ni mintila leyi mhunu a yi siyaka loko a famba. Xileswo, hi nga hlaya leswaku a ku landzra mintila ya mhunu swi hlaya ku landzra xikombiso xakwe.

4. Xana swi tlhamuxela yini ku landzra mintila ya Yesu?

⁴ A ku landzra mintila ya Yesu ke, swi tlhamuxela yini? Hi  mazritu matsrongo, swi tlhamuxela ku landzra xikombiso xakwe. Ka tsralwa dzra nhlokomhaka ya xidondzro lexi, mupostola Petro a a hlaya hi ku kongoma leswaku Yesu a ve xikombiso lexinene xa ku tiyisela nambi loko a xaniseka; kambe ku ni tindlela timbeni leti hi nga yetiselaka Yesu ha tone. (1Pe 2:18-25) Hi ntiyiso wa kone, hinkwaswu leswi Yesu a swi hlayiki ni ku swi yentxa a wuton’wini byakwe hinkwabyu i xikombiso lexinene xa ku xi yetisela.

5. Xana vhanu va ku kala ku hetiseka va nga swi kota ku landzra xikombiso lexi hetisekiki xa Yesu? Tlhamuxela.

⁵ Leswi hi nga vhanu va ku kala ku hetiseka, xana hi nga swi kota hakunene ku landzra mintila ya Yesu? Ina, hi nga swi kota. A ntlhamuxelo wa le hansi ka 1 Petros 2:21 ka Tradução do Novo Mundo, wu hlaya leswaku “hi fanela ku landzra he kusuhi xikombiso xa Yesu”. Leswi liki, a hi nge swi koti ku landzra hi lani ku hetisekiki a xikombiso xa Yesu, kambe hi nga xi landzra hi lani hi nga kotaka ha kone. Loko hi yentxa leswo, hi tava na hi landzra xitsratsriyo xa mupostola Yohane lexi liki: ‘Famba swanga hi leswi na yene [Yesu] a fambisiki xiswone.’—1Yh 2:6.

6-7. Ha yini hi nga hlayaka leswaku ku landzra mintila ya Yesu swi hi tsrhindzretela kusuhi na Yehovha?

⁶ Ku landzra mintila ya Yesu swi hi yentxa hi tsrhindzrekela kusuhi na Yehovha. Ha yini hi nga hlayaka leswo? Xa ku sungula, Yesu a hi siyele xikombiso lexinene xa ku hanya hi ndlela leyi nyonxisaka Xikwembu Nkulukumba. (Yh 8:29) Kutani loko hi landzra mintila ya Yesu hi ta nyonxisa Yehovha, nakone hi nga tiyiseka leswaku Papayi wezru wa le matilweni a ta tsrhindzrekela kusuhi ni lava va tikazrataka akuva va va vanghanu vakwe.—Yk 4:8.

⁷ Xa wubidzri, Yesu a yetiseli Papayi wakwe hi ndlela leyi hetisekiki. Hi leswi swi yentxiki Yesu a hlaya leswi: ‘Lweyi a ndzri voniki, a voni [Papayi].’ (Yh 14:9) Hi nga yetisela matsrhamela ya Yesu ni ndlela leyi a a khoma vambeni ha yone—hi xikombiso, a twele wusiwana mhunu  wa kukazri lweyi a a ni nhlokonho, a tibeki mbangwini wa wansati lweyi a a vabya swinene nakone a kombise timpswalu ka lava va feliwiki hi vazrandzriwa vavu. Loko hi yetisela xikombiso xa Yesu, hi va na hi yetisela na Yehovha. (Mr 1:40, 41; 5:25-34; Yh 11:33-35) Nakone loko hi ya hi fana na Yehovha, hi ta ya hi tsrhindzrekela kusuhi na yene.

8. Tlhamuxela leswaku ha yini ku landzra mintila ya Yesu swi hi pfuna kuva hi ‘hlula’ misava.

⁸ Ku landzra mintila ya Yesu swi hi pfuna kuva hi nga dzrivatiwi hi misava leyi ya ku biha. A wusikwini bya wugamu swanga mhunu wa nyama, Yesu a hlayi leswi: ‘Mine ndzri hluli misava.’ (Yh 16:33) Yesu a nga pfumelelanga leswaku miyanakanyu, minkongometo ni swiyentxo swa vhanu va misava leyi swi mu dzrivata. A nga pfumelelanga ntxhumu wu mu hingalata ku hetisisa nkongometo wa ku va a te lani misaveni, wa ku va a basisa vito dzra Yehovha. Hine ke? Namunhla wa siku misava yi hi nyika mintxhumu yinyingi akuva yi hi dzrivata a ntizrweni wa Yehovha. Xileswo, ku fana na Yesu hi fanela ku beka miyanakanyu yezru a ntizrweni wa Yehovha. Loko hi yentxa leswo na hine hi nga hlaya leswaku hi ‘hlule’ misava.—1Yh 5:5.

9. I yini leswi hi fanelaka ku swi yentxa akuva hi tama hi famba a ndleleni leyi yisaka a wuton’wini lebyi nga gamikiki?

⁹ Ku landzra mintila ya Yesu swi hi yisa a wuton’wini lebyi nga helikiki. Loko mumpshwa wa kukazri lwa ganyiki a vutise leswaku i yini leswi a nga swi yentxaka akuva a kuma wutomi lebyi nga helikiki, Yesu a mu hlamule a ku: “Tana u ta va mulandzreli wanga.” (Mt 19:16-21) Yesu a byele leswi Vayuda lava a va nga pfumeli leswaku yene i Kriste: ‘A tihamba tanga . . . ta ndzri landzra. Mine ni ta va nyika wutomi lebyi nga gamikiki.’ (Yh 10:24-29) Nakone loko a bulisana na Nikodema, xizro xa huvo ya Sanedri, Yesu a hlaye leswaku hinkwavu lava “pfumelaka ku yene” a va ta kuma ‘wutomi lebyi nga gamikiki’. (Yh 3:16) Hi nga swi kombisa hi ndlela yini leswaku hi ni lipfumelo ka Yesu? Hi ku yingiseta hinkwaswu leswi a hi dondzrisiki ni ku yetisela xikombiso xakwe. Loko hi yentxa leswo, hi ta tama hi famba a ndleleni leyi yisaka a wuton’wini lebyi nga gamikiki.—Mt 7:14.

10. Xana hi nga yentxa yini akuva hi tama hi mu tiva ku yampswa Yesu? (Yohan 17:3)

¹⁰ Xa ku sungula, lexi hi fanelaka ku xi yentxa akuva hi landzra mintila ya Yesu, i kuva hi mu tiva. (Dondzra Yohan 17:3.) Minkama hinkwayu ku ta va ni ntxhumu ximpshwa lexi hi fanelaka ku xi ‘tiva’ ha Yesu—matsrhamela yakwe, ndlela leyi a pimisaka ha yone ni milawu leyi a yi landzraka. Nambi loko hi ni malembe manyingi a ntiyisweni, hi fanela ku tama hi tikazratela ku ‘tiva’ Yehovha na Yesu.

11. I yini leswi hi nga swi kumaka ka Tiyevhangeli ta mune?

¹¹ Hi lizrandzru, Yehovha a hi nyika mpfunu  akuva hi tiva n’wanakwe, ku nga Tiyevhangeli. Mabuku lawa ya mune ma hi pfuna ku tiva wutomi ni ntizro wa Yesu. A tiyevhangeli ti hi dzrungulela leswi Yesu a swi hlayiki ni ku swi yentxa ti tlhela ti hi komba ni ndlela leyi a a titwa ha yone. Hi ku pfuniwa hi mabuku lawa ya mune hi nga kota ku kambisisa ha hombe xikombiso xa Yesu. (Hb 12:3) Ka Tiyevhangeli ku ni mintila leyi Yesu a hi siyeliki yone. Xileswo, loko hi djula ku mu tiva ku yampswa Yesu, hi fanela ku dondzra Tiyevhangeli. Hi ndlela leyo hi ta kota ku landzra hi ku dumbeka mintila yakwe.

12. I yini leswi hi nga swi yentxaka akuva hi susa londzrovoto ka Tiyevhangeli?

¹² Akuva hi susa londzrovoto ka Tiyevhangeli, a hi fanelanga hi ti dondzra akuva hi khalutisa nkama. Kambe hi fanela ku ti dondzra ha hombe hi tlhela hi yanakanyisisa hi leswi hi swi dondzraka ka tone. (Tlhela u vona Yehošua 1:8.) A hi voni swidzringanyeto swibidzri leswi nga hi pfunaka ku susa londzrovoto ka Tiyevhangeli ni ku tizrisa leswi hi swi dondzraka ka tone.

13. U nga yentxa yini akuva u susa londzrovoto loko u dondzra Tiyevhangeli?

¹³ Xa ku sungula, yentxa leswaku dzrungula ledzri u dzri dondzraka ka Tiyevhangeli dzri hanya. Tiyanakanyi na wu li mbangwini lowu u dondzraka ha wone. Dzringisa ku vona, ku twa ni ku yingela leswi u dondzraka ha swone. Lexi nga hi pfunaka ku yentxa leswo, i ku hamba wusetxhi ka switizru swinyingi leswi nhlengeletanu ya Yehovha yi hi nyikaka akuva hi dondzra ha swone. Nakone kambisisa mongo—leswi yentxekiki ntsrhaku ne mahlweni ka mhaka leyi u dondzraka ha yone. Djuletela dzrungula mayelanu ni vhanu ni mimbangu leyi u dondzraka ha yone. Vona ndlela leyi dzrungula ledzri u dzri dondzraka dzri tlhamuxeliwiki ha yone ka Tiyevhangeli tin’wana. Minkama yin’wana mutsrali wa Evhangeli yin’we a tlhamuxela mhaka leyi mun’wana a kalaka a nga yi tlhamuxelanga.

14-15. Hi nga swi tizrisa hi ndlela yini a wuton’wini byezru leswi hi swi dondzriki ka Tiyevhangeli?

¹⁴ Xa wubidzri, tizrisa leswi u swi dondzraka ka Tiyevhangeli. (Yh 13:17) Ntsrhaku ka loko u dondzre ha hombe dzrungula dzra kukazri ka  Tiyevhangeli, tivutise: ‘Xana ku ni ntxhumu lowu ni wu dondzriki lowu ni nga wu tizrisaka a wuton’wini byanga? Ni nga dzri tizrisa hi ndlela yini dzrungula ledzri akuva ni pfuna vhanu vambeni?’ Dzringisa ku pimisa hi mhunu wa kukazri, kutani loko ku li nkama lowunene, hi ndlela ya lizrandzru mu byele leswi u swi dondzriki.

¹⁵ A hi voni xikombiso xa ndlela leyi hi nga landzraka ha yone swidzringanyeto leswibidzri. A hi dondzri hi wansati wa xisiwana lwa nga mufelwa lweyi Yesu a mu voniki a tempeleni.

16. Tlhamuxela leswi yentxekiki ka dzrungula ledzri kumekaka ka Marka 12:41.

¹⁶ Yentxa leswaku dzrungula dzri hanya. (Dondzra Marka 12:41) Dzringisa ku vona leswi yentxekaka. I 11 ka Nisani wa 33 N.Y.—ku sale masiku matsrongo akuva Yesu a fa. Yesu a heta nkama wunyingi a tempeleni na a dondzrisa. Nakone a a kanetiwa swinene hi vazrangeli va wukhongoti. Van’wana va ganagana wulawuli bya Yesu. Na kasi van’wana va mu hamba swivutiso swa ku kazrata akuva va mu dzringa. (Mr 11:27-33; 12:13-34) Kutani swoswi Yesu a ya tlhelo dzrin’wana dzra tempele, lani a kotaka ku vona mabokisi ya swihanano. Leswo swi kombisa leswaku a nga ha va a li mbangwini lowu vitaniwaka Mbangu wa Vavasati. Kutani a tsrhama a sungula ku xiya lava petaka swihanano a mabokisini. A vona vhanu vanyingi lava ganyiki na va peta mali yinyingi. Swi nga yentxeka a a li kusuhi swinene lakakuva a kota ni ku twa pongwe dzra mali loko yi wa a ndzreni ka mabokisi.

17. I yini leswi wansati lwa nga mufelwa lwa kombisiwaka ka Marka 12:42 a swi yentxiki?

¹⁷ Dondzra Marka 12:42. Ntsrhaku ka nkamanyana, Yesu a vone ntxhumu wumbeni. A vone wansati lwa nga “mufelwa”. (Lk 21:2) Wutomi bya wansati lweyo a byi nga nabyali. Swi nga yentxeka a swi nga nabyali nambi ku va a kuma swakuda swa siku ni siku. Nambi swi li tanu, yene a ya mabokisini a ya nyikela swimalana switsrongo leswi a a li na swone. Mali i yitsrongooo lakakuva a yi nga hambi pongwe loko yi wa bokisini. Yesu awa swi tiva leswi wansati lweyo a swi petiki bokisini—a ku li swimalana swibidzri swa lepton, nga mali ya le hansi leyi a yi tizrisiwa nkama wolowo. Mali yoleyo a yi li ya le hansi swinene lakakuva a yi nga xavi nambi ku li xindjengeletana, ku nga xinyanyana xa le hansi swinene lexi mhunu a a xi xava akuva a da.

18. Hi ku ya hi Marka 12:43, 44, i yini leswi Yesu a swi hlayiki mayelanu ni leswi wansati lwa nga mufelwa a swi nyikeliki?

¹⁸ Dondzra Marka 12:43, 44. Yesu a hlamalisiwa ngopfu hi mufelwa. Kutani a vitana vadondzrisiwa vakwe a kombeta mufelwa a ku: ‘Lwe wa mufelwa lwe wa xisiwana a txheli ku tlula hinkwavu.’ Kutani Yesu a tlhamuxela a ku: ‘Hikuva hinkwavu [ngopfungopfu lava ganyiki] va txheli na swi pfa ku taleliweni kwavu, kambe yene a txheli na swi pfa ku pfumaleni kwakwe, hinkwaswu leswi a nga naswu, swa wutomi byakwe hinkwabyu.’ Loko wansati lweyo wa ku dumbeka a beki swimalana swakwe leswitsrongo a bokisini dzra le tempeleni a nyikete wutomi byakwe a mavokweni ya Yehovha.—Ps 26:3.

19. He yini ndondzro ya lisima leyi hi yi kumaka ka mazritu ya Yesu mayelanu ni wansati lweyi a nga mufelwa?

¹⁹ Tizrisa leswi u swi dondzraka. Tivutise: ‘Ni nga dondzra yini ka mazritu ya Yesu mayelanu ni wansati lwa nga mufelwa? Yimanyana kutsrongo u va u yanakanyisisa hi wansati lwa a nga mufelwa. Handle ka ku ganaganeka a a navela ku nyikela leswi yengetelekiki ka Yehovha. Nambi swi li tanu a yentxi leswi a a swi kota, a nyike Yehovha hinkwaswu leswi a a li na swone. Yesu a a swi tiva leswaku a swihanano swakwe a swi li swa lisima ngopfu swinene ka Yehovha. Lani hi kuma dondzro ya lisima: Yehovha a nyonxa  swinene loko hi mu nyika swa lisima ka leswi hi nga na swone—ku nga ntizro lowu hi mu yentxelaka wone hi mbilu hinkwayu. (Mt 22:37; Kl 3:23) Yehovha a nyonxa swinene loko hi yentxa leswi hi nga swi kotaka. Leswo swa tizra ni ka nkama ni ntamu lowu hi wu hetaka akuva hi zrezra, akuva hi hlalela mintlhanganu ni ku va hi yentxa ntxhumu wun’wana ni wun’wana akuva hi mu tizrela.

20. U nga swi tizrisa hi ndlela yini leswi u swi dondzraka ka dzrungula dzra wansati lwa nga mufelwa? Nyikela xikombiso.

²⁰ U nga dzri tizrisa hi ndlela yini dzrungula dzra Wansati lweyi a nga mufelwa? Yanakanya hi vamakwezru lava u va tivaka, swi nga yentxeka va titwa va hele ntamu hi leswi va yanakanyaka leswaku a va yentxi swinyingi a ntizrweni wa Yehovha. Hi xikombiso, swi nga yentxeka u tiva makwezru wa kukazri lwa kuliki hi ntanga, lweyi a nga ni swikazratu swa lihanyu, nakone a nga ha na ntamu wa ku yentxa hinkwaswu leswi a a kota ku swi yentxa a ntizrweni wa ku zrezra. Hi mhaka ya leswo, a titwa nandzru a tlhela a titwa a nga pfuni ntxhumu. Kumbe u tiva makwezru lweyi a kazratiwaka hi mavabyi ya kukazri lawa ma tekaka nkama wa ku leha akuva ma daheka. Swanga hi leswi a kalaka a nga ha swi koti ku ya a mintlhanganwini hinkwayu a Ndlwini ya Wugandzreli, a titwa a hele ntamu. U nga yentxa yini? Khanela na vone ‘zritu ledzrinene ledzri yakisaka hi mfanelo’. (Ef 4:29) Va dzrungulele tindondzro ta lisima leti nyonxisaka leti hi nga ti dondzraka ka wudzrunguli bya wansati lwa nga mufelwa. Hi ndlela leyo, u ta va pfuna ku tiyiseka leswaku Yehovha a nyonxa swinene hi leswi hi swi yentxaka nambi loko swi tikomba na swi li switsrongo. (Pr 15:23; 1Te 5:11) Loko u kulungela vamakwezru hi leswi va swi yentxaka a ntizrweni wa Yehovha u kombisa leswaku u landzra mintila ya Yesu hi ku dumbeka.

21. I yini leswi u tiyimiseliki ku swi yentxa?

²¹ Swi nyonxisa swinene leswi hi nga ni Tiyevhangeli leti hi nyikaka wutsrhokotsrhoko mayelanu ni wutomi bya Yesu. Ti hi pfuna kuva hi mu yetisela, hi landzra he kusuhi a mintila yakwe. Swi ngo yini ku va u londzrovota nkama wa wugandzreli bya ndangu ni wa dondzro ya ximhunu akuva u dondzra hi Tiyevhangeli? U nga dzrivali leswaku akuva u susa londzrovoto ka leswi u swi dondzraka ka Tiyevhangeli, u fanela ku yentxa dzrungula dzri hanya u tlhela u dzri tizrisa a wuton’wini byaku. Kambe a hi fanelanga hi yetisela leswi Yesu a swi yentxiki ntsena, kambe hi fanela ku tlhela hi yingiseta ni leswi a swi hlayiki. Ka xidondzro lexi landzrelaka, hi ta vona leswi hi nga swi dondzraka ka mazritu ya wugamu lawa Yesu a ma hlayiki swanga mhunu wa nyama lani misaveni.