KA VATEKANI
2: Khomisana
LESWI TLHAMUXELAKA SWONE
Loko nuna na nsati va tizrisana, swi fana ni loko muhahisi wa mavhiyawu ni mupfuni wakwe va tizrisana akuva va kongomisa vhiyawu. Nambi loko va kumana ni swikazratu, nuna kumbe nsati a pimisa hi zritu dzra ku fana na ‘hine’ matsrhan’wini ya ‘mine’
NSINYA WA NAWU WA BIBELE: “A va ha li vabidzri, kambe i nyama yin’we.”—Matewu 19:6.
‘Nuna ni nsati va fanela ku tizrisana akuva va humelela.’—Christopher.
HA YINI SWI LI SWA LISIMA
Loko ku humelela mholova, vatekani lava kalaka va nga tizrisani, va zrwexana minandzru matsrhan’wini ya ku lulamisa mhaka. Xileswo, xikazratu lexitsrongo xi nga ha ndzruluka mhaka leyikulu.
“Ku tiva ku tizrisana i swa lisima a wukatini. Loko mine ni nuna wanga hi nga tizrisani, hi to va vhanu lava tsrhamaka xikan’we ntsena kambe va kalaka va nga kumani mhakeni ya ku hamba swiboho.”—Alexandra.
LESWI U NGA SWI YENTXAKA
TIKAMBELE
Xana ni teka mali leyi ni holaka yi li “yanga hinkwayu”?
Akuva ni kota ku wisa ha hombe ni tihambanisa ni nuna kumbe nsati wanga?
Xana ni fambela kule ni maxaka ya nsati wanga nambiloko a li ni wuxaka lebyikulu na vone?
BULISANA NI NKATAKU
Hi le ka swiyimu swini lani hi kotaka ku tizrisana hi wun’we?
He kwini lani hi nga yampswisaka kone?
I yini leswi hi nga swi yentxaka akuva hi yampswisa ndlela leyi hi tizrisanaka ha yone?
KUMBEXANA U NGA YENTXA LESWI
Yanakanya hi ntlangu wa kukazri lani wene ni nkataku mi nga yimikiki xikan’we. Matsrhan’wini ya leswo xana u nga yentxa yini akuva wene ni nkataku mi yima xikan’we?
Matsrhan’wini ya ku pimisa leswi, ‘Ni nga yentxa yini akuva ni ganya?’ pimisa leswi ‘Hi nga yentxa yini akuva hi ganya?’
“Leswaku i mani lweyi a yentxiki xihoxo a hi swa lisima, xa lisima i ku va ni ku zrula ni wumun’we a wukatini byenu.”—Ethan.
NSINYA WA NAWU WA BIBELE: ‘A mun’wana ni mun’wana a nga txhuke a ku tilavisela swa kwakwe, kambe a a lavisele ni swa van’wana.’—Ba-le-Filipi 2:3, 4.
