Hi ku famba ka nkama, a Vaisrayele va tlhela va sungula ku gandzrela swikwembu swa madzrimi. Hi mhaka leyo, ku dzringana 7 wa malembe, Yehovha a pfumelela Vamidiyani leswaku va yiva swihazri va tlhela va honetela masimu ya Vaisrayele. Akuva va huluka ka Vamidiyani, a Vaisrayele a va tumbela a timhakweni ni le tinhaveni nakone va kombele Yehovha leswaku a va pfuna. Xileswo, Yehovha a zruma ntsrumi akuva yi ya vulavula ni djaha dzra kukazri ledzri a dzri vitaniwa Gidiyoni. Kutani a ntsrumi yi byela Gidiyoni yi ku: ‘Yehovha a ku hlawulile akuva u huluxa Vaisrayele.’ Hiloko Gidiyoni a vutisa ntsrumi a ku: ‘No va mani mine, nakone ni nga swi yentxisa kuyini leswo?’

Gidiyoni a a ta swi tivisa kuyini leswaku i Yehovha a mu hlawuliki? A beka xitlephu xa voya bya hamba a hansi lani a ku nga na mbezre, a va a khongota ka Yehovha a ku: ‘Yehovha, loko ni buya mundzruku mixweni ni kuma leswaku a voya lebyi bya hamba byi tsrakamile hi mbezre nakasi misava yi womile, ni ta swi tiva leswaku wene nakunene u djula leswaku ni huluxa Vaisrayele!’ Hi siku ledzri landzreliki, a kuma voya na byi tsrakamile hi mbezre nakasi a misava yi womile! Kambe Gidiyoni a tlhela a hamba xikombelo xin’wana, a kombela Yehovha leswaku ka mixo lowu a wu ta landzrela, a yentxa leswaku a voya byi va na byi womile, nakasi a misava yi va na yi tsrakamile hi mbezre. Leswi Gidiyoni a swi kombeliki swi  yentxekile, hi ndlela leyo a tiyiseka leswaku Yehovha nakunene a mu hlawulile. Kutani a hlengeleta masotxha yake akuva va ya lwa ni Vamidiyani.

Yehovha a byela Gidiyoni a ku: ‘Ni ta pfuna Vaisrayele akuva va hlula. Kambe leswi mi nga ni masotxha manyingi, mi nga ha txhuka mi yanakanya leswaku mi hlule Vamidiyani hi ntamu wenu, xileswo mukisa masotxha lawa ma txhavaka.’ Hi ndlela leyo, 22.000 wa masotxha ma tlhelela kaya, ku sala 10.000 wa wone ntsena. Yehovha a tlhela a byela Gidiyoni a ku: ‘Ka ha ni masotxha manyingi, zruma masotxha ma ya nwa mati ka nambu. Teka ntsena masotxha lawa ma nwaka mati na ma vonelela valala matlhelweni.’ Phela ke va ntsena 300 wa masotxha lawa ma yentxiki leswo. Yehovha a dumbisa masotxha lawayani ya 300 leswaku ma ta hlula 135.000 wa masotxha ya Vamidiyani.

Hi wusiku lebyiyani, Yehovha a byela Gidiyoni a ku: ‘Wu tlhasile nkama wa kuva u hlasela Vamidiyani.’ Kutani Gidiyoni a nyika masotxha swipalapala akuva ma swi txhaya, a tlhela a ma nyika swisa swa ndzrilo akuva ma vona ha swone. Xileswo, Gidiyoni a byela masotxha yake a ku: ‘Vonani leswi ni taka swi yentxa mi gama mi ni yetisela.’ Hiloko Gidiyoni a txhaya xipalapala xake, a pandzra hotsrho yake a tlhela a tlakuxa xisa xake xa ndzrilo, a va a huwelela a ku: ‘A xipada xa Yehovha ni xa Gidiyoni!’ Kutani masotxha lawa ya 300 ma yentxa leswi fanaka. Loko Vamidiyani va vona leswo, va txhava ngopfu swinene va va va sungula ku hangalaka hi ku tsrutsruma, va tlhela va dlayanana hi xivone. Ni ka khambi ledzri, Yehovha a pfune Vaisrayele kuva va hlula valala vavu.