A mufumi wa Roma, lweyi a a vitaniwa Khezari Auguxtu, a lelete leswaku Vayuda hinkwavu va tlhelela ka madoropa lawa va pswaliwiki ka wone, akuva va ya titsralisa. Xileswo, Yosefa na Mariya va yendzrile va ya Betlehema, ku nga doropa ledzri Yosefa a pswaleliwiki ka dzrone. Hi nkama wolowo, Mariya a a li kusuhi ni ku phuluka.

Loko va tlhasa a Betlehema, a va kumanga mbangu wa ku yetlela ka wone, xileswo va ye yetlela a xib’ayeni. Hi lani Yesu a pswaleliwiki kone. Hi lizrandzru Mariya a funekete xibebetana xake hi makapulana, a va a xi beka lani a swihazri a swi dela kone.

A kusuhi ni Betlehema, a ku ni vabyisi va kukazri lava a va tsrhamile a handle na va zrindzra tihamba tavu. Na va nga swi yimelanga, ku humelele ntsrumi yi yima mahlweni kwavu, kutani va sungula ku vona ku phatima ka Yehovha. Hiloko vabyisi va txhava ngopfu, kambe a ntsrumi yi ku: ‘Mi nga txhavi, hikusa ni mi tisela ndzrava ya ku nyonxisa. Namunhla ku pswaliwe Mesiya a Betlehema.’ Na  ya ha vulavula, ku humelela tintsrumi tin’wana a tilweni ti ku: ‘Dzrumisani Xikwembu Nkulukumba lweyi a nga matilweni, nakone a misaveni a ku ve ni ku zrula.’ Ntsrhaku ka leswo, a tintsrumi ti nyamalala. I yini leswi vabyisi va swi yentxiki?

Va byelane va ku: ‘A hi fambeni a Betlehema swoswi.’ Hiloko vabyisi va ya Betlehema, nakone va kume Yosefa, Mariya ni xibebetana xavu na va li xib’ayeni.

Loko vabyisi va hlaya leswi a ntsrumi yi va byeliki swone, a vhanu hinkwavu va hlamala ngopfu swinene. Mariya a sungula ku yanakanyisisa ha hombe hi leswi a ntsrumi yi swi hlayiki nakone a nga zanga a ma dzrivala mazritu lawo. Ntsrhaku ka leswo a vabyisi va tifambela na va tlangela Yehovha hi kola ka mintxhumu hinkwayu leyi va yi voniki ni ku yi yingela.