A ku khaluta kolomu ka 70 wa malembe na ntalu wa Vaisrayele va tlhelelile a Yerusalema, kambe van’wana a va tsrhama ka mimbangu ya ku siyanasiyana leyi a yi zrangeliwa hi mfumu wa Persiya. Mun’we ka Vaisrayele volavo a ku li muprista Ezra. Ezra a a dondzrisa vhanu nawu wa Yehovha. A swi tivile leswaku a Vaisrayele lava a va dondzrisa milawu ya Yehovha a va nga ha yi landzri milawu yoleyo, xileswo a a djula ku va pfuna. Kutani Artaxerxi lweyi a a li hosi ya le Persiya, a mu byela a ku: ‘Xikwembu Nkulukumba a ku nyike wutlhazri akuva u kota ku dondzrisa Nawu wake. Tlhela, u ya Yerusalema, mun’wana ni mun’wana lweyi a swi nyonxelaka ku famba na wene, a nga famba.’ Hiloko Ezra a hlengeleta vhanu hinkwavu lava a va swi djula ku tlhelela a Yerusalema. Na va nge si na famba, va khongota ka Yehovha va kombela leswaku a va sizrelela ka liyendzro dzravu.

Ntsrhaku ka mune wa tihweti va tlhase Yerusalema. Hiloko tihosana ti byela Ezra ti ku: ‘A Vaisrayele a va wu yingisetanga nawu wa Yehovha, va txhate ni vavasati lava gandzrelaka swikwembu swa madzrimi.’ Loko Ezra a twa leswo, a khinsama mahlweni ka xitsrhungu a khongota a ku: ‘Yehovha, u hi kombise lizrandzru kambe hine hi yentxe mintxhumu leyi kalaka yi nga ku nyonxisi.’ A Vaisrayele va tisolile, kambe a va ha tama va yentxa mintxhumu ya ku biha. Xileswo Ezra a hlawula vakulu ni vayavanyisi akuva va lulamisa mhaka leyi. Ntsrhaku ka tihweti tizrazru, a vhanu lava a va nga gandzreli Yehovha va hlongoliwile a Yerusalema.

Ku khalute 12 wa malembe, ndzreni ka nkama wolowo a makhumbi ya Yerusalema ma tlhele ma pfuxetiwa. Hiloko Ezra a hlengeleta vhanu akuva va dondzreliwa Nawu wa Xikwembu Nkulukumba. Kutani loko Ezra a pfula buku, hinkwavu va sekeleka. Ezra a dzrumisa Yehovha, va va vhanu hinkwavu va pfumelelana ni mazritu yake. Nkama lowu a a dondzra a tlhela a tlhamuxela milawu leyo, a vhanu a va yingiseta. Xileswo va dzrila va tlhela va pfumela leswaku hi makhambi ya ku siyanasiyana va dohele Yehovha. Hi siku ledzri landzreliki, Ezra a tlhela a dondzrela vhanu milawu ya Xikwembu Nkulukumba. A Vaisrayele va xiye leswaku a ku sale nkama wutsrongo akuva va hamba Nkhuvu wa Mintsronga. Hi ndlela leyo, a va ha tekanga nkama, ve vhela va sungula ku lulamisela nkhuvu wolowo.

 Ku dzringana 7 wa masiku ya nkhuvu, a Vaisrayele va nyonxa ngopfu swinene va va va tlangela Yehovha hi leswi a tovokisiki leswi va swi byaliki a masin’wini yavu. A khambi dzra wugamu ledzri Vaisrayele va hambiki Nkhuvu wa Mintsronga, a ve masikwini ya Yoxuwa. Ntsrhaku ka nkhuvu, vhanu hinkwavu va khongota va ku: ‘Yehovha, u hi humese a Egipta u tlhela u hi nyika swakuda nkama lowu a hi li mananga, hi wugamu u hi nyike tiko ledzri dzra ku xonga ngopfu swinene. Hi makhambi ya ku siyanasiyana hi ku yentxele mintxhumu ya ku biha. U zrumele vaprofeta akuva va hi ba ndleve kambe hine a hi yingisetanga. Nambitanu u hi lehisele mbilu u va u swi hetisisa leswi u swi dumbisiki Abrahamu. Namunhla ha ku dumbisa leswaku hi ta ku yingiseta.’ Hi ku landzrela, va tsrale hinkwaswu leswi va swi dumbisiki akuva va tiyisekisa leswi xitsrhungu xi swi dumbisiki. A tihosana, a vazrangeli ni Valevhi va beka swa ku funga hi swone.