Hi ni mune wa mavhidiyu lama vulavulaka hi Xidondzro Xa Bibele lawa hi nga ma tizrisaka a nsin’wini. He wini nkongometo wa vhidiyu ha dzrin’we dzrin’we?

• Ha Yini U Fanela Ku Dondzra Bibele?—Vídeo Hinkwadzru dzri hambiwe hi nkongometo wa ku kokela vhanu a Bibeleni, swi nge na mhaka leswaku i va wukhongoti muni. Dzrone dzri kutxa vhanu kuva va djuletela tinhlamulo ta swivutiso swa lisima mayelanu ni wutomi a Bibeleni nakone dzri nyikela xikombiso xa nhlamulo leyi kongomiki ni leyi twisisekaka leyi Bibele dzri yi nyikelaka. Nakone a vhidiyu dzri kombisa ndlela ya ku kombela xidondzro xa Bibele.

• Ha Yini U Fanela Ku Dondzra Bibele? (xiyenge lexitsrongo) dzri fana ni ledzra ku sungula, kambe ledzri dzri gomile. Dzri nga tizra ngopfu ka nsimu leyi vhanu va kone va kalaka va nge na nkama wunyingi wa ku bula.

• Xi Yentxisiwa Kuyini Xidondzro xa Bibele? dzri hambeliwe ku zramba vhanu kuva va va ni xidondzro xa Bibele xa mahala. Dzri tlhela dzri hlamula swivutiso leswi tolovelekiki, ku patsra ni ndlela ya ku kombela xidondzro xa Bibele.

• Ha Ku Hoyozela Ka Dondzro Yaku Ya Bibele dzri hambeliwe ku komba mhunu lweyi kutani a sunguliki ku fambiseliwa xidondzro xa Bibele. Vhidiyu ledzri dzri kumeka ka tluka 2 dzra buku ledzri liki Hanya Hi Ku Nyonxa!, kambe dzri nga tlhela dzri hlaleliwa loko mi dondzra xibukwana lexi liki Hanya Hi Ku Nyonxa!. A vhidiyu dzri vulavula hi leswi swi taka dondzriwa ka buku ni leswi lweyi u dondzraka na yene a nga swi yimelaka ka xidondzro xin’wana ni xin’wana.

Nambileswi vhidiyu dzrin’wana ni dzrin’wana dzri nga ni nkongometo wa dzrone, hi nga kombisa kumbe ku zrumela dzrin’we dzra wone ka vhanu hi ku ya hi swiyimu swavu. A vazrezri va kutxiwa ku ma tiva ha hombe mavhidiyu lawa ni ku ma tizrisa a nsin’wini.