Papela ledzri yaka ka Vakolosa 2:1-23
2 Hikusa ni djula mi swi tiva leswaku ni lwa yimpi ya yikulu ngopfu swinene akuva ku pfuneka n’wine, ku pfuneka lava nga Lawudikiya, ni hinkwavu lava kalaka va ngi ngi sama va ni vona.
2 Leswi ni swi yentxela kuva a timbilu tavu ti txhaveleliwa ni leswaku hinkwavu va khomana swi tiya hi lizrandzru nakone va va ni wupfundzri hinkwabyu lebyi tisiwaka hi ku va ni xitiyisekiso xa ku twisisa kwavu, akuva va kuma wutivi bya ntiyiso bya xihundla xa ku xwenga xa Xikwembu Nkulukumba, ku nga Kriste,
3 lweyi a wutlhazri hinkwabyu bya ku hlawuleka ni wutivi swi* fihliwiki kwake.
4 Leswi ni swi hlayela kuva ku nga vi na mhunu lweyi a zamaka ku mi hambukisa hi mazritu ya ku kholwisa.
5 Nambileswi ni nga liki na n’wine hi le nyameni, ni na n’wine hi le moyeni, na nyonxa hi ku vona ku hleleka kwenu lokunene ni lipfumelo ledzri tiyiki ka Kriste.
6 Kutani leswi mi kombisiki lipfumelo ka Kriste Yesu Hosi yezru, yanani mahlweni mi fambisa xileswi yene a fambisiki xiswone,
7 mi dzima timitsru, mi yakeka kwake mi tlhela mi tiya lipfumelweni hi lani mi dondzrisiwiki ha kone, nakone mu tlangelani ngopfu swinene Xikwembu Nkulukumba.
8 Tivonelani leswaku ku nga vi na mhunu lweyi a mi phasaka* hi mafilozofiya ni wukanganyisi lebyi kalaka byi nga pfuni ntxhumu hi ku ya hi swihena swa vhanu ni hi mintxhumu leyi nga yone ya ntshima ya misava ku nga li hi ku ya hi Kriste;
9 hikusa hi yene lweyi a nga ni matsrhamela hinkwawu ya Xikwembu Nkulukumba.
10 Xileswo mi ni hinkwaswu hi kola kwake, yene lweyi a nga nhloko ya mimfumu hinkwayu ni wulawuli.
11 Hi ku va ni wuxaka na yene, na n’wine mi sokisiwile hi ku sokisa loku nga yentxiwiki hi mavoko kambe mi sokisiwe hi ku soka loku lumbaka Kriste, hi ku va mi hlivila mizri wa nyama.
12 Hikusa mi lahliwe na yene hi ku va mi babatisiwa hi babatiso dzra ku fana ni dzrake, nakone leswi mi nga ni wuxaka na yene, na n’wine mi pfuxiwile hi leswi mi nga ni lipfumelo ka mintizro ya ku hlamalisa ya Xikwembu Nkulukumba, lweyi a mu pfuxiki ka lava fiki.
13 Handle ka leswo, nambileswi a mi file hi mhaka ya swidoho swenu ni hi mhaka ya leswi a mi nga sokanga, Xikwembu Nkulukumba a yentxe leswaku mi hanya kun’we na yene. Hi ku swi zrandzra* a hi dzrivalele swidoho swezru hinkwaswu
14 a va a helisa Nawu hinkwawu lowu a wu tsraliwile lowu a wu lwisana na hine. A wu susile hi kuva a wu gongondzrela a mhandzrini ya nxanisa.
15 Hi ku tizrisa mhandzri ya xanisa a hlule mimfumu ni wulawuli, a yi yentxa swib’otxhwa hi ku yi danisa mahlweni ka vhanu a kombisa leswaku a hlulile.
16 Xileswo, mi nga pfumeleli mhunu a mi yavanyisa mayelanu ni leswi mi swi daka ni ku swi nwa kumbe mayelanu ni ku tlangela nkhuvu, ku tlangela ku huma ka n’weti ni savata.
17 A mintxhumu leyi yo va ntsrhuti wa leswi swa ha taka, kambe a xisekelo xa kakunene xa mintxhumu leyi i Kriste.
18 Tivonelani ka lava va titsrongahataka ntsena akuva va voniwa hi vhanu ni lava va gandzrelaka tintsrumi, hikusa va nga mi sivela ku kuma hakelo, vhanu va ku tasu “va khomelela swi tiya” ntsena ka mintxhumu leyi va yi vonaka, va va va tikhuza hi mimpimiso yavu leyi kalaka yi nga pfuni ntxhumu,
19 a matsrhan’wini ya kuva va khomelela swi tiya ka lweyi a nga nhloko, ku nga lweyi a mizri hinkwawu wu pfunekaka ha yene nakone wu tlhanganisiwaka kun’we hi mazrambu ni minsiha kutani wu kulisiwa hi ku kulisa loku pfaka ka Xikwembu Nkulukumba.
20 Loko a li leswaku mi fe xikan’we na Kriste a mhakeni ya mintxhumu ya ntshima ya misava, ha yini ma ha hanya ingiki hi loko ma ha li xiyenge xa misava hi ku tama mi landzra milawu leyi liki:
21 “Mi nga swi khomi, mi nga dzringi, mi nga swi khumbi”,
22 na ku hlayiwa mintxhumu leyi taka gama yi helisiwa ntsrhaku ka loko yi tizrisiwile, nakasi a milawu leyo i swileleto ni tindondzro ta vhanu?
23 Nambileswi milawu leyi yi tikombaka na yi li ya wutlhazri a yi va pfuni vhanu leswaku va lwisana ni ku navela ka nyama, nakone va yingiseta milawu leyi hikusa va djula ku tihlawulela ndlela leyi va mu gandzrelaka ha yone Xikwembu Nkulukumba, va nyika lisima ku navela ka mizri wavu lowu nga ni xidoho, hikusa va djula leswaku vhanu va pimisa leswaku vone va titsrongahata.
Tintlhamuxelo ta le hansi
^ Kumbe: “nhlengwe hinkwayu ya wutlhazri ni wutivi yi”.
^ Hi ku kongoma: “a mi yentxaka swikazrawa”.
^ Kumbe: “hi mbilu hinkwayu”.
