Papela ledzri dzri yaka ka Vaefesa 3:1-21
3 Hi xivangelo lexo, mine Pawulo, xib’otxhwa xa Kriste Yesu hi kola kwenu, n’wine vhanu va matiko . . .
2 nakunene mi swi yingelile leswaku ni nyikiwe ntizro wa ku mi pfuna leswaku mi yamukela timpswalu letikulu ta Xikwembu Nkulukumba.
3 Ina, Xikwembu Nkulukumba a ni tlhamuxele xihundla xa ku xwenga, hi lani ni samiki ni mi tsralelanyana ha kone.
4 Xileswo a nkama lowu mi taka dondzra timhaka leti, mi ta swi xiya leswaku na xi twisisa xihundla xa ku xwenga xa Kriste.
5 A tinxaka tin’wana leti khalutiki, Xikwembu Nkulukumba a nga ti tlhamuxelanga hi ku helela xihundla lexi hi lani swoswi a yentxiki ha kone ka vapostola vake va ku xwenga ni le ka vaprofeta hi ku tizrisa moya wa ku xwenga,
6 ku nga leswaku a vhanu va matiko hi ku va va li vadondzrisiwa va Kriste Yesu ni hi kola ka madzrungula lamanene va fanela ku va vamadapfindla kun’we na hine, va va swizrokulozri swa mizri ni ku tlhela va hlengela na hine ka xidumbiso.
7 Ni ve mhunu lweyi a mi pfunaka ku twisisa xihundla lexi xa ku xwenga hi kola ka nyiko ya mahala ya timpswalu letikulu ta Xikwembu Nkulukumba leyi a ni nyikiki yone nkama lowu a ni nyikiki ntamu wake.
8 A timpswalu leti letikulu ti nyikiwe mine, ni nga lwentsrongo ka vaxwengi hinkwavu, akuva ni ta zrezrela vamatiko madzrungula lamanene ya mayelanu ni matovoko lama pfaka ka Kriste, lawa swi kalaka swi nga koteki ku ma pima
9 ni ku yentxa leswaku hinkwavu va vona ndlela leyi a xihundla xa ku xwenga xi taka tizra ha yone, lexi a xi fihliwile ku dzringana malembe manyingi hi Xikwembu Nkulukumba lweyi a tumbuluxiki mintxhumu hinkwayu.
10 Leswo swi ve hi ndlela leyo akuva swoswi hi ku tizrisa bandla, swi koteka kuva a Mimfumu ni wulawuli a matilweni swi tivisiwa wutlhazri bya Xikwembu Nkulukumba lebyi kombisiwaka hi tindlela tinyingi ta ku hambanahambana.
11 Leswo swi fambisana ni nkongometo lowu nga helikiki lowu Xikwembu Nkulukumba a kunguhatiki ku wu hetisisa hi ku tizrisa Kriste Yesu Hosi yezru,
12 lweyi ha yene hi nga vulavulaka na hi ntsrhunxekile hi tlhela hi tsrhindzrekelela Xikwembu Nkulukumba na hi tiyile hikusa hi ni lipfumelo ka Kriste.
13 Xileswo, ni mi kombela kuva mi nga godoli hi mhaka ya mahlomulo lawa ni kumanaka na wone hi mhaka yenu, hikusa wone ma mi tisela lidzrumu.
14 Hi xivangelo lexo, ni khinsama mahlweni ka Papayi,
15 lweyi a ndangu wun’wana ni wun’wana a tilweni ni le misaveni wu nga kone hi kola kwake.
16 Ni khongota leswaku Xikwembu Nkulukumba lweyi a nga ni ku phatima lokukulu a nga mi tiyisa hi ku tizrisa ntamu lowu moya wake wu wu nyikelaka,
17 ni leswaku hi kola ka lipfumelo dzrenu, Kriste a nga tsrhama timbilwini tenu kun’we ni lizrandzru. Ingiki mi nga dzima timitsru mi tlhela mi tiya ka masungulo,
18 akuva n’wine kun’we ni vaxwengi hinkwavu mi kota ku ku twisisa hi ku helela a ku yanama, ku leha, ku tlakuka, ni ku yenta ka ntiyiso.
19 Ni kuva mi tiva lizrandzru dzra Kriste ledzri nga dzrikulu ku tlula wutivi, akuva mi tala hi mintxhumu hinkwayu ya yinene leyi Xikwembu Nkulukumba a yi nyikelaka.
20 Xikwembu Nkulukumba, hi ku ya hi ntamu wake lowu tizraka kwezru, a nga yentxa swa ku tlula hinkwaswu leswi hi swi kombelaka kumbe ku swi yanakanya,
21 xileswo a fanela ku dzrumisiwa hi tinxaka hinkwatu hi masiku ni masiku, hi ku tizrisa bandla ni hi ku tizrisa Kriste Yesu. Amen.
