Mintizro ya Vapostola 11:1-30
11 A vapostola ni vamakwezru lava a va li Yudeya va twa leswaku a vhanu vamatiko na vone va yamukele zritu dzra Xikwembu Nkulukumba.
2 Xileswo loko Petro a tlhelela Yerusalema, lava a va seketela ku soka va sungula ku mu holovisa,*
3 va ku: “U ye nghena ndlwini ya vhanu lava kalaka va nga sokanga u tlhela u da na vone swakuda.”
4 Xileswo Petro a sungula ku va tlhamuxela mhaka ya kone hi wunyaminyami a ku:
5 “A ni le doropeni dzra Yopa ni khongota, ni tikume ingiki no lozra, kutani ni va ni xivoniso lani ni voniki ntxhumu wa* ku fana ni panu ya yikulu ya lisima,* wone a wu xixiwa hi le tilweni na wu khomiwe hi mune wa tiponta ta wone, wu xixiwe a hansi lani a ni li kone.
6 Loko ni wu lavisisa ni vone swihazri swa mune wa minenge, swihazri swa nhova, swihazri leswi fambaka hi khuzri* ni tinyanyana ta tilo.
7 Ni tlhele ni twa zritu dzri ni byela dzri ku: ‘Petro, sekeleka u dlaya u da!’
8 Kambe ni te: ‘Hosi, a ni nge swi yentxi nikutsrongo, hikusa ntxhumu lowu nyamiki kumbe wu kalaka wu nga basanga a wu ngi ngi sama wu nghena non’wini wanga.’
9 A zritu ledzri pfaka hi le tilweni dzri ni hlamule hi khambi dzra wubidzri dzri ku: ‘Tsrhika ku hlaya mintxhumu leyi Xikwembu Nkulukumba a yi basisiki u ku yi nyamile.’
10 Leswi swi tlhele swi yentxeka hi khambi dzra wuzrazru, kutani mintxhumu hinkwayu yi tlheliseliwa tilweni.
11 Handle ka leswo, hi nkama wolowo ku tlhase vhanu vazrazru ka muti lowu a hi li ka wone na va sukela Khezariya va zrumiwile ku ta kwanga.
12 Kutani a moya wa ku xwenga wu ni byela leswaku ni famba na vone na ni nga ganaganeki nikutsrongo. Vamakwezru lava va 6 na vone va fambe na mine hi va hi nghena ndlwini ya wanuna lweyo.
13 “A hi byele leswaku a vone ntsrumi na yi yime kaya kwake yi ku: ‘Zruma vhanu va ya Yopa va ya vitana Simoni lweyi a tiviwaka hi vito dzra ku Petro,
14 kutani a ta mi byela mintxhumu leyi wene ni hinkwavu vandangu waku mi nga yi yentxaka akuva mi huluxiwa.’
15 Kambe loko ni sungula ku vulavula, a moya wa ku xwenga wu xikela kwavu ku fana ni leswi wu yentxisiki xiswone ni kwezru a ku sunguleni.
16 Xileswo ni dzrimuke mazritu lawa Hosi a yi talisa ku ma hlaya, yi ku: ‘Yohane a a babatisa hi mati, kambe n’wine mi ta babatisiwa hi moya wa ku xwenga.’
17 Kutani loko Xikwembu Nkulukumba a va nyike nyiko ya mahala ya ku fana ni leyi a yi nyikiki hine lava pfumeliki ka Hosi Yesu Kriste, ni mani mine akuva ni nga kota ku sivela Xikwembu Nkulukumba?”
18 Loko va twa leswo, va yima ku mu holovisa* va va va dzrumisa Xikwembu Nkulukumba va ku: “Ahamm! Leswo swi hlaya leswaku Xikwembu Nkulukumba a nyike ni vhanu va matiko mukhandlu wa kuva va tisola, akuva va ta kota ku kuma wutomi.”
19 Lava a va hangalakile hi mhaka ya nhlomulo lowu wu viki kone hi kola ka leswi yentxekeliki Stefanu, va fambe va ya tlhasa Fenikiya, Kipra ni le Antiyokiya kambe a vo zrezrela Vayuda ntsem.
20 Nambitanu, van’we vavu lava a va huma Kipra ni le Kirene va tlhase Antiyokiya va sungula ku vulavula ni vhanu lava a va vulavula Xigriki, va twalisa madzrungula lamanene ya Hosi Yesu.
21 Handle ka leswo, Yehovha a a li na vone, nakone vhanu vanyingi va ndzruluke vapfumeli va va va landzrela Hosi.
22 A dzrungula ledzro mayelanu na vone dzri ye tlhasa ni le bandleni a Yerusalema, kutani va zrumela Barnaba a Antiyokiya.
23 Loko a tlhasa a vona timpswalu letikulu ta Xikwembu Nkulukumba, a nyonxa a va a kutxa hinkwavu leswaku va ya mahlweni va yingiseta Hosi hi timbilu tavu hinkwatu.
24 Hikusa Barnaba a a li mhunu lwenene nakone a a tale hi moya wa ku xwenga ni lipfumelo ledzri tiyiki. Xileswo xitsrhungu xinyingi xi pfumele ka Hosi.
25 Kutani a ya doropeni dzra Tarso a ya djuletela Sawulo a za a mu kuma.
26 Ntsrhaku ka loko a mu kumile, a mu buyisa Antiyokiya. Xileswo ku dzringana lembe hinkwadzru va hlengeletane na vone va va va dondzrisa xitsrhungu xinyingi, nakone a Antiyokiya hi kone lani vadondzrisiwa va sunguliki ku vitaniwa vakriste hi ku kongomisiwa hi Xikwembu Nkulukumba.
27 A masikwini wolawo, a vaprofeta va fulamele va sukela a Yerusalema va ya Antiyokiya.
28 Mun’we wavu lweyi a vitaniwaka Agabu, a sekeleka a profeta hi ku tizrisiwa hi moya wa ku xwenga leswaku ku ta va ni ndlala leyikulu a misaveni hinkwayu, nakunene, ndlala leyo yi ve kone a masikwini ya Klawudiyu.
29 Xileswo a vadondzrisiwa va kunguhata ku zrumela xipfunu* ka vamakwezru lava tsrhamaka Yudeya, mun’wana ni mun’wana a nyikela hi lani a nga kotaka ha kone;
30 nakone leswo va swi yentxile, va zrumele xipfunu ka vakulu hi ku tizrisa Barnaba na Sawulo.
Tintlhamuxelo ta le hansi
^ Kumbe: “ku mu solasola”.
^ Hi ku kongoma: “xibya xa”.
^ Kumbe: “panu ya linyu”.
^ Kumbe: “leswi kokovaka”.
^ Hi ku kongoma: “va miyela”.
^ Kumbe: “xilamulela mhangu”.
